ໃນຕອນເຊົ້າຂອງວັນທີ 02 ສິງຫາ 2022 ທ່ານ ຄຳຫລ້າ ສີສຸວົງ ຄະນະປະຈໍາ , ເລຂາທິການສະພາປະຊາຊົນແຂວງວຽງຈັນ. ໄດ້ຖະແຫຼງຂ່າວການດໍາເນີນກອງປະຊຸມສະໄໝສາ ມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ II.
ໂດຍປະຕິບັດຕາມ ມາດຕາ 60 ຂອງກົດໝາຍ ວ່າດ້ວຍ ການປັບປຸງບາງມາດຕາກົດໝາຍ ສະ ພາແຫ່ງຊາດ ແລະສະພາປະຊາຊົນຂັ້ນແຂວງ ກ່ຽວກັບການດໍາເນີນກອງປະຊຸມສະໄໝສາມັນປະຈໍາ 6 ເດືອນຂອງສະພາປະຊາຊົນຂັ້ນແຂວງ, ກໍ່ຄືພາລະບົດບາດ, ສິດ ແລະ ໜ້າທີ່ ຂອງຄະນະປະຈຳສະພາປະຊາຊົນຂັ້ນແຂວງ ຕາມທີ່ໄດ້ກຳນົົດໄວ້ໃນກົດໝາຍ ວ່າດ້ວຍສະພາປະຊາຊົນຂັ້ນແຂວງ ໃນການຮຽກໂຮມ ແລະ ນຳພາດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II.
ເພື່ອປະຕິບັດຕາມເນື້ອໃນຈິດໃຈ ດັ່ງກ່າວ ຄະນະປະຈຳສະປະຊາຊົນແຂວງ, ບັນດາຄະນະກຳມະການ, ຄະນະເລຂາທິກາານສະພາປະຊາຊົນແຂວງ ແລະ ກົງຈັກທີ່ຄະນະປະຈຳສະພາປະຊາຊົນແຂວງສ້າງຕັ້ງ ໄດ້ປະສານສົມທົບ ກັບອົງການປົກຄອງແຂວງ, ສານປະຊາຊົນແຂວງ, ໄອຍະການປະຊາຊົນແຂວງ, ບັນດາພະແນກການ ແລະ ອົງການທີ່ກ່ຽວຂ້ອງ ກະກະກຽມເນື້ອໃນ ທີ່ຈະນຳສະເໜີຕໍ່ກອງປະ ຊຸມໃນຄັ້ງນີ້. ມາເຖິງປະຈຸບັນ ເຫັນວ່າການກະກຽມເນື້ອໃນແມ່ນຄົບຖ້ວນ, ຮອບດ້ານ , ສ່ອດຄ່ອງກັບກົດໝາຍ ແລະ ນິຕິກຳໃຕ້ກົດໝາຍແລ້ວ.
ຂ້າພະເຈົ້າ, ເລຂາທິການສະພາປະຊາຊົນແຂວງ, ຫົວໜ້າກອງເລຂານຸການກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ຂໍຕາງໜ້າໃຫ້ແກ່ຄະນະປະຈໍາສະພາປະຊາຊົນແຂວງ ມີຄວາມຍິນດີ ແລະ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານ ການນໍາພັກ-ລັດ, ພະນັກງານທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ຜູ້ປະກອບການ, ພໍ່ແມ່ພີ່ນ້ອງປະຊາຊົນລາວບັນດາເຜົ່າ, ຊາວຕ່າງດ້າວ, ທີ່ດໍາລົງຊີວິດຢູ່ພາຍໃນແຂວງວຽງຈັນ ຊາບ ກ່ຽວກັບການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທິ II ດັ່ງນີ້:
ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທິ II ຈະໄດ້ໄຂຂື້ນຢ່າງເປັນທາງການ, ໃນຕອນເຊົ້າ ຂອງວັນທີ 10 ສິງຫາ 2022 ແລະ ຈະໄດ້ດໍາເນີນເຖິງວັນທີ 12 ສິງຫາ 2022 ຢູ່ທີ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງ ເຊິ່ງຈະໃຊ້ເວລາດໍາເນີນກອງປະຊຸມເປັນເວລາ 03 ວັນ, ພາຍໃຕ້ການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 10, ປະທານສະພາປະຊາຊົນແຂວງວຽງຈັນ.
ກອງປະຊຸມສະໄໝສາມັນຄັ້ງນີ້ ຈະໄດ້ສຸມໃສ່ພິຈາລະນາ ແລະ ຮັບຮອງເອົາບັນຫາສຳຄັນຂອງແຂວງ ພ້ອມທັງປະກອບຄໍາຄິດ ຄຳເຫັນ, ຊັກຖາມຕໍ່ບົດລາຍງານ ແລະ ການປະຕິບັດໜ້າທີ່ຕ່າງໆຂອງອົງການປົກຄອງທ້ອງຖິ່ນດັ່ງນີ້:
- ວຽກງານອົງການປົກຄອງແຂວງ.
- ບົດລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂອງແຂວງ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ບົດລາຍງານ ຂອງຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ແລະ ທິດທາງແຜນການທ້າຍປີ 2022.
- ບົດລາຍງານ ຂອງຫົວໜ້າພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ບົດລາຍງານ ຄວາມຄືບໜ້າໃນການຈັດຕັ້ງປະຕິບັດ 2 ວາລະແຫ່ງຊາດ ຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຢູ່ແຂວງວຽງຈັນ.
- ບົດລາຍງານຂອງຫົວໜ້າພະແນກອຸດສາຫະກຳ ແລະ ການຄ້າແຂວງ ກ່ຽວກັບການຄຸ້ມຄອງລາຄາສິນຄ້າຍຸດທະສາດ( ນໍ້າມັນເຊື້ອໄຟ ແລະ ສິນຄ້າບໍລິໂພກ ) .
- ວຽກງານ ຂອງອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທຳແຂວງ.
- ບົດລາຍງານຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ທີ່ພົ້ນເດັ່ນ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ບົດລາຍງານຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ບົດລາຍງານ ຂອງພະແນກຍຸຕິທຳແຂວງ ກ່ຽວກັບການຈັດຕັ້ງປະຕິບັດຄຳຕັດສິນ ຂອງສານ ທີ່ໃຊ້ໄດ້ຢ່າງເດັດຂາດ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022.
- ວຽກງານສະພາປະຊາຊົນແຂວງ.
ບົດລາຍງານການເຄື່ອນໄຫວວຽກງານນັບແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຸດທີ II .
- ມະຕິກອງປະຊຸມສະພາປະຊາຊົນແຂວງ
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານ ການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ແລະ ທິດທາງແຜນການ6 ເດືອນທ້າຍປີ 2022.
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານ ການຈັດຕັ້ງປະ ຕິບັດແຜນງົບປະມານແຫ່ງລັດ ຂອງແຂວງ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍ ປີ 2022.
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານການເຄື່ອນໄຫວວຽກງານນັບແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຸດທີ II .
ອີກເທື່ອໜຶ່ງ, ໃນນາມຕາງໜ້າໃຫ້ແກ່ຄະນະປະຈຳສະພາປະຊາຊົນແຂວງ, ຂ້າພະເຈົ້າ ຂໍເຊີນ ຊວນມາຍັງທຸກພາກສ່ວນ, ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກຳ ມະກອນ, ຊາວຜູ້ອອກແຮງງານ, ຜູ້ປະກອບການ, ພໍ່ແມ່ພີ່ນ້ອງປະຊາຊົນລາວບັນດາເຜົ່າ, ຊາວຕ່າງດ້າວ, ທີ່ດໍາລົງຊີວິດ ຢູ່ແຂວງວຽງຈັນ ຈົ່ງໄດ້ຕິດຕາມ, ສະໜັບສະໜູນ, ໃຫ້ຄວາມຮ່ວມມື ແລະ ປະກອບສ່ວນສົ່ງຄໍາຄິດຄໍາເຫັນ, ຄໍາສະເໜີໂດຍກົງ ເຖິງກອງປະຊຸມຂອງພວກເຮົາໄດ້ ໂດຍຜ່ານໂທລະສັບສາຍດ່ວນໝາຍເລກ: 023 156 (ບໍ່ໄດ້ເສຍຄ່າໂທ) ຫຼື ຈະຂຽນເປັນໂທລະສານສົ່ງມາຍັງກອງປະຊຸມ ຕາມວາລະດໍາເນີນກອງປະຊຸມກໍ່ໄດ້ ພວກເຮົາໄດ້ແຕ່ງຕັ້ງໜ່ວຍງານຮັບຜິດ ຊອບຄອຍຮັບໃຊ້ການບໍລິການທ່ານໃນໂມງລັດຖະການ.
ທ້າຍນີ້ ຂ້າພະເຈົ້າຫວັງຢ່າງຍິ່ງວ່າ ບັນດາທ່ານຄົງຈະໃຫ້ການຮ່ວມມືສະໜັບສະໜູນ ຕິດຕາມ ການດຳເນີນກອງປະຊຸມໃນຄັ້ງນີ້ດ້ວຍ ຂໍອວຍພອນແດ່ທຸກໆທ່ານ ຈົ່ງມີສຸຂະພາບເຂັ້ມແຂງ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ປະສົບຜົນສໍາເລັດໃນໜ້າທີ່ວຽກງານທຸກປະການ.
(ຂໍຂອບໃຈ).