ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງບໍລິຄໍາໄຊ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 30 ກໍລະກົດ ແລະ ອັດລົງໃນຕອນບ່າຍ ຂອງວັນທີ 1 ສິງຫາ 2024 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງບໍລິຄຳໄຊ, ໃຫ້ກຽດເຂົ້າຮ່ວມໂດຍທ່ານ ປອ ສອນທະນູ ທໍາມະວົງ ກຳມະການສູນກາງພັກ, ເລຂາພັກແຂວງ-ເຈົ້າແຂວງບໍລິຄໍາໄຊ, ມີບັນດາທ່ານຄະນະປະຈຳພັກແຂວງ, ຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ, ອາດີດການນຳຂອງແຂວງ, ພະນັກງານອາວຸໂສບຳນານ, ຫົວໜ້າພະແນກການ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ອົງການລັດທຽບເທົ່າຂັ້ນແຂວງ, ອົງການໄອຍະການປະຊາຊົນພາກກາງ, ສານປະຊາຊົນພາກກາງ, ອົງການກວດສອບພາກກາງ 2, ທະນາຄານແຫ່ງ ສປປ ລາວ ປະຈໍາພາກກາງ, ວິສາຫະກິດ ທັງພາກລັດ ແລະ ເອກະຊົນ, ພິເສດ ກອງປະຊຸມ ຍັງໃຫ້ກຽດຕ້ອນຮັບທ່ານ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ.
ກອງປະຊຸມ ໄດ້ເປັນເອກະພາບສູງ ແລະ ຮັບຮອງເອົາບັນຫາສໍາຄັນຕ່າງໆຂອງແຂວງ, ລະອຽດດັ່ງລຸ່ມນີ້:
- ຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານຂອງແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2024;
- ຮັບຮອງເອົາບົດລາຍງານຂອງພະແນກພະລັງງານ ແລະ ບໍ່ແຮ່ແຂວງ ກ່ຽວກັບຈັດຕັ້ງການປະຕິບັດບັນດາໂຄງການລົງທຶນແຮ່ທາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ;
- ຮັບຮອງເອົາບົດລາຍງານການຈັດຕັ້ງປະຕິບັດວຽກງານແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ທິດທາງແຜນການ ຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ;
- ຮັບຮອງເອົາບົດລາຍງານ ການປະເມີນຜົນການຈັດຕັ້ງປະຕິບັດ ຂໍ້ຕົກລົງຂອງທ່ານເຈົ້າແຂວງ ຈຳ ນວນ 2 ສະບັບ, ຄື: ຂໍ້ຕົກລົງ ສະບັບເລກທີ 237/ຂບຊ, ລົງວັນທີ 28 ມີນາ 2018 ວ່າດ້ວຍການຄຸ້ມຄອງ ແລະ ພັດທະນາດິນກະສິກໍາ ໃນຂົງເຂດຊົນລະປະທານ ແລະ ຂໍ້ຕົກລົງ ສະບັບເລກທີ 150/ຂບຊ, ລົງວັນທີ 17 ມີນາ 2022 ວ່າດ້ວຍການມີສ່ວນຮ່ວມຂອງສັງຄົມໃນວຽກງານສຶກສາ;
- ຮັບຮອງເອົາຂໍ້ຕົກລົງຂອງທ່ານເຈົ້າແຂວງ ຈຳນວນ 3 ສະບັບ ຄື: ຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງໂຄງການເຂດປ່າປ້ອງກັນແຫຼ່ງນໍ້າເຂດອ່າງຮັບນໍ້າຍ້ວງຕອນໃຕ້, ຂໍ້ຕົກລົງຂອງເຈົ້າແຂວງ ວ່າດວ້ຍ ກອງທຶນໄພພິບັດຂັ້ນແຂວງ ແລະ ຂໍ້ຕົກລົງ ວ່າດ້ວຍເຂດສະຫງວນດິນແຄມນໍ້າ ທົ່ວແຂວງ.
ຜ່ານການຖ່າຍທອດສົດ ແລະ ເປິດສາຍດ່ວນ ໃນໄລຍະດຳເນີນກອງປະຊຸມ, ໄດ້ມີຄຳສະເໜີຂອງປະຊາຊົນ ຜ່ານສາຍດ່ວນ ມາຍັງກອງປະຊຸມ ມີ 17 ສາຍ ລວມມີ 19 ເລື່ອງ.