ຕອນບ່າຍຂອງວັນທີ 4 ສິງຫາ 2023 ທ່ານ ນ. ວັນສີ ພວງມະໄລ ກໍາມະການປະຈໍາ-ເລຂາ ທິການສະພາປະຊາຊົນແຂວງ ໄດ້ຖະແຫຼງຂ່າວຕໍ່ສື່ມ່ວນຊົນຂອງແຂວງ ກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ເຊິ່ງທ່ານໄດ້ກ່າວວ່າ:  ຕາງໜ້າຄະນະປະຈຳສະພາປະຊາຊົນແຂວງ ມີຄວາມຍິນດີ ແລະ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານການ ນໍາພັກ-ລັດ, ພະນັກງານ – ລັດຖະກອນ, ທະຫານ-ຕຳຫຼວດ, ນັກຮຽນ-ນັກສຶກສາ, ກຳມະ ກອນ-ຊາວຜູ້ອອກແຮງງານ, ພໍ່-ແມ່ພີ່ນ້ອງບັນດາເຜົ່າໃນທົ່ວແຂວງອຸດົມໄຊ ຮັບຊາບກ່ຽວກັບຜົນສໍາເລັດກອງປະຊຸມສະ  ໄໝສາມັນເທື່ອທີ 5 ຂອງສະພາປະຊາຊົນແຂວງອຸດົມໄຊ ຊຸດທີ II.

ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ 3-4 ສິງຫາ 2023 ໃຊ້ເວລາ 2 ວັນ, ຢູ່ທີ່ສະໂມສອນແຂວງ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມກອງປະຊຸມໂດຍທ່ານ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເລຂາພັກແຂວງ-ເຈົ້າແຂວງອຸດົມໄຊ, ມີບັນດາທ່ານຄະນະປະຈໍາພັກແຂວງ, ກຳມະການພັກແຂວງ, ອົງການທຽບເທົ່າ, ເຈົ້າເມືອງ, ອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04, ສະມາຊິກສະພາປະຊາຊົນແຂວງອຸດົມໄຊ ຊຸດທີ II, ບັນດາແຂກເຊີນເຂົ້າຮ່ວມທັງໝົດ 193 ທ່ານ, ຍິງ 43 ທ່ານ. ໃນນັ້ນ, ສະມາຊິກສະພາປະຊາຊົນແຂວງອຸດົມໄຊ ຊຸດທີ II ເຂົ້າຮ່ວມທັງໝົດ 27 ທ່ານ, ຍິງ 8 ທ່ານ.

ກອງປະຊຸມໄດ້ດໍາເນີນດ້ວຍບັນຍາກາດແຫ່ງການເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາປະຊາຊົນແຂວງໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນພື້ນຖານຂອງແຂວງໂດຍອອກເປັນມະຕິຄື:

1. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ກາງສະໄໝ ແລະ ທິດທາງແຜນການ ທ້າຍສະໄໝ IX(2021-2025);
2. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023;
3. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານ ການເຄື່ອນໄຫວວຽກງານ ກາງສະໄໝຂອງແຜນການ 5 (2021-2025) ແລະ ທິດທາງແຜນການ ທ້າຍສະໄໝ(2023-2025) ຂອງສານປະຊາຊົນແຂວງ ແລະ ອົງການໄອຍະການປະຊາຊົນແຂວງ;
4. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານ ການເຄື່ອນໄຫວວຽກງານ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023ຂອງສານປະຊາຊົນແຂວງ ແລະ ອົງການໄອຍະການປະຊາຊົນແຂວງ;
5. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານ ການເຄື່ອນໄຫວວຽກງານ ກາງສະໄໝຂອງແຜນການ 5 (2021-2025) ແລະ ທິດທາງແຜນການ ທ້າຍສະໄໝ(2023-2025) ຂອງສະພາປະຊາຊົນແຂວງ;

6. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົາບົດລາຍງານ ການເຄື່ອນໄຫວວຽກງານ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023ຂອງສະພາປະຊາຊົນ;
7. ມະຕິກອງປະຊຸມສະພາປະຊາຊົນແຂວງອຸດົມໄຊ ວ່າດ້ວຍ ການຮັບຮອງເອົານິຕິກຳໃຕ້ກົດໝາຍ ຈໍານວນ 3 ສະບັບຄື: ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງ ແລະ ນໍາໃຊ້ທີ່ດິນກະສິກໍາ; ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການສະກັດກັ້ນ ແລະ ການແກ້ໄຂບັນຫາສື່ສັງຄົມອອນລາຍຢູ່ແຂວງອຸດົມໄຊ ແລະ ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງ, ການບໍລິການໄປສະນີ ຢູ່ແຂວງອຸດົມໄຊ.

ການພິຈາລະນາຮັບຮອງເອົາບັນດາຮ່າງຂໍ້ຕົກລົງດັ່ງກ່າວ ເປັນການສືບຕໍ່ຈັດຕັ້ງປະຕິບັດແຜນການສ້າງ ແລະ ປັບປຸງນິຕິກໍາ 5 ປີຂອງສະພາປະຊາຊົນແຂວງ ຊຸດທີ II, ຊຶ່ງເປັນການສືບຕໍ່ຫັນປ່ຽນຢ່າງແຂງແຮງ ແລະ ຮອບດ້ານ ໃນການສ້າງລັດທີ່ປົກຄອງດ້ວຍກົດໝາຍ ແລະ ນິຕິກໍາ ໃຫ້ເປັນຮູບປະທໍາ, ເຂົ້າສູ່ວຽກງານຕົວຈິງເທື່ອລະກ້າວ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍນັບມື້ເປັນລະບົບຄົບຊຸດ ແລະ ມີປະສິດທິຜົນຢ່າງແທ້ຈິງ;

ພ້ອມກັນນັ້ນ, ກອງປະຊຸມຍັງໄດ້ຮັບຟັງການລາຍງານສະພາບທີພົ້ນເດັ່ນຈາກພະແນກການຈໍານວນໜຶ່ງ ແລະໄດ້ສະເໜີໃຫ້ພາກສ່ວນກ່ຽວຂ້ອງຂື້ນຊີ້ແຈງ ຕໍ່ກັບຄໍາຊັກຖາມຂອງສະມາຊິກສະພາປະຊາຊົນແຂວງ ກ່ຽວກັບບັນຫາທີ່ພົ້ນເດັ່ນຢູ່ພາຍໃນແຂວງ ແລະ ກອງປະຊຸມຍັງໄດ້ຮັບຟັງການມີຄຳເຫັນຂອງທ່ານເຈົ້າແຂວງ ຊຶ່ງໄດ້ສັງລວມຄືນບັນດາຄຳຊັກຖາມຂອງສະມາຊິກສະພາປະຊາຊົນແຂວງ ແລະ ການຕອບຄຳຊັກຖາມຂອງບັນດາອົງການທີ່ກ່ຽວຂ້ອງ ເພື່ອເປັນທິດໃນການຈັດຕັ້ງປະຕິບັດວຽກງານຂອງອົງການປົກຄອງແຂວງໃນຕໍ່ໜ້າ.

     ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ຕະຫຼອດໃນໄລຍະດຳເນີນກອງປະຊຸມ ໄດ້ຮັບຄໍາຄິດເຫັນ ແລະ ຄໍາສະເໜີຂອງປະຊາຊົນບັນດາເຜົ່າໃນທົ່ວແຂວງ ຜ່ານໂທລະສັບສາຍດ່ວນ(081 156) ທັງໝົດ 13 ສາຍ; ມີ  24 ບັນຫາ: ຂົງເຂດເສດຖະກິດ, ແຜນການ ແລະ ການເງິນ(ມີ 9 ສາຍ, ມີ 17 ບັນຫາ), ຂົງເຂດວັດທະນະທຳ-ສັງຄົມ ແລະບັນດາເຜົ່າ(ມີ 2 ສາຍ, ມີ 5 ບັນຫາ, ຂົງເຂດຍຸຕິທຳ ແລະ ປກຊ-ປກສ(ມີ 2 ສາຍ, ມີ 2 ບັນຫາ) ຕໍ່ກັບຄໍາຄິດເຫັນດັ່ງກ່າວ ຄະນະເລຂາທິການ​ຈະໄດ້ສະຫຼຸບສັງລວມ ມອບໃຫ້ຄະນະກໍາມະການ ເພື່ອສະເໜີຕໍ່ພາກສ່ວນກ່ຽວຂ້ອງຄົ້ນຄ້ວາ​ ແລະ ແກ້ໄຂໃຫ້ຖືກຕ້ອງຕາມກົດໝາຍ, ລະບຽບການ ແລະ ທັນເວລາ.

ອີກເທື່ອໜຶ່ງ ຕາງໜ້າໃຫ້ຄະນະປະຈຳສະພາປະຊາຊົນແຂວງ, ຂໍສະແດງຄວາມຂອບໃຈມາຍັງບັນດາທ່ານການນໍາພັກ-ລັດຂັ້ນແຂວງ, ພະນັກງານລັດຖະກອນ, ທະຫານ-ຕໍາຫຼວດ, ນັກຮຽນ-ນັກສຶກສາ, ກຳມະກອນ-ຊາວຜູ້ອອກແຮງງານ ແລະ ພໍ່-ແມ່ ປະຊາຊົນບັນດາເຜົ່າໃນທົ່ວແຂວງອຸດົມໄຊ ທີ່ໄດ້ຕິດຕາມການດໍາເນີນກອງປະຊຸມສະ  ໄໝສາມັນເທື່ອທີ 5 ຂອງສະພາປະຊາຊົນແຂວງອຸດົມໄຊ ຊຸດທີ II ຄັ້ງນີ້.

ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງສື່ມ່ວນຊົນຂອງແຂວງ ທີ່ໄດ້ຕິດຕາມຢ່າງໃກ້ຊິດເພື່ອເກັບກໍາຂ່າວ ແລະ ເຜີຍແຜ່ຢ່າງທັນການກ່ຽວກັບການດໍາເນີນກອງປະຊຸມ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ.

ພາບ/ຂ່າວ: ນັກຂ່າວ ສພຂ.