ຕອນບ່າຍຂອງວັນພຸດ, ວັນທີ 8 ກຸມພາ 2023 ທີ່ສະຖານີວິທະຍຸ-ໂທລະພາບ ແຂວງອຸດົມໄຊ, ທ່ານ ນ. ວັນສີ ພວງມະໄລ ຄະນະປະຈຳ-ເລຂາທິການສະພາປະຊາຊົນແຂວງ ໄດ້ຖະແຫຼງຂ່າວຕໍ່ສື່ມ່ວນຊົນຂອງແຂວງ ກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນອຸດົມໄຊ ຊຸດທີ II ວ່າ: ຂ້າພະເຈົ້າ, ຕາງໜ້າຄະນະປະຈຳສະພາປະຊາຊົນແຂວງ ມີຄວາມຍິນດີ ແລະ ຂໍຖືເປັນກຽດຢ່າງແຈ້ງມາຍັງບັນດາທ່ານການນໍາພັກ-ລັດ, ພະນັກງານ-ລັດຖະກອນ, ທະຫານ-ຕຳຫຼວດ, ນັກຮຽນ-ນັກສຶກສາ, ກຳມະກອນ-ຊາວຜູ້ອອກແຮງງານ, ພໍ່-ແມ່ພີ່ນ້ອງບັນດາເຜົ່າໃນທົ່ວແຂວງອຸດົມໄຊ ຮັບຊາບ:

ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II ໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ 1-3 ກຸມພາ 2023 ໃຊ້ເວລາ 3 ວັນ, ຢູ່ທີ່ສະໂມສອນແຂວງ(ບ້ານເຈງ), ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມກອງປະຊຸມໂດຍທ່ານ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເລຂາພັກແຂວງ-ເຈົ້າແຂວງອຸດົມໄຊ, ມີບັນດາທ່ານຄະນະປະຈໍາພັກແຂວງ, ກຳມະການພັກແຂວງ, ອົງການທຽບເທົ່າ, ເຈົ້າເມືອງ 7 ເມືອງ, ອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04, ສະມາຊິກສະພາປະຊາຊົນແຂວງອຸດົມໄຊ ຊຸດທີ II, ບັນດາທະນາຄານ ແລະ ແຂກເຊີນເຂົ້າຮ່ວມທັງໝົດ 162 ທ່ານ, ຍິງ 39 ທ່ານ, ໃນນັ້ນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແລະ ສະມາຊິກສະພາປະຊາຊົນແຂວງອຸດົມໄຊ ຊຸດທີ II ເຂົ້າຮ່ວມທັງໝົດ 32 ທ່ານ, ຍິງ 10 ທ່ານ.

ກອງປະຊຸມໄດ້ດໍາເນີນດ້ວຍບັນຍາກາດແຫ່ງການເສີມຂະຫຍາຍສິດປະຊາທິປະ ໄຕ ຂອງບັນດາທ່ານສະມາຊິກສະພາປະຊາຊົນແຂວງ ໃນການພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນພື້ນຖານຂອງແຂວງ ໂດຍອອກເປັນມະຕິຄື:

1. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາບົດລາຍງານຂອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດ ປະຈຳປີ 2022 ແລະ ທິດທາງແຜນການ ປະຈໍາປີ 2023;

2. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາການເຄື່ອນ ໄຫວວຽກງານ ຂອງອົງການກວດສອບປະຈໍາພາກເໜືອ ປະຈຳປີ 2022 ແລະ ທິດທາງແຜນການ ປະຈໍາປີ 2023 ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021;

3. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາການເຄື່ອນ ໄຫວວຽກງານ ຂອງອົງການກວດກາລັດແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ແລະ ການກວດກາຕາມຜົນການກວດສອບ ປະຈໍາປີ 2020;

4. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາການເຄື່ອນໄຫວວຽກງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ປະຈຳປີ 2022 ແລະ ທິດທາງແຜນການ ປະຈໍາ

ປີ 2023;

5. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາແຜນຈັດສັນ ແລະ ຄຸ້ມຄອງການນໍາໃຊ້ງົບປະມານກອງທຶນທາງ ປະຈຳປີ 2022;

6. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາການເຄື່ອນ ໄຫວວຽກງານຂອງສະພາປະຊາຊົນແຂວງ ປະຈຳປີ 2022 ແລະ ທິດທາງແຜນການ ປະຈໍາປີ 2023;

7. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົານິຕິກຳໃຕ້ກົດໝາຍຈໍານວນ 4 ສະບັບຄື: ຮ່າງຂໍ້ຕົກລົງ ວ່າດ້ວຍການນໍາໃຊ້ນໍ້າ, ຮ່າງຂໍ້ຕົກລົງ ວ່າດ້ວຍການຄຸ້ມຄອງ ແລະ ນຳໃຊ້ຢາປາບສັດຕູພືດ, ຮ່າງ ຂໍ້ຕົກລົງ ວ່າດ້ວຍການຄຸ້ມຄອງ ຄ່າທຳນຽມ ແລະ ຄ່າບໍລິການ, ຮ່າງຂໍ້ຕົກລົງ ວ່າດ້ວຍການໂຄສະນາ ແລະ ເຜີຍແຜ່ນິຕິກຳ.

ການພິຈາລະນາຮັບຮອງເອົາບັນດາຂໍ້ຕົກລົງດັ່ງກ່າວ ເປັນການສືບຕໍ່ຈັດຕັ້ງປະຕິບັດແຜນການສ້າງ ແລະ ປັບປຸງນິຕິກໍາ 5 ປີຂອງສະພາປະຊາຊົນແຂວງ ຊຸດທີ II; ຊຶ່ງເປັນການສືບຕໍ່ຫັນປ່ຽນຢ່າງແຂງແຮງ ແລະ ຮອບດ້ານ ໃນການສ້າງລັດທີ່ປົກຄອງດ້ວຍກົດໝາຍ ແລະ ນິຕິກໍາ ໃຫ້ເປັນຮູບປະທໍາ, ເຂົ້າສູ່ວຽກງານຕົວຈິງເທື່ອລະກ້າວ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍຂັ້ນແຂວງ ນັບມື້ເປັນລະບົບຄົບຊຸດ ແລະ ມີປະສິດທິຜົນຢ່າງແທ້ຈິງ;

8. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາການແຕ່ງຕັ້ງຫົວໜ້າພະແນກການ ແລະ ອົງການທຽບເທົ່າຂັ້ນແຂວງຈໍານວນໜຶ່ງ ເຊິ່ງມີລາຍລະອຽດດັ່ງນີ້: 1). ທ່ານ ສົມດີ ເຕັງເບຼຍຈື ເປັນຫົວໜ້າພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, 2). ທ່ານ ນາງ ໄມພອນ ສີລິວົງ ເປັນຫົວ ໜ້າພະແນກ ອຸດສາຫະກໍາ ແລະ ການຄ້າແຂວງ, 3). ທ່ານ ສຸດໃຈ ສຸດແສງເດືອນ ເປັນຫົວໜ້າອົງການພັດທະນາ ແລະ ບໍລິຫານຕົວເມືອງ.

ກອງປະຊຸມຍັງໄດ້ຮັບຟັງການລາຍງານສະພາບທີພົ້ນເດັ່ນຈາກພະແນກການຈໍານວນໜຶ່ງ ແລະ ໄດ້ສະເໜີໃຫ້ພາກສ່ວນກ່ຽວຂ້ອງຂື້ນຊີ້ແຈງ ຕໍ່ກັບຄໍາຊັກຖາມຂອງສະມາຊິກສະພາປະຊາຊົນແຂວງ ກ່ຽວກັບບັນຫາທີ່ພົ້ນເດັ່ນຢູ່ພາຍໃນແຂວງ ແລະ ກອງປະຊຸມຍັງໄດ້ຮັບຟັງການມີຄຳເຫັນຂອງທ່ານເຈົ້າແຂວງ ຊຶ່ງໄດ້ສັງລວມຄືນບັນດາຄຳຊັກຖາມຂອງສະມາຊິກສະພາປະຊາຊົນແຂວງ ແລະ ການຕອບຄຳຊັກຖາມຂອງບັນດາອົງການທີ່ກ່ຽວຂ້ອງ ເພື່ອເປັນທິດໃນການຈັດຕັ້ງປະຕິບັດວຽກງານຂອງອົງການປົກຄອງແຂວງໃນຕໍ່ໜ້າ.

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ຕະຫຼອດໃນໄລຍະດຳເນີນກອງປະຊຸມ ໄດ້ຮັບຄໍາຄິດເຫັນ ແລະ ຄໍາສະເໜີຂອງປະຊາຊົນບັນດາເຜົ່າໃນທົ່ວແຂວງ ຜ່ານໂທລະສັບສາຍດ່ວນ (081 156) ທັງໝົດ 14 ສາຍ, ມີ 15 ບັນຫາ: ຂົງເຂດເສດຖະກິດ, ແຜນການ ແລະ ການເງິນ(ມີ 8 ສາຍ, ມີ 8 ບັນຫາ), ຂົງເຂດວັດທະນະທຳ-ສັງຄົມ ແລະ ບັນດາເຜົ່າ(ມີ 3 ສາຍ, ມີ 3 ບັນຫາ), ຂົງເຂດຍຸຕິທຳ ແລະ ປກຊ-ປກສ(ມີ 3 ສາຍ, ມີ 4 ບັນຫາ) ຕໍ່ກັບຄໍາຄິດເຫັນດັ່ງກ່າວ ຄະນະເລຂາທິການຈະໄດ້ສະຫຼຸບສັງລວມ, ມອບໃຫ້ຄະນະກໍາມະການເພື່ອສະເໜີຕໍ່ພາກສ່ວນກ່ຽວຂ້ອງຄົ້ນຄ້ວາ ແລະ ແກ້ໄຂໃຫ້ຖືກຕ້ອງຕາມກົດໝາຍ, ລະບຽບການ ແລະ ທັນເວລາ.

ອີກເທື່ອໜຶ່ງ ຕາງໜ້າໃຫ້ຄະນະປະຈຳສະພາປະຊາຊົນແຂວງ, ຂໍຂອບໃຈມາຍັງບັນດາທ່ານການນໍາພັກ-ລັດຂັ້ນແຂວງ, ພະນັກງານລັດຖະກອນ, ທະຫານ-ຕໍາຫຼວດ, ນັກຮຽນ-ນັກສຶກສາ, ກຳມະກອນ-ຊາວຜູ້ອອກແຮງງານ ແລະ ພໍ່-ແມ່ ປະຊາຊົນບັນດາເຜົ່າໃນທົ່ວແຂວງອຸດົມໄຊ ທີ່ໄດ້ຕິດຕາມການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງອຸດົມໄຊ ຊຸດທີ II ຄັ້ງນີ້ແຕ່ຕົ້ນຕະຫຼອດປາຍ.

ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງສື່ມ່ວນຊົນຂອງແຂວງ ທີ່ໄດ້ຕິດຕາມຢ່າງໃກ້ຊິດເພື່ອເກັບກໍາຂ່າວ ແລະ ເຜີຍແຜ່ຢ່າງທັນການກ່ຽວກັບການດໍາເນີນກອງປະຊຸມ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ(ຂໍຂອບໃຈ)!

ພາບ-ຂ່າວ: ແສງພອນ ອິນນະລົງ.