(ສພຊ) – ວັນທີ 23 ກັນຍາຜ່ານມາ ທີ່ສະພາແຫ່ງຊາດ (ສພຊ) ໄດ້ມີກອງປະຊຸມຖອດຖອນບົດຮຽນກ່ຽວກັບການກະກຽມບົດປະກອບຄໍາເຫັນຂອງສູນກາງແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນ ໃນການຕິດຕາມກວດກາການເຄື່ອນໄຫວວຽກງານຂອງສະພາແຫ່ງຊາດໃນໄລຍະຜ່ານມາ ໂດຍການເປັນປະທານຂອງທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າ, ມີບັນດາທ່ານຮອງປະທານກໍາມາທິການບັນດາເຜົ່າ, ຮອງປະທານຄະນະປະຈຳສູນກາງແນວລາວສ້າງຊາດ (ສນຊ), ອະດີດຮອງປະທານສູນກາງແນວລາວສ້າງຊາດ, ຮອງປະ ທານສະຫະພັນນັກຮົບເກົ່າລາວ, ຮອງປະທານສູນກາງສະຫະພັນແມ່ຍິງລາວ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະກົມ ແລະ ພະນັກງານທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ທັງນີ້, ເພື່ອທົບທວນຄືນຜົນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕາມທີ່ກຳນົດໄວ້ໃນກົດໝາຍທີ່ກ່ຽວຂ້ອງ ໃນການຕິດຕາມກວດກາການເຄື່ອນໄຫວວຽກງານຂອງສະພາແຫ່ງຊາດໄລຍະຜ່ານມາ; ຍົກສູງຄຸນນະພາບການຕິດຕາມກວດກາການເຄື່ອນໄຫວວຽກງານຂອງ ສພຊ ແລະ ເນື້ອໃນບົດປະກອບຄຳເຫັນຂອງອົງການແນວລາວສ້າງຊາດ ແລະ ອົງການພາຄີ ຕໍ່ກອງປະຊຸມສະໄໝສາມັນປະຈຳແຕ່ລະປີຂອງສະພາແຫ່ງຊາດໃນຕໍ່ໜ້າ ແລະ ຍົກສູງຄຸນນະພາບໃນການເຄື່ອນໄຫວວຽກງານຕາມ 3 ພາລະບົດບາດຂອງ ສພຊ.
ກອງປະຊຸມໄດ້ຮັບຟັງການສະເໜີບົດລາຍງານການຈັດຕັ້ງປະຕິບັດສິດ ແລະ ໜ້າທີ່ຂອງສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ການເຄື່ອນໄຫວວຽກງານຂອງສະພາແຫ່ງຊາດໄລຍະຜ່ານມາ, ບົດຕີລາຄາ (ໂດຍຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກ) ຄຸນນະພາບໃນການຮ່າງບົດປະກອບຄໍາເຫັນຂອງອົງການແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນ ໃນການຕິດຕາມກວດກາການເຄື່ອນໄຫວຂອງສະພາແຫ່ງຊາດໄລຍະຜ່ານມາ ແລະ ຕີລາຄາການມີສ່ວນຮ່ວມໃນການຮ່າງບົດປະກອບຄໍາເຫັນກ່ຽວກັບຜົນຂອງການຕິດຕາມກວດກາການເຄື່ອນໄຫວຂອງສະພາແຫ່ງຊາດ ທີ່ສູນກາງແນວລາວສ້າງຊາດ ຕາງໜ້າອົງການຈັດຕັ້ງມະຫາຊົນ ສະເໜີຕໍ່ກອງປະຊຸມສະໄໝສາມັນທ້າຍປີຂອງສະພາແຫ່ງຊາດໄລຍະຜ່ານມາ.
(ສອນສັກ ວັນວິໄຊ)
ຖອດຖອນບົດຮຽນການປະກອບຄໍາເຫັນຂອງ ສນຊ ໃນການຕິດຕາມກວດກາການເຄື່ອນໄຫວຂອງ ສພຊ
