(ສພຊ) – ວັນທີ 18-20 ທັນວາຜ່ານມາ ທີ່ເມືອງວັງວຽງ ແຂວງວຽງຈັນ ໄດ້ມີກອງປະຊຸມຖອດຖອນບົດຮຽນກ່ຽວກັບວຽກງານສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນຂັ້ນແຂວງ (ສສຂ) ແລະ ປະເມີນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ (ສພຊ), ສະພາປະຊາຊົນຂັ້ນແຂວງ (ສພຂ) ໂດຍການເປັນປະທານຂອງທ່ານ ສຸບັນ ສະວະບຸດ ກຳມະການຄະນະປະຈຳ, ປະທານກຳມາທິການວຽກງານສະມາຊິກສະພາແຫ່ງຊາດ (ກວສຊ); ເຂົ້້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ບັນດາທ່ານຮອງປະທານກຳມາທິການ, ຮອງເລຂາທິການ, ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ສສຊ ທີ່ເປັນກຳມະການສັງກັດ ກວສຊ ແລະ ພະນັກງານຈາກພາກສ່ວນທີ່ກ່ຽວຂ້ອງ.

ທັງນີ້, ກໍເພື່ອສະຫຼຸບຕີລາຄາຄືນກ່ຽວກັບວຽກງານສ້າງຄວາມເຂັ້ມແຂງໃຫ້ແກ່ ສສຊ, ສສຂ ແລະ ພະນັກງານທີ່ກ່ຽວຂ້ອງ ເປັນຕົ້ນ: ເນື້ອໃນ, ຮູບແບບ, ວິທີການເຝິກອົບຮົມໃນຂັ້ນຕໍ່ໄປ ເພື່ອເຮັດໃຫ້ວຽກງານດັ່ງກ່າວມີຄຸນນະພາບຍິ່ງໆຂຶ້ນ ທັງຮັບປະກັນໃຫ້ວຽກງານຍົກສູງຂີດຄວາມສາມາດ ມີປະສິດທິຜົນ; ປະເມີນການປະຕິບັດພາລະບົດບາດ, ສິດ ແລະ ໜ້າທີ່ຂອງ ສພຊ ແລະ ສພຂ ເພື່ອຄົ້ນຄວ້າ ແລະ ສະເໜີທິດທາງການປັບປຸງໃນຕໍ່ໜ້າ.

ທ່ານ ສຸບັນ ສະວະບຸດ ກ່າວວ່າ: ຕະຫຼອດໄລຍະຜ່ານມາ ທັງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ສຸມໃສ່ຈັດຕັ້ງປະຕິບັດວຽກງານຕາມແຜນການດ້ວຍຄວາມຮັບຜິດຊອບສູງ ຄຽງຄູ່ກັບການກໍ່ສ້າງ, ບໍາລຸງສ້າງສະມາຊິກສະພາ ກໍຄືເສນາທິການ ເປັນປົກກະຕິຕໍ່ເນື່ອງ ດ້ວຍຮູບການ, ເນື້ອໃນຕ່າງໆ ໂດຍໄດ້ຮັບການຊ່ວຍເຫຼືອດ້ານທຶນຮອນ ແລະ ວິຊາການ ຈາກອົງການລັດ ແລະ ບັນດາອົງການຈັດຕັ້ງສາກົນ; ພ້ອມນັ້ນ, ກໍໄດ້ເອົາໃຈໃສ່ປັບປຸງກົງຈັກການຈັດຕັ້ງ, ແບບແຜນວິທີເຮັດວຽກ ເພື່ອເຮັດສໍາເລັດໜ້າທີ່ວຽກງານທີ່ໄດ້ຮັບມອບໝາຍ.

ກອງປະຊຸມໄດ້ຮັບຟັງການຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານສ້າງຄວາມເຂັ້ມແຂງໃຫ້ແກ່ ສສຊ ແລະ ສສຂ, ປະເມີນການປະຕິບັດພາລະບົດບາດຂອງ ສພຊ ແລະ ສພຂ ໃນໄລຍະຜ່ານມາ ແລະ ກຳນົດທິດທາງປັບປຸງໃນຕໍ່ໜ້າ, ການຄຸ້ມຄອງການສ້າງຄວາມເຂັ້ມແຂງໃຫ້ແກ່ ສພຊ ແລະ ສພຂ ຢ່າງມີຍຸດທະສາດ, ປະສົບການໃນການປະສານງານດ້ານວຽກງານຂອງບັນດາກຳມາທິການຂອງ ສພຊ ແລະ ສພຂ; ຈາກນັ້ນ, ຜູ້ເຂົ້້າຮ່ວມໄດ້ສຸມສະຕິປັນຍາເຂົ້າໃນການຄົ້ນຄວ້າ, ປະກອບຄໍາເຫັນຢ່າງມີຈຸດສຸມ ແລະ ເລິກເຊິ່ງ ເພື່ອເປັນພື້ນຖານໃຫ້ ກວສຊ ນໍາໄປຄົ້ນຄວ້າ ແລະ ສະເໜີຄະນະປະຈໍາສະພາແຫ່ງຊາດ ມີທິດຊີ້ນໍາ ແນໃສ່ປັບປຸງຄຸນນະພາບ, ສ້າງຄວາມເຂັ້ມແຂງ ກໍຄືເຮັດໃຫ້ລະບົບກົງຈັກຂອງ ສພຊ, ສພຂ ໃນສະເພາະໜ້າ ແລະ ຍາວນານ ມີປະສິດທິພາບ, ປະສິດທິຜົນສູງຂຶ້ນເລື່ອຍໆ.

ວັນເສົາທີ 21 ທັນວາ, ກຳມາທິການວຽກງານສະມາຊິກສະພາແຫ່ງຊາດ ໄດ້ສືບຕໍ່ຈັດກອງປະຊຸມຄົບຄະນະ ເພື່ອສະຫຼຸບຕີລາຄາການເຄື່ອນໄຫວວຽກງານປະຈຳປີ 2024 ແລະ ກຳນົດທິດທາງແຜນການເຄື່ອນໄຫວປະຈຳປີ 2025; ປຶກສາຫາລື ແລະ ແລກປ່ຽນຄຳເຫັນບາງວຽກງານທີ່ຈຳເປັນຕາມພາລະບົດບາດ, ສິດ ແລະ ໜ້າທີ່ຂອງກຳມາທິການ.

ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມຕໍ່ທີ່ປະຊຸມ ໂດຍເນັ້ນໜັກໃຫ້ກຳມາທິການວຽກງານສະມາຊິກສະພາແຫ່ງຊາດ ພົວພັນປະສານສົມທົບກັບສະຖາບັນຄົ້ນຄວ້ານິຕິກໍາ, ບັນດາກໍາມາທິການ, ຄະນະເລຂາທິການ ແລະ ສະພາປະຊາຊົນຂັ້ນແຂວງ ໃນການຈັດກອງປະຊຸມເຝິກອົບຮົມ, ສໍາມະນາ ໃຫ້ມີຄຸນນະພາບ, ມີປະສິດທິຜົນ; ຄົ້ນຄວ້າເບິ່ງຄືນການເຄື່່ອນໄຫວວຽກງານຂອງ ສສຊ, ສສຂ ແລະ ບັນດາກົງຈັກພາຍໃນສະພາແຫ່ງຊາດ, ສະພາປະຊາຊົນຂັ້ນແຂວງ ຕາມພາລະບົດບາດ, ສິດ ແລະ ໜ້າທີ່ຂອງຕົນ ເຫັນວ່າບັນຫາໃດທີ່ຍັງອ່ອນ, ຍັງຄົງຄ້າງ ທີ່ ສສຊ ແລະ ສສຂ ປະຕິບັດບໍ່ທັນໄດ້ຕາມເນື້ອໃນຈິດໃຈທີ່ກົດໝາຍ, ນິຕິກໍາກ່ຽວຂ້ອງກໍານົດໄວ້ ເພື່ອຈະໄດ້ສືບຕໍ່ເຝິກອົບຮົມ ຫຼື ສໍາມະນາ, ກໍານົດເປັນຫົວຂໍ້, ກໍານົດເປົ້າໝາຍເຂົ້າເຝິກ ແລະ ສໍາມະນາ, ເອົາຜູ້ເຝິກ (ວິທະຍາກອນ) ທີ່ມີຄວາມຮູ້, ປະສົບການດ້ານນັ້ນ ເປັນຜູ້ບັນລະຍາຍ; ເລືອກເຟັ້ນເອົາຜູ້ທີ່ມີຄວາມຮູ້, ມີຄວາມສາມາດຢູ່ແຕ່ລະຂົງເຂດ ມາເຝິກຢ່າງຈິງຈັງ ເພື່ອສາມາດເປັນວິທະຍາກອນໃນຕໍ່ໜ້າ.