(ສພຊ) ຕອບສະໜອງຕາມການເຊື້ອເຊີນຂອງທ່ານ ພົຕ. ປອ. ວົງສັກ ພັນທະວົງ ກຳມະການຄະນະປະຈຳ ສະພາແຫ່ງຊາດ, ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ, ປະທານຄະນະມິດຕະພາບລັດຖະສະພາ ລາວ-ມົງໂກລີ ຂອງສະພາແຫ່ງຊາດລາວ, ໃນລະຫວ່າງວັນທີ 28 ມັງກອນ-3 ກຸມພາ 2023, ທ່ານ ບາທາຣ໌ບີເລັກ ຢັອງຕັອງເພເຣນເລ ( Baatarbileg Yondonperenlei ) ສະມາຊິກສະພາຄູຣານໃຫຍ່ ແຫ່ງ ມົງໂກລີ, ປະທານຄະນະມິດຕະພາບລັດຖະສະພາ ມົງໂກລີ-ລາວ ພ້ອມດ້ວຍຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ.

ຈຸດປະສົງຂອງການຢ້ຽມຢາມ ແລະ ເຮັດວຽກໃນຄັ້ງນີ້ ກໍເພື່ອປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ກໍຄືການພົວພັນຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປລາວ ແລະ ສະພາຄູຣານໃຫຍ່ ແຫ່ງ ມົງໂກລີ ໃຫ້ນັບມື້ນັບຂະຫຍາຍຕົວ ແລະ ເປັນຮູບປະທຳຫຼາຍຂຶ້ນ, ພ້ອມທັງປະກອບສ່ວນສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ມົງໂກລີ ຄົບຮອບ 60 ປີ ໃນປີ 2022 ທີ່ຜ່ານມາ.

ໃນການຢ້ຽມຢາມ ແລະ ເຮັດວຽກຄັ້ງນີ້ ຄະນະມິດຕະພາບລັດຖະສະພາ ລາວ-ມົງໂກລີ, ມົງໂກລີ-ລາວ ກໍໄດ້ພົບປະສອງຝ່າຍນຳກັນ ທີ່ ຫໍສະພາແຫ່ງຊາດ ເຊິ່ງສອງຝ່າຍໄດ້ຕີລາຄາຄືນການພົວພັນຮ່ວມມືໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ ລະຫວ່າງ ຄະນະມິດຕະພາບລັດຖະສະພາ ລາວ-ມົງໂກລີ, ມົງໂກລີ-ລາວ ໃນນາມທີ່ເປັນກົນໄກໜຶ່ງ ຂອງສອງອົງການນິຕິບັນຍັດ ລາວ-ມົງໂກລີ ເພື່ອຊຸກຍູ້ ແລະ ສົ່ງເສີມການພົວພັນ ແລະ ຮ່ວມມືລະຫວ່າງສອງອົງການນິຕິບັນຍັດ, ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປລາວ ແລະ ມົງໂກລີ ແລະ ສອງອົງການນິຕິບັນຍັດ ກໍຄື ຄະນະມິດຕະພາບລັດຖະສະພາລາວ-ມົງໂກລີ ເຊິ່ງເຫັນວ່າສອງປະເທດໄດ້ຮັບການສົ່ງເສີມການຮ່ວມມືທາງດ້ານການເມືອງເປັນສ່ວນໃຫຍ່, ແຕ່ການພົວພັນເສດຖະກິດຍັງບໍ່ທັນສູງ ເນື່ອງຈາກຈຸດພິເສດທາງດ້ານພູມີປະເທດທີ່ຢູ່ຫ່າງໄກກັນ, ແຕ່ແນວໃດກໍຕາມ ສອງຝ່າຍຈະໄດ້ພ້ອມກັນຊຸກຍູ້ໃຫ້ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແຕ່ສູນກາງລົງຮອດທ້ອງຖິ່ນ ລະຫວ່າງ ສອງປະເທດ ເວົ້າລວມ, ເວົ້າສະເພາະ ລະຫ່ວາງສະພາແຫ່ງຊາດລາວ ແລະ ສະພາຄູຣານໃຫ່ຍມົງໂກລີ ໃຫ້ນັບມື້ນັບໄດ້ຮັບການໄປມາຫາສູ່ກັນ ຢ່າງເປັນປະຈຳ ແລະ ຕໍ່ເນື່ອງ ເປັນຕົ້ນແມ່ນ ສອງຝ່າຍ ໄດ້ມີການແລກປ່ຽນຄະນະຜູ້ແທນຢ້ຽມຢາມ ເຊິ່ງກັນ ແລະ ກັນ, ມີການສົ່ງສານອວຍພອນກັນໃນວັນສຳຄັນຕ່າງໆ ແລະ ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ, ໃນເວທີລັດຖະສະພາພາກພື້ນ ແລະ ສາກົນ. ພິເສດ, ສອງຝ່າຍ ຈະຊຸກຍູ້ສອງລັດຖະບານ ເພື່ອຍົກສູງການຮ່ວມມືທາງດ້ານເສດຖະກິດ, ການຄ້າ, ການທ່ອງທ່ຽວໃຫ້ເປັນຮູບປະທຳຫຼາຍຂຶ້ນ ເຊິ່ງລາວມີເງື່ອນໄຂທາງດ້ານຄົມມະນາຄົມເຊັ່ນ: ລົດໄຟຄວາມໄວສູງ ແລະ ອະນາຄົດ ຊຸກຍູ້ໃຫ້ມີຖ້ຽວບິນໂດຍກົງຮ່ວມກັນ ເພື່ອເປັນເງື່ອນໄຂໃນການຊຸກຍູ້ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ.

ໃນໂອກາດມາຢ້ຽມຢາມ ແລະ ເຮັດວຽກໃນຄັ້ງນີ້ ຄະນະຜູ້ແທນຍັງເຂົ້າຢ້ຽມຂ່ຳນັບ ພະນະທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ແລະ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປລາວ, ພົບປະເຮັດວຽກກັບປະທານກຳມາທິການການຕ່າງປະເທດ ສະພາແຫ່ງຊາດລາວ, ລັດຖະມົນຕີກະຊວງກະສິກຳ ແລະ ປ່າໄມ້, ລັດຖະມົນຕີກະຊວງສາທາລະນະສຸກ, ປະທານຄະນະກໍາມະການຮ່ວມມືມົງໂກລີ-ລາວ. ນອກຈາກນີ້, ຄະນະຜູ້ແທນຍັງຈະໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງຫຼວງນ້ຳທາ ເພື່ອສຶກສາ ແລະ ເກັບກຳຂໍ້ມູນ ກ່ຽວກັບນະໂຍບາຍເຊື່ອມໂຍງ ແລະ ເຊື່ອມຈອດ ກັບພາກພື້ນ ແລະ ສາກົນ ຂອງ ສປປລາວ ໂດຍຖືເອົາເສັ້ນທາງລົດໄຟລາວ-ຈີນ ເປັນທ່າແຮງອັນສຳຄັນ ທີ່ ສປປລາວ ແລະ ມົງໂກລີ ຈະສືບຕໍ່ເພີ່ມທະວີການຮ່ວມມືກັນໃນຕໍ່ໜ້າ ແລະ ຢ້ຽມຢາມ, ເຮັດວຽກ ຢູ່ແຂວງຫຼວງພະບາງ ເພື່ອສຳຜັດກັບວັດທະນະທຳ, ຮີດຄອງປະເພນີ, ທໍາມະຊາດທີ່ສວຍງາມ ແລະ ອຸດົມສົມບູນ ຂອງເມືອງມໍລະດົກໂລກ ຕື່ມອີກ.