ໃນຕອນເຊົ້າຂອງວັນທີ 5 ທັນວາ 2023 ນີ້ ສະພາປະຊາຊົນແຂວງຈໍາປາສັກ ເຄື່ອນໄຫວຕິດຕາມກວດກາ ການໃຫ້ເຊົ່າ-ສຳປະທານເນື້ອທີ່ດິນລັດ ຢູ່ເຂດເມືອງປາກຊ່ອງ ເພື່ອກັບກຳຂໍ້ມູນໃນການກະກຽມເນື້ອໃນໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຈໍາປາສັກ ຊຸດທີ II ນໍາໂດຍ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ມີ ທ່ານ ພິມພອນ ພັນດານຸວົງ ກຳມະການພັກແຂວງ, ເຈົ້າເມືອງປາກຊ່ອງ ພ້ອມດ້ວຍບັນດາທ່ານໃນຄະນະນໍາຂອງອົງການປົກຄອງເມືອງປາກຊ່ອງ, ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊ່ອງ ແລະ ວິຊາຊາການທີ່ກ່ຽວຂ້ອງ ເຄື່ອນໄຫວເຮັດວຽກຮ່ວມ.

ການເຄື່ອນໄຫວ, ໄດ້ເປີດກອງປະຊຸມຮັບຟັງການລາຍງານຈາກຂະແໜງການທີ່ກ່ຽວຂ້ອງຂອງເມືອງປາກຊ່ອງ ໂດຍ ທ່ານ ນາງ ບອນຄໍາ ເວີ່ນໂພຄໍາ ຮອງເລຂາພັກເມືອງ, ປະທານກວດກາພັກ-ລັດເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊ່ອງ ໄດ້ລາຍງານສະພາບ ແລະ ບັນຫາພົ້ນເດັ່ນທີ່ເກີດຂື້ນພາຍໃນເມືອງ. ຈາກນັ້ນ, ທ່ານ ຄໍາຂອດ ໝື່ນຫຼວງ ກຳມະການພັກເມືອງ, ຮອງເຈົ້າເມືອງປາກຊ່ອງ ຜູ້ຊີ້ນໍາວຽກງານເສດຖະກິດ ໄດ້ລາຍງານກ່ຽວກັບການຈັດຕັ້ງປະຕິບັດ ການໃຫ້ເຊົ່າ-ສຳປະທານເນື້ອທີ່ດິນລັດ ຢູ່ເຂດເມືອງປາກຊ່ອງ ສາມາດເຫັນໄດ້ຜົນສໍາເລັດ, ຂໍ້ສະດວກ, ຂໍ້ຫຍຸ້ງຍາກທີ່ຈະຕ້ອງໄດ້ສືບຕໍ່ປັບປຸງແກ້ໄຂ ພ້ອມທັງໄດ້ສະເໜີບັນຫາເພື່ອໃຫ້ສະພາປະຊາຊົນແຂວງຈໍາປາສັກ ນໍາໄປຊຸກຍູ້ໃຫ້ຂັ້ນເທິງແກ້ໄຂ ເຊິ່ງກອງປະຊຸມຍັງໄດ້ມີການເຈາະຈີ້ມໃສບາງບັນຫາ ໃຫ້ຂະແໜ່ງການທີ່ກ່ຽວຂ້ອງຂອງເມືອງປາກຊ່ອງໄດ້ລາຍງານເພີ່ມເຕີມໃຫ້ເຫັນໄດ້ຂໍ້ມູນລະອຽດຈະແຈ້ງ.

ຕອນທ້າຍຂອງກອງປະຊຸມ ທ່ານ ສົມສີ ມະນີນິນ ຮອງປະທານຄະນະປະຈໍາສະພາປະຊາຊົນແຂວງ, ປະທານກອງປະຊຸມ ໄດ້ສະແດງຄວາມຊົມເຊີຍຕໍ່ການລາຍງານ ເຫັນໄດ້ຄວາມພະຍາຍາມຂອງບັນດາຂະແໜງການຂອງເມືອງທີ່ມີຄວາມເອົາໃຈໃສ່ໃນການຈັດຕັ້ງປະຕິບັດວຽກງານສາມາດຍາດໄດ້ຜົນສໍາເລັດຫຼາຍດ້ານ ໂດຍສະເພາະການເກັບກໍາຂໍ້ມູນການເຊົ່າ-ສໍາປະທານເນື້ອທີ່ດິນຂອງລັດຢູ່ເມືອງເຫັນວ່າເມືອງສາມາດເກັບກຳຕົວເລກໄດ້ຢ່າງລະອຽດຊັດເຈນ ແລະ ເຫັນໄດ້ຫຼາຍບັນຫາ ເຊິ່ງເປັນຂໍ້ມູນສໍາຄັນຄະນະ ຈະໄດ້ສັງລວມນໍາໄປລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ຄົ້ນຄວ້າພິຈາລະນາ ຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃຫ້ຖືກຕ້ອງສອດຄ່ອງກັບລະບຽບກົດໝາຍ.

ຈາກນັ້ນ, ຄະນະໄດ້ລົງເຄື່ອນໄຫວພາກສະໜາມ ຈຸດທີ່ອະນຸຍາດໃຫ້ມີການເຊົ່າ-ສໍາປະທານເນື້ອທີດີນລັດຢູ່ຫຼາຍຈຸດ ຂອງເມືອງປາກຊ່ອງອີກດ້ວຍ.

(ພາບ-ຂ່າວ: ສົມວິຈິດ ໄຊມົນຕີ)

#ສະພາປະຊາຊົນແຂວງຈໍາປາສັກ

#ຜູ້ແທນປະຊາຊົນ