ຕອນແລງວັນທີ 27 ທັນວາ 2024 ນີ້ທີ່ສະໂມສອນແຂວງຫລວງນ້ຳທາ ໄດ້ຖະແຫລງຜົນສຳເລັດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ເຊິ່ງໄດ້ດໍາເນີນມາເປັນເວລາ 4 ວັນເຕັມ ແລະ ອັດລົງໃນຕອນເເລງວັນທີ 27 ທັນວາ 2024 ດ້ວຍຜົນສໍາເລັດອັນຈົບງາມ.
ກອງປະຊຸມຄັ້ງນີ້ ບັນດາທ່ານສະມາຊິກສະພາປະຊາຊົນແຂວງ ໄດ້ເອົາໃຈໃສ່ຍົກສູງຄວາມຮັບຜິດຊອບຂອງຕົນ ສຸມທຸກສະຕິປັນຍາ ເຂົ້າໃນການຄົ້ນຄວ້າ, ພິຈາລະນາ, ຮັບຮອງເອົາບັນຫາສໍາຄັນຕ່າງໆຂອງແຂວງ ແລະ ໄດ້ອອກມະຕິກອງປະຊຸມຈໍານວນ 8 ສະບັບຄື: ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານກ່ຽວກັບ ການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2024 ແລະ ແຜນການປີ 2025 ຂອງແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງບົດລາຍງານກ່ຽວກັບ ການ ຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2024 ແລະ ແຜນການ ປີ 2025 ຂອງແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງອົງການກວດກາລັດແຂວງ ກ່ຽວກັບການເຄື່ນໄຫວວຽກງານ ປະຈ າປີ 2024, ແຜນການ ປະຈໍາປີ 2025 ແລະ ຜົນການຕິດຕາມກວດກາ ຕາມຜົນຂອງການກວດສອບ ປີ 2022; ບົດລາຍງານຂອງອົງການກວດສອບປະຈໍາພາກເໜືອ ກ່ຽວກັບການເຄື່ອນໄຫວວຽກງານ ປະຈໍາປີ 2024, ແຜນການ ປະຈໍາປີ 2025 ແລະ ຜົນການກວດສອບບົດສະຫຼຸບຂາດຕົວ ການຈັດຕັົ້ງປະຕິບັດແຜນງົບປະມານຂອງແຂວງຫຼວງນໍ້າທາ ປະຈໍາປີ 2023; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາບົດລາຍງານກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2024 ແລະ ແຜນການປີ 2025 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານກ່ຽວກັບ ການຈັດຕັ້ງປະຕິບັດແຜນເຄື່ອນໄຫວວຽກງານ ປະຈໍາປີ 2024 ແລະ ແຜນການ ປະຈໍາປີ 2025 ຂອງສະພາປະຊາຊົນແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນສົ່ງເສີມ ແລະ ພັດທະນາກິລາກາຍຍະກໍາຂອງແຂວງ (ສະບັບປັບປຸງ); ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ (ສະບັບປັບປຸງ); ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານກ່ຽວກັບ ການຈັດຕັ້ງປະຕິບັດແຜນຟື້ນຟູ-ປັບປຸງຊີວິດການເປັນຢູ່ ຂອງປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າທາ 1 ເມືອງນາແລ ໄລຍະທີ 1 (2020-2023) ແລະ ແຜນ ການໄລຍະທີ 2 (2025-2028).
ໂອກາດນີ້ ຕາງໜ້າຄະນະປະຈໍາສະພາປະຊາຊົນແຂວງ ຍັງໄດ້ຂໍຂອບໃຈມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ປະຊາຊົນບັນດາເຜົ່າທຸກຊັ້ນຄົນພາຍໃນທົ່ວແຂວງຫຼວງນໍ້າທາ ທີ່ໄດ້ຕິດຕາມການດຳເນີນກອງປະຊຸມຄັ້ງນີ້ ແລະ ສະແດງຄວາມຊົມເຊີຍມາຍັງ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຫລວງນໍ້າທາ; ໂທລະພາບແຫ່ງຊາດ; ໂທລະພາບປ້ອງກັນຊາດ-ປ້ອງກັນຄວາມສະຫງົບ ແລະ ສື່ສິ່ງພິມທຸກປະເພດທັງພາກລັດ ແລະ ເອກະຊົນ ທີ່ໄດ້ເອົາໃຈໃສ່ຕິດຕາມ, ເກັບກໍາ ແລະ ເຜີຍແຜ່ຂ່າວສານຢ່າງທັນການ ໃຫ້ສັງຄົມໄດ້ຮັບຊາບຢ່າງທົ່ວເຖິງກັນ.
ໂດຍ ນາງ ວັນນີ ແຝງບົວວັນ