ເມື່ອບໍ່ດົນມານີ້ ​ທ່ານ​ ນາງ​ ແສງອາລຸນ​ ວົງສາທິການ​ ເລຂາທິການ​ສະພາປະຊາຊົນແຂວງ​ ຕາງໜ້າຄະນະປະຈໍາສະພາປະຊາຊົນແຂວງ ໄດ້ຖະແຫຼງຂ່າວກ່ຽວກັບ ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II:  ເຊິ່ງຈະໄດ້ໄຂຂຶ້ນໃນຕອນເຊົ້າຂອງມື້ວັນ ຄານ ວັນທີ 16 ມັງກອນ 2024 ແລະ ຈະດໍາເນີນໄປເຖິງວັນ ສຸກວັນທີ 19 ມັງກອນ 2024 ທີ່ຫ້ອງປະຊຸມສະພາປະຊາຊົນແຂວງອັດຕະປື ຊຶ່ງຈະໃຊ້ເວລາດໍາເນີນກອງປະຊຸມ ທັງໝົດ 04 ວັນ ຄາດວ່າຈະມີຜູ້ເຂົ້າຮ່ວມທັງໝົດປະມານ 100 ປາຍກວ່າທ່ານ.

ກອງປະຊຸມ, ຈະໄດ້ຮັບຟັງການລາຍງານພ້ອມທັງ ພິຈາລະນາ ແລະ ຮັບຮອງບັນຫາສຳຄັນຕ່າງໆ ມີດັ່ງນີ້:

1)   ພາກວຽກງານ ຂອງອົງການປົກຄອງແຂວງ

ຮັບຟັງບົດລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບບັນຫາທີ່ພົ້ນເດັ່ນ ຂອງແຂວງປະຈໍາປີ 2023 ແລະ ທິດທາງແຜນການປະຈໍາປີ 2024;

ຮັບຟັງບົດລາຍງານ ຂອງພະແນກແຜນການ ແລະການລົງທຶນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2023 ແລະ ທິດທາງແຜນການ ປະຈໍາປີ 2024;

ຮັບຟັງບົດລາຍງານພະແນກການເງິນແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024;

ຮັບຟັງບົດລາຍງານ ກ່ຽວກັບຄວາມຄືບໜ້າໃນການ ຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດການເງີນ ແລະ ການແກ້ໄຂບັນຫາຢາເສບຕິດ ຢູ່ແຂວງ ອັດຕະປື;

ຮັບຟັງການລາຍງານພິຈາລະນາ ຮັບຮອງເອົາການຍົກຍ້າຍ ແລະ ແຕ່ງຕັ້ງເຈົ້າແຂວງ ແລະ ການພິຈາລະນາຮັບຮອງເອົາການປັບປຸງໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງແຂວງ ຕາມການສະເໜີຂອງເຈົ້າແຂວງ.

2)  ພາກວຽກງານ ຂອງອົງການກວດສອບ ແລະ ອົງການກວດກາລັດແຂວງ

ບົດລາຍງານການເຄື່ອນໄຫວວຽກງານ ປະຈໍາປິ 2023 ແລະ ທິດທາງແຜນການ ປະຈໍາປີ 2024 ຂອງອົງການກວດສອບປະຈໍາພາກໃຕ້; ລາຍງານຜົນກວດສອບຄືນ ການແກ້ໄຂຜົນການກວດສອບ ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງ ອັດຕະປື ປະຈໍາປີ 2022;

ບົດລາຍງານການເຄື່ອນໄຫວວຽກງານ ປະຈໍາປິ 2023 ແລະ ທິດທາງແຜນການ ປະຈໍາປີ 2024 ຂອງອົງການກວດກາລັດແຂວງ; ລາຍງານຜົນການກວດກາຄືນຜົນການກວດສອບ (ຕາມມະຕິ ກອງປະຊຸມສະພາປະຊາຊົນແຂວງ ສະບັບເລກທີ 06/ສພຂ ລົງວັນທີ 23 ກຸມພາ 2023); ລານງານຜົນການກວດກາການແກ້ໄຂ ຕາມຜົນການກວດສອບ ໃນໄລຍະປີ 2014-2020; ລາຍງານຜົນການກວດກາຄືນ ການແກ້ໄຂຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ປະຈໍາປີ 2021.

3)  ພາກວຽກງານ ຂອງອົງການໄອຍະການປະຊາຊົນ ແລະ ສານປະຊາຊົນແຂວງ

ບົດລາຍງານ ກ່ຽວກັບການຈັດຕັ້ງປະຕິບັດເຄື່ອໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງອົງການໄອຍະການປະຊາຊົນແຂວງ;

ບົດລາຍງານ ກ່ຽວກັບການຈັດຕັ້ງປະຕິບັດເຄື່ອໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງສານປະຊາຊົນແຂວງ.

4)   ພາກວຽກງານ ຂອງສະພາປະຊາຊົນຂັ້ນແຂວງ

ບົດລາຍງານ ການຈັດຕັ້ງປະຕິບັດເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປີ 2024 ຂອງສະພາປະຊາຊົນຂັ້ນແຂວງ.

ນອກຈາກນີ້, ໃນລະຫວ່າງການ​ດຳ​ເນີນກອງປະຊຸມ ຍັງຈະໄດ້​ຮັບ​ຟັງ​ການຊີ້ແຈງ​ເພີ້ມ​ເຕີມຕໍ່ຄໍາຊັກຖາມຂອງຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງ​ຈາກ​ ພະແນກການເງິນແຂວງ, ພະແນກແຜນການ ແລະ ການລົງທຶນ, ພະແນກແຮງງານ ແລະສະຫວັດດີການສັງຄົມ, ພະແນກ ຖະແຫູງຂ່າວວັດຖະນະທໍາ ແລະ ທ່ອງທ່ຽວ, ພະແນກສືກສາ ແລະ ກິລາ, ພະແນກສາທາລະນະສຸກ

ໃນນາມຄະນະປະຈໍາສະພາປະຊາຊົນແຂວງ, ຂ້າພະເຈົ້າຂໍເຊີນຊວນບັນດາທ່ານພະນັກງານ-ລັດຖະກອນ, ກອງບັນຊາການປ້ອງກັນຊາດ-ປ້ອງກັນຄວາມສະຫງົບ, ນັກຮຽນຮູ້, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ, ຜູ້ມີສິດເລືອກຕັ້ງ ໃນທົ່ວແຂວງ ອັດຕະປື  ຈົ່ງໄດ້ພ້ອມກັນໃຫ້ຄວາມສໍາຄັນຕິດຕາມການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II ຄັ້ງນີ້

ໃນໄລຍະດໍາເນີນກອງປະຊຸມນີ້ ຄະນະເລຂາທິການສະພາປະຊາຊົນແຂວງ ໄດ້ຈັດຕັ້ງໜ່ວຍງານຮັບຜິດ ຊອບໂທລະສັບສາຍດ່ວນ 036 156 ເພື່ອຮັບເອົາຄໍາຄິດ, ຄໍາເຫັນ ແລະ ຄໍາສະເໜີໂດຍກົງຈາກປະຊາຊົນ ແລະ ຕິດຕາມການຖ່າຍທອດສົດສຽງ ຜ່ານລະບົບ FM 102.4 mhz ຂອງແຂວງ. ທັງນີ້ກໍເພື່ອເຮັດໃຫ້ການດໍາເນີນກອງປະຊຸມໃນຄັ້ງນີ້ ເຕັມໄປດ້ວຍບັນຍາກາດ ການມີສ່ວນຮ່ວມ ແລະ ມີປະຊາທິປະໄຕຢ່າງກວ້າງຂວາງ, ປະກອບສ່ວນເຂົ້າໃນການປະຕິບັດພາລະບົດບາດ,​ ສິດ ແລະ ໜ້າທີ່ຂອງສະ ພາປະຊາຊົນແຂວງ ກໍຄືອົງການຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າຊາວແຂວງ ອັດຕະປື  ໃຫ້ນັບມື້ນັບມີຄວາມເຂັ້ມແຂງ.

ທ້າຍສຸດນີ້ ຂ້າພະເຈົ້າຕາງໜ້າໃຫ້ແກ່ຄະນະປະຈໍາ ສະພາປະຊາຊົນແຂວງ ອັດຕະປື ຂໍສະແດງຄວາມຂອບໃຈມາຍັງນັກຂ່າວ ສື່ມວນຊົນຂອງແຂວງ ທີ່ໃຫ້ຄວາມຮ່ວມມືໃນການຖ່າຍທຳ ພິທີຖະແຫຼງການໃຫ້ໄດ້ອອກອາກາດຜ່ານສື່ຕ່າງໆໃນມື້ນີ້ ແລະ ເນື່ອງໃນໂອກາດສົ່ງທ້າຍປີເກົ່າ 2023 ຕ້ອນຮັບປີໃໝ່ 2024 ນີ້ຂໍອວຍພອນໄຊອັນປະເສີດມາຍັງຜູ້ນໍາພັກ-ລັດ, ພະນັກງານ, ກອງບັນຊາການປ້ອງກັນຊາດ-ປ້ອງກັນຄວາມສະຫງົບ, ພໍ່ແມ່ປະຊາຊົນຜູ້ມີສິດເລືອກຕັ້ງທຸກຊັ້ນຄົນທົ່ວແຂວງອັດຕະປືຂອງພວກເຮົາ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ປະສົບຜົນສໍາເລັດໃນໜ້າທີ່ວຽກງານທຸກປະການ.

(ວິນັດ)