ຕອນບ່າຍຂອງວັນທີ 23 ພຶດສະພາ 2023 ນີ້ ທ່ານ ມີໄຊ ມີວິໄລ ກຳມະການຄະນະປະຈໍາສະພາປະຊາຊົນແຂວງ,ເລຂາທິການສະພາປະຊາຊົນແຂວງຫຼວງນໍ້າທາ ໄດ້ຖະແຫຼງກ່ຽວກັບຜົນສຳເລັດກອງປະຊຸມສະໄໝວິສາມັນຄັ້ງທີ 3 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ກອງປະຊຸມດັ່ງກ່າວໄດ້ໄຂຂຶ້ນໃນຕອນເຊົ້າຂອງວັນທີ 23 ພຶດສະພາ 2023 ເຊິ່ງໄດ້ຮັບຟັງການລາຍງານ ແລະ ພິຈາລະນາ ຮັບຮອງເອົາ ບັນຫາສໍາຄັນພື້ນຖານຂອງແຂວງ ດັ່ງນີ້: ກອງປະຊຸມ ໄດ້ຮັບຟັງການລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບ ການພິຈາລະນາ, ຮັບຮອງເອົາ ຮອງເຈົ້າແຂວງ, ປະທານອົງການກວດກາລັດແຂວງ, ເຈົ້າເມືອງ ແລະ ຫົວໜ້າອົງການໄອຍະການປະຊາຊົນ ເຂດ-1 ແຂວງຫຼວງນໍ້າທາ ໃນໄລຍະທີ່ສະພາປະຊາຊົນແຂວງ ບໍ່ໄດ້ດໍາເນີນກອງປະຊຸມສະໄໝສາມັນ ແລະ ວິສາມັນ; ໄດ້ພິຈາລະນາ, ຮັບຮອງເອົາ ບຸກຄະລາກອນຂອງແຂວງ ຕາມການສະເໜີຂອງ ເຈົ້າແຂວງ ຈໍານວນ 6 ຄືໄດ້ຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງ ທ່ານ ຄໍາລາ ຂານສະຫງ່າ ກໍາມະການພັກແຂວງ, ຫົວໜ້າພະແນກໂຍທາທິການ ແລະ ຂົນສົ່ງ ເປັນຫົວໜ້າພະແນກອຸດສາຫະກໍາ ແລະ ການຄ້າແຂວງ;ພິຈາລະນາ ຮັບຮອງເອົາການສະເໜີຍົກຍ້າຍ ທ່ານ ຄໍາເພັດ ຈັນທະວົງ ກໍາມະການພັກແຂວງ, ຫົວໜ້າຫ້ອງວ່າການແຂວງ ໄປຮັບໜ້າທີ່ໃໝ່ຢູ່ເມືອງລອງ;ພິຈາລະນາ ຮັບຮອງເອົາການສະເໜີ ຍົກຍ້າຍ ແລະ ແຕ່ງຕັ້ງ ທ່ານ ພູນແກ້ວ ເຫຼົາອິນ ກໍາມະການພັກແຂວງ, ຫົວໜ້າພະແນກເຕັກໂນໂລຊີ ແລະ ການສື່ສານ ເປັນຫົວໜ້າພະແນກໂຍທາທິການ ແລະ ຂົນສົ່ງແຂວງ;ພິຈາລະນາ ຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງ ທ່ານ ວັນທາ ພົມວິໄລ ຫົວໜ້າພະແນກອຸດສາຫະກໍາ ແລະ ການຄ້າ ເປັນຫົວໜ້າພະແນກເຕັກໂນໂລຊີ ແລະ ການສື່ສານແຂວງ;ພິຈາລະນາ ຮັບຮອງເອົາການສະເໜີແຕ່ງຕັ້ງ ທ່ານ ຕຽງສະໝອນ ພອນປະເສີດ ກໍາມະການພັກແຂວງ, ເປັນຫົວໜ້າພະແນກສາທາລະນະສຸກແຂວງ;ພິຈາລະນາ ຮັບຮອງເອົາການສະເໜີແຕ່ງຕັ້ງ ທ່ານ ບຸນມາ ພັນດາວົງ ກໍາມະການພັກແຂວງເປັນຫົວໜ້າຫ້ອງວ່າການແຂວງ.
ໃນນາມຄະນະປະຈຳສະພາປະຊາຊົນແຂວງ, ເລຂາທິການສະພາປະຊາຊົນແຂວງ ສະແດງຄວາມຂອບໃຈມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງຫຼວງນໍ້າທາ ທີ່ໄດ້ຕິດຕາມການດຳເນີນກອງປະຊຸມສະໄໝວິສາມັນຄັ້ງ 3 ຂອງສະພາປະຊາຊົນແຂວງຫຼວງນ້ໍາທາ ຊຸດທີ II ແລະ ສະແດງຄວາມຊົມເຊີຍມາຍັງ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງນໍ້າທາ; ໂທລະພາບແຫ່ງຊາດ; ໂທລະພາບປ້ອງກັນຊາດ-ປ້ອງກັນຄວາມສະຫງົບ ແລະ ສື່ສິ່ງພິມທຸກປະເພດທັງພາກລັດ ແລະ ເອກະຊົນ ທີ່ໄດ້ເອົາໃຈໃສ່ຕິດຕາມ, ເກັບກຳ ແລະ ເຜີຍແຜ່ຂ່າວສານຢ່າງທັນການ ໃຫ້ສັງຄົມໄດ້ຮັບຊາບຢ່າງທົ່ວເຖິງກັນ.
ໂດຍ ນາງ ອຳພອນ ສີປະເສີດ