(ສພຊ) ໃນຕອນເຊົ້າວັນທີ 7 ເມສານີ້, ກົມສື່ມວນຊົນ ຄະນະເລຂາທິການສະພາແຫ່ງຊາດ ນໍາໂດຍທ່ານ ປອ. ພິດສະໄຫມ ບຸນວິໄລ ຮອງຫົວຫນ້າກົມສື່ມວນຊົນ ພ້ອມດ້ວຍຄະນະ ໄດ້ແລກປ່ຽນຖອດຖອນບົດຮຽນກັບກົມສື່ມວນຊົນປ້ອງກັນຄວາມສະຫງົບ ນຳໂດຍທ່ານ ພັນເອກ ພອນພິລຸນ ປັນຍາສິລິ ຮອງຫົວຫນ້າກົມສື່ມວນຊົນ ກົມໃຫຍ່ການເມືອງກະຊວງປ້ອງກັນຄວາມສະຫງົບ ພ້ອມດ້ວຍຄະນະ.

             ຈຸດປະສົງຂອງການເຮັດວຽກຄັ້ງນີ້ ເພື່ອສຶກສາຄວາມເປັນໄປໄດ້ໃນການເອົາລາຍການໂທລະພາບ ຜູ້ແທນປະຊາຊົນ ຂອງສະພາແຫ່ງຊາດ ມາອອກຜ່ານໂທລະພາບປ້ອງກັນຄວາມສະຫງົບ ຂອງກະຊວງປ້ອງກັນຄວາມສະຫງົບ ແລະ ແລກປ່ຽນບັນຫາອື່ນໆທີ່ທັງສອງຝ່າຍໃຫ້ຄວາມສົນໃຈ.

             ໂອກາດດັ່ງກ່າວ ທັງສອງຝ່າຍໄດ້ລາຍງານໂດຍຫຍໍ້ໃຫ້ກັນຊາບ ກ່ຽວກັບການປະຕິບັດຫນ້າທີ່ວຽກງານຂອງຕົນ ເປັນຕົ້ນ ຂໍ້ສະດວກ, ຂໍ້ຫຍຸ້ງຍາກ ແລະ ບາງບົດຮຽນປະສົບການທີ່ພົບພໍ້ໃນການປະຕິບັດວຽກງານຕົວຈິງ.