ໃນຕອນເຊົ້າຂອງວັນທີ 19 ກໍລະກົດ 2024 ທີ່ສຳນັກງານສະພາປະຊາຊົນແຂວງຄໍາມ່ວນ ທ່ານ ດຣ ສະເຫຼີມສັກ ແກ້ວຈັນທະລາ ສະມາຊິກສະພາແຫ່ງຊາດ ຄວບສະມາຊິກສະພາປະຊາຊົນຂັ້ນແຂວງ, ຄະນະປະຈໍາສະພາປະຊາຊົນຂັ້ນແຂວງ, ເລຂາທິການສະພາປະຊາຊົນແຂວງຄຳມ່ວນ, ຫົວໜ້າກອງເລຂາກອງປະຊຸມ ທີ່ໄດ້ຕາງໜ້າຄະນະປະຈຳສະພາປະຊາຊົນຂັ້ນແຂວງ ໄດ້ຖະແຫຼງຂ່າວການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ເຊິ່ງຈະດຳເນີນຂຶ້ນໃນຕອນເຊົ້າຂອງວັນ ພຸດ ວັນທີ 24 ກໍລະກົດ ແລະ ຈະດໍາເນີນໄປເຖິງວັນສຸກ, ວັນທີ 26 ກໍລະກົດ 2024 ທີ່ສະໂມສອນ 21 ມີນາ ຂອງແຂວງ (ຫຼັກ 4), ເຊິ່ງຈະໃຊ້ເວລາດໍາເນີນກອງປະຊຸມທັງໝົດ 2 ວັນເຄິ່ງ, ເພື່ອຈະຄົ້ນຄວ້າພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງແຂວງ ຈໍານວນ 3 ວຽກງານ ຄຶ: ວຽກງານ ຂອງອົງການປົກຄອງແຂວງ, ວຽກງານ ນິຕິກໍາ ຂອງແຂວງ ແລະ ວຽກງານ ຂອງສະພາປະຊາຊົນຂັ້ນແຂວງ ຊຶ່ງທັງ 3 ວຽກນີ້ ປະກອບມີ 5 ເນື້ອໃນທີ່ສໍາຄັນ ແລະ ຈະຮັບຮອງເອົາເປັນມະຕິກອງປະຊຸມ ຂອງສະພາປະຊາຊົນຂັ້ນແຂວງ ຈໍານວນ 5 ສະບັບ ລາຍລະອຽດມີດັ່ງນີ້:
1) ວຽກງານ ຂອງອົງການປົກຄອງແຂວງຈະໄດ້ດໍາເນີນເປັນ 2 ວາລະ ຄື: ວາລະ ຂອງການຄົ້ນຄວ້າພິຈາລະນາ ວຽກງານດັ່ງກ່າວ ແລະ ວາລະ ພິຈາລະນາຮັບຮອງເປັນມະຕິ ກອງປະຊຸມ:
– ວາລະການຄົ້ນຄວ້າ ພິຈາລະນາ ວຽກງານອົງການປົກຄອງແຂວງ, ກອງປະຊຸມຈະໄດ້ ຄົ້ນຄວ້າພິຈາລະນາ 3 ເນື້ອໃນທີ່ສໍາຄັນ ຊຶ່ງປະກອບມີ 2 ບົດລາຍງານຄື:
- ບົດລາຍງານ ຂອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;;
- ບົດລາຍງານ ຂອງຫົວໜ້າພະແນກກະສິກໍາແຂວງ ຕາງໜ້າອົງການປົກຄອງແຂວງ ກ່ຽວກັບການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄໍາມ່ວນໄລຍະແຕ່ປິ 2021 ຫາ 2023, ການຈັດຕັ້ງປະຕິບັດວຽກງານດັ່ງກ່າວ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;
– ພ້ອມດຽວກັນນີ້ ໂດຍຕິດພັນກັບບົດລາຍງານ ຂອງອົງການປົກຄອງແຂວງ ກໍຈະມີການຊີ້ແຈງຈາກ 13 ພາກສວ່ນ ຕາມຫົວຂໍ້ສະເພາະ ຫຼື ຄໍາຊັກຖາມ ທີ່ຄະນະປະຈໍາສະພາປະຊາຊົນຂັ້ນແຂວງໄດ້ຕັ້ງຂຶ້ນ ກ່ອນການດໍາເນີນກອງປະຊຸມ ຄື:
(1) ຈາກຂົງເຂດເສດຖະກິດ ປະກອບມີ 8 ພາກສ່ວນຄື: ພະແນກແຜນການ ແລະ ການລົງທືນແຂວງ, ພະແນກການເງິນແຂວງ, ພະແນກກະສິກຳ ແລະ ປ່າໄມ້ແຂວງ, ພະແນກໂຍທາທິການ ແລະ ຂົນສົ່ງແຂວງ, ພະແນກຊັບພະຍາກອນທຳມະຊາດ ແລະ ສີ່ງແວດລ້ອມແຂວງ, ພະແນກອຸດສາຫະກຳ ແລະ ການຄ້າແຂວງ, ພະແນກເຕັກໂນໂລຊີ ແລະ ການສື່ສານແຂວງ, ພະແນກພະລັງງານ ແລະ ບໍ່ແຮ່ແຂວງ,
(2) ຈາກຂົງເຂດວັດທະນະທໍາສັງຄົມ ປະກອບມີ 4 ພາກສວ່ນຄື: ພະແນກສືກສາທິການ ແລະ ກິລາແຂວງ, ພະແນກສາທາລະນະສຸກແຂວງ, ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ ແລະ ພະແນກແຮງງານ ແລະ ສະຫວັດດີການສັງຄົມແຂວງ;
(3) ຈາກຂົງເຂດປ້ອງກັນຊາດ ແລະ ປ້ອງກັນຄວາມສະຫງົບ ມີ 1 ພາກສວ່ນຄື: ກອງບັນຊາການປ້ອງກັນຄວາມສະຫງົບແຂວງ;
ບັນດາພາກສວ່ນຕ່າງໆ ນອກຈາກໄດ້ຊີ້ແຈງຕາມຫົວຂໍ້ສະເພາະແລ້ວ ຍັງຈະໄດ້ຊີ້ແຈງ ຕາມການປະກອບຄຳເຫັນ ຂອງສະມາຊິກສະພາປະຊາຊົນຂັ້ນແຂວງ ທີ່ໄດ້ຍົກຂືຶ້ນໃນວາລະດໍາເນີນກອງປະຊຸມອີກ; ນອກຈາກນີ້ ໃນວາລະທ້າຍ ຂອງຊີ້ແຈງຈາກພາກສ່ວນຕ່າງໆແລ້ວ ກອງປະຊຸມຈະໄດ້ຮັບຟັງການຊີ້ແຈງລວມ ຈາກທ່ານເຈົ້າແຂວງ ໃນຖານະ ຫົວໜ້າອົງການປົກຄອງແຂວງຕື່ມອີກ.
– ວາລະ ການພິຈາລະນາ ຮັບຮອງ ເອົາວຽກງານອົງການປົກຄອງແຂວງ ຊຶ່ງກອງປະຊຸມຈະໄດ້ຮັບຮອງເອົາບົດລາຍງານດັ່ງກ່າວ ເປັນມະຕິກອງປະຊຸມຈໍານວນ 3 ສະບັບ ຄື:
1) ມະຕິ ກອງປະຊຸມສະພາປະຊາຊົນແຂວງຄໍາມ່ວນ ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງຄໍາມ່ວນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ;
2) ມະຕິ ກອງປະຊຸມສະພາປະຊາຊົນແຂວງຄໍາມ່ວນ ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງຄໍາມ່ວນ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ;
3) ມະຕິ ກອງປະຊຸມສະພາປະຊາຊົນແຂວງຄໍາມ່ວນ ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງ ກ່ຽວກັບ ການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄໍາມ່ວນ ໄລຍະແຕ່ປິ 2021-2023, ການຈັດຕັ້ງປະຕິບັດວຽກງານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;
2) ວຽກງານ ນິຕິກໍາ ຂອງແຂວງຈະໄດ້ດໍາເນີນເປັນ 2 ວາລະ ຄື: ວາລະ ຂອງການຄົ້ນຄວ້າພິຈາລະນາ ວຽກງານດັ່ງກ່າວ ແລະ ວາລະ ພິຈາລະນາຮັບຮອງເປັນມະຕິ ກອງປະຊຸມ:
– ວາລະການຄົ້ນຄວ້າ ພິຈາລະນາ ວຽກງານວຽກງານນິຕິກໍາ ຂອງແຂວງ ກອງປະຊຸມຈະໄດ້ ຄົ້ນຄວ້າພິຈາລະນາ ວຽກງານນິຕິກໍາ ຂອງແຂວງ ຊຶ່ງມີ 1 ເນື້ອໃນ ແລະ 1 ບົດລາຍງານຄື: ບົດລາຍງານ ຂອງອົງການປົກຄອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດ ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງນໍາໃຊ້ ທີ່ດິນກະສິກໍາຢູ່ແຂວງຄໍາມ່ວນ ສະບັບເລກທີ 333/ຈຂ.ຄມ, ລົງວັນທີ 03 ມີນາ 2020;
– ວາລະການພິຈາລະນາ ຮັບຮອງ ເອົາວຽກງານນິຕິກໍາ ຂອງແຂວງ, ກອງປະຊຸມ ຈະໄດ້ພິຈາລະນາ ຮັບຮອງເອົາບົດລາຍງານດັ່ງກ່າວ ເປັນມະຕິກອງປະຊຸມຈໍານວນ 1 ສະບັບຄື: ມະຕິ ກອງປະຊຸມສະພາປະຊາຊົນແຂວງຄໍາມ່ວນ ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງຄໍາມ່ວນ ກ່ຽວກັບການປະເມີນຜົນການຈັດຕັ້ງປະຕິບັດ ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງນໍາໃຊ້ ທີ່ດິນກະສິກໍາຢູ່ແຂວງຄໍາມ່ວນ ສະບັບເລກທີ 333/ຈຂ.ຄມ, ລົງວັນທີ 03 ມີນາ 2020;
3) ວຽກງານ ຂອງສະພາປະຊາຊົນຂັ້ນແຂວງຈະໄດ້ດໍາເນີນເປັນ 2 ວາລະ ຄື: ວາລະ ຂອງການຄົ້ນຄວ້າພິຈາລະນາ ວຽກງານດັ່ງກ່າວ ແລະ ວາລະ ພິຈາລະນາຮັບຮອງເປັນມະຕິ ກອງປະຊຸມ:
– ວາລະການຄົ້ນຄວ້າ ພິຈາລະນາ ວຽກງານຂອງສະພາປະຊາຊົນຂັ້ນແຂວງ, ກອງປະຊຸມຈະໄດ້ ຄົ້ນຄວ້າ ພິຈາລະນາ ວຽກງານ ຂອງສະພາປະຊາຊົນຂັ້ນແຂວງ ຈໍານວນ 1 ເນື້ອໃນ ມີ 1 ບົດລາຍງານຄື: ບົດລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດແຜນການ ເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວວຽກງານໄລຍະແຕ່ກອງປະຊຸມສະໄໝສາມັນເທື່ອທີ 7 ຫາກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II;
– ວາລະການພິຈາລະນາ ຮັບຮອງ ເອົາວຽກງານສະພາປະຊາຊົນຂັ້ນແຂວງ, ກອງປະຊຸມ ຈະໄດ້ພິຈາລະນາ ຮັບຮອງເອົາບົດລາຍງານດັ່ງກ່າວ ເປັນມະຕິກອງປະຊຸມຈໍານວນ 1 ສະບັບ ຄື: ມະຕິ ກອງປະຊຸມສະພາປະຊາຊົນແຂວງຄໍາມ່ວນ ວ່າດ້ວຍການຮັບຮອງເອົາບົດລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດແຜນການ ເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມສະໄໝສາມັນເທື່ອທີ 6 ຫາກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວວຽກງານໄລຍະແຕ່ກອງປະຊຸມສະໄໝສາມັນເທື່ອທີ 7 ຫາກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II;
ອີກເທື່ອໜຶ່ງ, ໃນນາມຕາງໜ້າໃຫ້ຄະນະປະຈຳສະພາປະຊາຊົນແຂວງຄຳມ່ວນ, ຂ້າພະເຈົ້າ ຂໍເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ກະສິກອນ-ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງ ຈົ່ງຕິດຕາມກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້, ໃນໄລຍະດຳເນີນກອງປະຊຸມ, ຄະນະເລຂາທິການສະພາປະຊາຊົນຂັ້ນແຂວງ ໄດ້ຈັດຕັ້ງຄະນະຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ, ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງສາຍດ່ວນຂອງກອງປະຊຸມ ໝາຍເລກໂທລະສັບ 051 156 ໂດຍບໍ່ເສຍຄ່າ.
ທ້າຍນີ້ ຂ້າພະເຈົ້າຂໍອວຍພອນໄຊອັນປະເສີດ ແດ່ບັນດາທ່ານທີ່ຕິດຕາມຮັບຊົມ ແລະ ຮັບຟັງ ຈົ່ງມີ ສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ປະສົບຜົນສຳເລັດໃນໜ້າທີ່ວຽກງານອັນມີກຽດສະຫງ່າຂອງຕົນ ພ້ອມກັນປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ ຂຶ້ນໄປເລື້ອຍໆ.
(ຂໍຂອບໃຈ)