ຕອນເຊົ້າຂອງວັນທີ 23 ທັນວາ 2024 ທີ່ສະພາປະຊາຊົນແຂວງຫລວງນ້ຳທາ ທ່ານ ມີໄຊ ມີວິໄລ ກໍາມະການຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ ຕາງໜ້າໃຫ້ສະມາຊິກສະພາປະຊາຊົນແຂວງ ໄດ້ຖະແຫລງຂ່າວ ເປີດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ II; ທ່ານໃຫ້ຮູ້ວ່າກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຫລວງນໍ້າທາ ຊຸດທີ II ຈະໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 24 ທັນວາ 2024 ເຊິ່ງຈະດໍາເນີນຮອດວັນທີ 27 ທັນວາ 2024 ເປັນເວລາ 4 ວັນຈື່ງຈະສໍາເລັດ; ແລະ ປະຊຸມຄັ້ງນີ້ຈະໄດ້ຮັບຟັງ ແລະ ສຸມໃສ່ພິຈາລະນາ, ຮັບຮອງເອົາບັນດາເນື້ອໃນທີ່ສໍາຄັນຄືຮັບຟັງບົດລາຍງານໂດຍສັງເຂບກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນໄລຍະໜຶ່ງປີທີ່ຜ່ານມາ ແລະ ທິດທາງແຜນການປະຈຳປີ 2025; ບົດລາຍງານແຜນການຈັດສັນການລົງທຶນຂອງລັດປີ 2025 ຂອງແຂວງ; ບົດລາຍງານແຜນຄາດຄະເນການຈັດສັນງົບປະມານປະຈໍາປີ 2025 ຂອງແຂວງ;ບົດລາຍງານການເຄື່ອນໄຫວວຽກງານກວດກາປະຈໍາປິ 2024 , ທິດທາງແຜນການປີ 2025 ແລະ ຜົນການກວດກາຕາມຜົນການກວດສອບປີ 2022; ບົດລາຍງານການຈັດຕັ້ງປະຕິບັດແຜນການເຄື່ອນໄຫວປະຈໍາປີ 2024, ທິດທາງແຜນການປະຈໍາປີ 2025 ຂອງອົງການກວດສອບປະຈຳພາກເໜືອ2 ແລະ ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2023 ຂອງແຂວງ; ບົດລາຍງານກ່ຽວກັບການຈັດຕັ້ງປະຕິບັດແຜນຟື້ນຟູປັບປຸງຊີວິດການເປັນຢູ່ຂອງປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳທາ1 ເມືອງນາແລ ໄລຍະທີ1 (2020-2023)ແລະ ແຜນການໄລຍະທີ2 (2024-2027); ບົດລາຍງານກ່ຽວກັບຜົນກະທົບຈາກໄພພິບັດນ້ຳຖ້ວມຢູ່ແຂວງຫຼວງນໍ້າທາ; ບົດລາຍງານຫຍໍ້ກ່ຽວກັບການປັບປຸງຂໍ້ຕົກລົງຂອງເຈົ້າແຂວງວ່າດ້ວຍກອງທຶນສົ່ງເສີມ ແລະ ພັດທະນາກິລາກາຍະກຳຂອງແຂວງ; ບົດລາຍງານໂດຍຫຍໍ້ກ່ຽວກັບການປັບປຸງຂໍ້ຕົກລົງຂອງເຈົ້າແຂວງວ່າດ້ວຍກອງທຶນຢາເສບຕິດ; ບົດລາຍງານການຈັດຕັ້ງປະຕິບັດວຽກງານປະຈຳປີ 2024 ແລະ ທິດທາງແຜນການປະຈໍາປີ 2025 ຂອງອົງການໄອຍະການປະຊາຊົນແຂວງ;ບົດລາຍງານການຈັດຕັ້ງປະຕິບັດວຽກງານປະຈຳປີ 2024 ແລະ ທິດທາງແຜນການປະຈໍາປີ 2025 ຂອງສານປະຊາຊົນແຂວງ; ບົດລາຍງານກ່ຽວກັບການເຄື່ອນໄຫວວຽກງານຂອງຄະນະປະຈຳສະພາປະຊາຊົນແຂວງໃນລະຫວ່າງສອງກອງປະຊຸມ;ບົດລາຍງານການເຄື່ອນໄຫວວຽກງານປະຈຳປີ 2024 ແລະ ແຜນການປະຈໍາປີ 2025 ຂອງສະພາປະຊາຊົນແຂວງ;ພ້ອມນັ້ນ ໃນນາມຄະນະປະຈຳສະພາປະຊາຊົນແຂວງ, ເລຂາທິການສະພາປະຊາຊົນແຂວງ ທ່ານຍັງໄດ້ ເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງຫຼວງນໍ້າທາ ຈົ່ງຕິດຕາມການດໍາເນີນກອງປະຊຸມໃນຄັ້ງນີ້ ແລະ ໃນໄລຍະດຳເນີນກອງປະຊຸມສະພາປະຊາຊົນແຂວງ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ, ບັນດາທ່ານສາມາດໂທລະສັບເຂົ້າຫາສະພາປະຊາຊົນແຂວງຫລວງນ້ຳທາ ທີໝາຍເລກ 086 312 185.
ໂດຍ ນາງ ອຳພອນ ສີປະເສີດ