ຕອນເຊົ້າຂອງວັນທີ 23 ກໍລະກົດ 2024 ທີ່ສະຖານີວິທະຍຸ-ໂທລະພາບ ແຂວງອຸດົມໄຊ, ທ່ານ ນາງ ວັນສີ ພວງມະໄລ ເລຂາທິການສະພາປະຊາຊົນແຂວງອຸດົມໄຊ ໃຫ້ຮູ້ວ່າ: ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ດໍາເນີນ ໃນລະຫວ່າງວັນທີ 18-19 ກໍລະກົດ 2024 ໃຊ້ເວລາ 2 ເຕັມ, ຢູ່ທີ່ສະໂມສອນແຂວງ. ພາຍໃຕ້ການເປັນປະທານ ຂອງ ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມ ຂອງ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 4 ແຂວງອຸດົມໄຊ ແລະ ສະມາ ຊິກສະພາປະຊາຊົນແຂວງ, ອະດີດ ສສຊ-ສສຂ, ຄະນະປະຈໍາພັກແຂວງ, ຕາງໜ້າພະແນກການ, ອົງການຈັດຕັ້ງພັກ-ລັດ, ສອງກອງບັນຊາການ, ແນວລາວສ້າງຊາດ, ສະຫະພັນນັກຮົບເກົ່າ, 3 ອົງການຈັດຕັ້ງມະຫາຊົນ, ບັນດາທະນາຄານ, ລັດວິສາຫະກິດ-ບໍລິສັດ, ອົງການປົກຄອງບ້ານເທດສະບານເມືອງໄຊ ແລະ ແຂກເຊີນເຂົ້າຮ່ວມທັງໝົດ 153 ທ່ານ, ຍິງ 33 ທ່ານ; ໃນນີ້ ສະມາຊິກສະພາແຫ່ງປະຈໍາເຂດເລືອກທີ 4 ມີ 7 ທ່ານ, ຍິງ 1 ທ່ານ ແລະ ສະມາຊິກສະພາປະຊາຊົນແຂວງ ມີ 29 ທ່ານ, ຍິງ 10 ທ່ານ.
ກອງປະຊຸມໃນຄັ້ງນີ້ໄດ້ ຄົ້ນຄວ້າ, ພິຈາລະນາ ແລະ ຮັບຮອງເອົາ ເນື້ອໃນສໍາຄັນຂອງແຂວງ ຄື: 1. ໄດ້ພິຈາລະນາ ຮັບຮອງເອົາ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ 6 ເດືອນຕົ້ນປີ ແລະ ແຜນການ 6 ເດືອນ ທ້າຍປີ 2024 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ຮັບຮອງເອົາ ການຈັດຕັ້ງປະຕິບັດ ແຜນງົບປະມານແຫ່ງລັດ 6 ເດືອນ ຕົ້ນປີ ແລະ ແຜນການ 6 ເດືອນ ທ້າຍປີ 2024; ຮັບຮອງເອົາ ການຈັດຕັ້ງປະຕິບັດ ບັນດາຄາດໝາຍພັດທະນາຊົນນະບົດ ແລະ ລຶບລ້າງຄວາມທຸກຍາກປີ 2021 ເຖິງປັດຈຸບັນ ແລະ ແຜນການ ໃນຕໍ່ໜ້າ ຢູ່ແຂວງອຸດົມໄຊ; ຮັບຮອງເອົາ ການເຄື່ອນໄຫວວຽກງານຂອງສະພາປະຊາຊົນແຂວງ 6 ເດືອນຕົ້ນປີ ແລະ ແຜນການ 6 ເດືອນ ທ້າຍປີ 2024 ແລະ ຮັບຟັງການລາຍງານ ຂອງບັນດາຂະແໜງການຈໍານວນໜຶ່ງ ເປັນຕົ້ນ: ບົດລາຍງານ ກ່ຽວກັບການຈັດຕັ້ງປະຕິບັດ ຄໍາສັ່ງເລກທີ 13/ນຍ, ວ່າດ້ວຍການແກ້ໄຂບັນຫາເຄັງຮ້ອນທາງດ້ານເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ຢູ່ແຂວງອຸດົມໄຊ ໃນ 6 ເດືອນຕົ້ນປີ ແລະ ແແຜນການ 6 ເດືອນທ້າຍປີ 2024; ບົດລາຍງານ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຢູ່ແຂວງອຸດົມໄຊ ແລະ ບົດລາຍງານ ການຈັດຕັ້ງປະຕິບັດການຂຸດຄົ້ນແຮ່ທາດ ຢູ່ແຂວງອຸດົມໄຊ ແຕ່ປີ 2021 ເຖິງປັດຈຸບັນ ແລະ ແຜນການໃນຕໍ່ໜ້າ.
ພິຈາລະນາ ແລະ ຮັບຮອງເອົາ ນິຕິກໍາໃຕ້ກົດໝາຍ (ຂໍ້ຕົກລົງເຈົ້າແຂວງ) ຈໍານວນ 3 ສະບັບ ຄື: ຮ່າງ ຂໍ້ຕົກລົງເຈົ້າແຂວງ ວ່າດ້ວຍການກໍານົດເຂດສະຫງວນນໍ້າ ແລະ ຊັບພະຍາກອນນໍ້າແຂວງອຸດົມໄຊ; ຮ່າງ ຂໍ້ຕົກລົງເຈົ້າແຂວງ ວ່າດ້ວຍການດໍາເນີນທຸລະກິດບໍລິການ ດ້ານເຕັກໂນໂລຊີການສື່ສານຂໍ້ມູນຂ່າວສານຢູ່ແຂວງອຸດົມໄຊ ແລະ ຮ່າງ ຂໍ້ຕົກລົງເຈົ້າແຂວງ ວ່າດ້ວຍການຄຸ້ມຄອງ ການບໍລິການ, ການກໍ່ສ້າງ ແລະ ຕິດຕັ້ງໄຟຟ້າ ຢູ່ແຂວອຸດົມໄຊ. ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ. ກອງປະຊຸມຄັ້ງນີ້, ຍັງໄດ້ຮັບຟັງການລາຍງານ-ການຊີ້ແຈງ ແລະ ໃຫ້ຄວາມກະຈ່າງແຈ້ງຕໍ່ຄໍາຊັກຖາມຂອງ ບັນດາທ່ານສະມາຊິກສະພາປະຊາ ຊົນແຂວງ ແລະ ກອງປະຊຸມຍັງໄດ້ຮັບຟັງການມີຄຳເຫັນຂອງທ່ານເຈົ້າແຂວງ ຊຶ່ງໄດ້ສັງລວມຄືນບັນດາຄຳຊັກຖາມຂອງສະມາຊິກສະພາປະຊາຊົນແຂວງ ແລະ ການຕອບຄຳຊັກຖາມຂອງບັນດາອົງການທີ່ກ່ຽວຂ້ອງ ເພື່ອເປັນທິດໃນການຈັດຕັ້ງປະຕິບັດວຽກງານຂອງອົງການປົກຄອງແຂວງໃນ 6 ເດືອນທ້າຍປີ 2024.
ຕະຫຼອດໄລຍະດໍາເນີນກອງປະຊຸມ 2 ວັນ, ໃນນີ້ມີໂທລະສັບສາຍດ່ວນເຂົ້າມາທັງໝົດ 8 ສາຍ; ມີ 14 ບັນຫາ;ຂົງເຂດເສດຖະກິດ, ແຜນການ ແລະ ການເງິນ ມີ 7 ບັນຫາ; ຂົງເຂດວັດທະນະທຳ-ສັງຄົມ ແລະ ບັນດາເຜົ່າມີ 7 ບັນ ຫາ. ບັນດາຄໍາສະເໜີເຫຼົ່ານັ້ນ ຄະນະປະຈໍາສະພາປະຊາຊົນ ແຂວງ ຈະຈັດກອງປະຊຸມຄົ້ນຄວ້າ, ປຶກສາຫາລື ແລ້ວມອບຄວາມຮັບຜິດຊອບ ໃຫ້ບັນດາຄະນະກໍາມະການ ເຮັດສະໂໜດນໍາສົ່ງໃຫ້ອົງການທີ່ກ່ຽວຂ້ອງ ເພືີ່ອຄົ້ນຄວ້າ, ພິຈາ ລະນາ ພ້ອມທັງໃຫ້ຕອບຄໍາຂັດຂ້ອງໝອງໃຈຕໍ່ປະຊາຊົນກ່ຽວກັບບັນຫາດັ່ງກ່າວຕາມພາລະບົດບາດ.
ຂ່າວ: ສພຂ.