ໃນຕອນບາຍຂອງວັນທີ 6 ສິງຫາ 2024 ທີ່ຫ້ອງປະຊຸມສະພາປະຊາຊົນ ແຂວງວຽງຈັນ  ທ່ານ ຄຳຫລ້າ ສີສຸວົງ ຄະນະປະຈໍາ, ຮອງເລຂາທິການ ສະພາປະຊາຊົນແຂວງວຽງຈັນ ໄດ້ຖະແຫຼ່ງຂ່າວຕໍ່ສື່ມວນຊົນຂອງແຂວງເຊິ່ງທ່ານໄດ້ກ່າວວ່າ: ຂ້າພະເຈົ້າ ຕາງໜ້າສະພາປະຊາຊົນແຂວງວຽງຈັນມີຄວາມຍິນດີ ແລະ ຖືເປັນກຽດຢ່າງສູງຂໍແຈ້ງຂ່າວມາຍັງບັນດາທ່ານ ການນໍາຂັ້ນແຂວງ ພະນັກງານ-ລັດຖະກອນ, ທະຫານ, ຕໍາຫຼວດ ນັກຮຽນຮູ້ປັນຍາຊົນ, ພີ່ນ້ອງປະຊາຊົນລາວບັນດາເຜົ່າທົ່ວແຂວງວຽງຈັນ ຮັບຊາບວ່າ: ກອງປະຊຸມສະໄໝສາມັນ ເທື່ອທີ 7 ສະພາປະຊາຊົນແຂວງວຽງຈັນ ຊຸດທີ II ໄດ້ໄຂຂຶ້ນຢ່າງເປັນທາງການ ເລີ່ມແຕ່ ວັນທີ 31 ກໍລະກົດ ຫາ 2 ສິງຫາ 2024 ຢູ່ທີ່ສະໂມສອນໃຫຍ່ຫ້ອງວ່າການແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ປະທານສະພາປະຊາຊົນແຂວງວຽງຈັນ, ກອງປະຊຸມໄດ້ເປັນກຽດຢ່າງສູງຂໍ້ານັບຮັບຕ້ອນການເຂົ້າຮ່ວມຂອງທ່ານ ຄໍາພັນ ສິດທິດໍາພາ ກໍາມະການສູນກາງພັກ , ເລຂາພັກແຂວງ, ເຈົ້າແຂວງວຽງຈັນ, ທ່ານ ສຈ ປອ ຈະເລີນ ເຍຍປ່າວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 10, ສະມາຊິກສະພາປະຊາຊົນແຂວງວຽງຈັນ, ບັນດາທ່ານເຈົ້າເມືອງ-ຮອງເຈົ້າເມືອງ, ຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ ກໍໃຫ້ກຽດເຂົ້າຮ່ວມຢ່າງພ້ອມພຽງ ເຂົ້າຮ່ວມທັງໝົດ 78 ທ່ານ, ຍິງ 17 ທ່ານ.

ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ດຳເນີນ ໄປດ້ວຍບັນຍາກາດທີ່ຟົດຟື້ນ ແລະ ເສີມຂະຫຍາຍສິດປະຊາທິປະໄຕ, ຕະຫຼອດໄລຍະ 3 ວັນ, ສະມາຊິກສະພາປະຊາຊົນແຂວງວຽງຈັນ ໄດ້ຍົກສູງຄວາມຮັບຜິດຊອບທາງດ້ານການເມືອງຂອງຕົນ, ສຸມທຸກສະຕິປັນຍາເຂົ້າໃນການຄົ້ນຄວ້າ, ພິຈາລະນາ ແລະ ຮັບຮອງ ເອົາບັນຫາສຳຄັນຕ່າງໆ ຂອງແຂວງ ດ້ວຍຄວາມເປັນເອກະພາບສູງເຊິ່ງສາມາດພິຈາລະນາ ແລະ ຮັບຮອງເອົາວຽກງານສຳຄັນດັ່ງນີ້:

     ກອງປະຊຸມໄດ້ຮັບຟັງການລາຍງານຂອງອົງການປົກຄອງແຂວງ ໃນໄລຍະ 6 ເດືອນຕົ້ນປີ ແລະ ທິດ

ທາງແຜນການ 6 ເດືອນທ້າຍປີ 2024 ໃນການປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ການລາຍງານຂອງສະພາປະຊາຊົນແຂວງ ລະຫວ່າງກອງປະຊຸມສະໄໝສາມັນເທື່ອທີ 6 ຫາເທື່ອທີ 7 ແລະທິດທາງແຜນການຮອດກອງປະຊຸມສະໄໝສາມັນເທື່ອທີ 8 ແລະ ການລາຍງານບັນຫາທີ່ພົ້ນເດັ່ນຂອງບັນດາພະແນກການກ່ຽວຂ້ອງຂອງແຂວງຈຳນວນໜຶ່ງ.

ກອງປະຊຸມສະໄໝສາມັນເທື່ອທີ 7 ສະພາປະຊາຊົນແຂວງ ຊຸດທີ II ໄດ້ພິຈາລະນາຮັບຮອງເອົາ

ບັນຫາສຳຄັນພື້ນຖານຂອງແຂວງດັ່ງນີ້:

• ຮັບຮອງ ເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024.
• ຮັບຮອງເອົາ ບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024.
• ຮັບຮອງເອົາ ບົດລາຍງານການເຄື່ອນໄຫວວຽກງານລະຫວ່າງກອງປະຊຸມສະໄໝສາມັນເທື່ອທີ 6 ຫາເທື່ອທີ 7 ແລະທິດທາງແຜນການຮອດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງວຽງຈັນ ຊຸດທີ II.
• ຮັບຮອງເອົານິຕິກໍາໃຕ້ກົດໝາຍຂອງອົງການປົກຄອງແຂວງ ຈໍານວນ 1 ສະບັບ ຄື: ຂໍ້ຕົກລົງຂອງທ່ານເຈົ້າແຂວງວ່າດ້ວຍ: ການຄຸ້ມຄອງກິດຈະການທ່ອງທ່ຽວທາງນ້ຳ.

ໃນໄລຍະດໍາເນີນກອງປະຊຸມຄັ້ງນີ້ໄດ້ມີປະຊາຊົນສົ່ງຄຳຄິດຄຳເຫັນຜ່ານໂທລະສັບສາຍດ່ວນ 023 156 ຈໍານວນ 10 ສາຍ ມີ 12 ຄໍາສະເໜີ, ຕິດພັນກັບຂົງເຂດເສດຖະກິດ 10 ສາຍ , ຂົງເຂດ ປກສ-ປກຊ 2 ສາຍ ເນື້ອໃນແມ່ນພົວພັນເຖິງການຄຸ້ມຄອງ-ບໍລິຫານລັດ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ; ກ່ຽວກັບຄໍາຄິດເຫັນຂອງປະຊາຊົນ ກອງເລຂາກອງປະຊຸມໄດ້ສັງລວມ ແລະ ຈະມອບໃຫ້ພາກສ່ວນທີ່ກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງສ່ອດຄ່ອງ ຕາມກົດໝາຍ ແລະ ລະບຽບການ.

ອີກເທື່ອໜຶ່ງຕາງໜ້າຄະນະປະຈຳສະພາປະຊາຊົນແຂວງ, ຂ້າພະເຈົ້າ ຂໍຂອບໃຈ ມາຍັງທຸກພາກສ່ວນ  ທີ່ໄດ້ມີຄວາມພະຍາຍາມຕິດຕາມ, ຮັບຟັງແລະໃຊ້ສິດປະຊາທິປະໄຕຂອງຕົນ ໃນການມີຄໍາຄິດ-ຄໍາເຫັນ ເຊິ່ງມັນສະແດງເຖິງຄວາມຮັບຜິດຊອບທາງດ້ານການເມືອງຂອງຜູ້ມີສິດເລືອກຕັ້ງ ທີ່ໄດ້ມີຄວາມເປັນຫ່ວງ-ເປັນໃຍຕໍ່ການພັດທະນາເສດຖະກິດ-ສັງຄົມ ຂອງແຂວງພວກເຮົາ.

ຂໍສະແດງຄວາມຂອບໃຈ ແລະ ຊົມເຊີຍມາຍັງພາກສ່ວນສື່ມ່ວນຊົນ ຂອງແຂວງທີ່ໄດ້ຕິດຕາມຢ່າງໃກ້ຊິດ ເພື່ອເກັບກຳຂ່າວ ແລະ ເຜີຍແຜ່ຢ່າງທັນການກ່ຽວກັບການດຳເນີນກອງປະຊຸມຄັ້ງນີ້ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ,

ຂໍ​ອວຍ​ພອນ​ແດ່​ທຸກໆ​ທ່ານ ຈົ່ງ​ມີ​ສຸຂະພາບ​​ເຂັ້ມ​ແຂງ, ມີ​ຄວາມຜາສຸກ​ໃນ​ຊີວິດ​ສ່ວນ​ຕົວ ​ແລະຄອບຄົວ​ ປະສົບຜົນສໍາເລັດໃນໜ້າທີ່ວຽກງານທຸກປະການ.

ພາບ-ຂ່າວ ບູລາຕີ ແສນທະວົງ