ໃນລະຫວ່າງວັນທີ 25-27 ກັນຍາ 2023 ນີ້, ທ່ານ ປອ ແພງສີ ສີລາວີ ສະມາຊິກສະພາແຫ່ງຊາດ (ສສຊ) ຊຸດທີ IX ປະຈໍາເຂດເລືອກຕັ້ງທີ 16 ແຂວງ ເຊກອງ, ຮອງປະທານ ສະພາປະຊາຊົນແຂວງ ແລະ ທ່ານ ພັທ ສອນໄຫວ ດາລາສິນ ສະມາຊິກສະພາປະຊາຊົນແຂວງ (ສສຂ) ຊຸດທີ II ປະຈໍາເຂດເລືອກຕັ້ງເມືອງ ກະລຶມ ພ້ອມດ້ວຍຄະນະ ສສຊ ແລະ ສສຂ ປະຈໍາເຂດເລືອກຕັ້ງເມືອງ ກະລຶມ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ ບັນດາບໍລິສັດທີ່ມາລົງທຶນພັດທະນາ ຢູ່ເມືອງ ກະລຶມ ກ່ຽວກັບການແກ້ໄຂບັນດາຜົນກະທົບຕໍ່ສິ່ງແວດລ້ອມ ແລະ ສັງຄົມ ພ້ອມທັງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງ ກະລຶມ.
ການລົງເຄື່ອນໄຫວໃນຄັ້ງນີ້ລວມມີ 03 ຈຸດໃຫຍ່ຄື: ຈຸດທີ 1 ຢູ່ບ້ານ ທົ່ງແຄນ; ຈຸດທີ 2 ຢູ່ສະໂມສອນເມືອງແລະ ຈຸດສຸດທ້າຍ ຢູ່ໂຄງການຂຸດຄົ້ນບໍ່ຖ່ານຫີນ ຂອງກຸ່ມບໍລິສັດພະລັງງານໄຟຟ້າ ເຊກອງ ຈໍາກັດ ເພື່ອຕິດຕາມກວດກາ ແລະ ຊຸກຍູ້ ກ່ຽວກັບການແກ້ໄຂບັນຫາຜົນກະທົບຕໍ່ສິ່ງແວດລ້ອມ ແລະ ສັງຄົມ ຂອງກຸ່ມບໍລິສັດທີ່ມາລົງທຶນພັດທະນາຢູ່ເມືອງກະລຶມ ແລະ ທັງເປັນການໂຄສະນາເຜີຍແຜ່ບັນດາມະຕິຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແນໃສ່ເຮັດໃຫ້ບັນດາອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕຳຫລວດ, ບໍລິສັດຫ້າງຮ້ານ, ຜູ້ປະກອບການທຸລະກິດ ຕະຫລອດຮອດພໍ່ແມ່ປະຊາຊົນບັນດາເຜົ່າ ທົ່ວເມືອງ ກະລຶມ ໄດ້ຮັບຮູ້ ແລະ ເຂົ້າໃຈຕໍ່ເນື້ອໃນວຽກງານສຳຄັນທີ່ພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພ້ອມທັງຮັບຟັງຄຳສະເໜີຂອງພະນັກງານຫຼັກແຫຼ່ງ ແລະ ພໍ່ແມ່ປະຊາຊົນ ຕໍ່ກັບບັນຫາຕ່າງໆທີ່ເກີດຂຶ້ນຕົວຈິງຜ່ານບັນດາ ສສຊ ແລະ ສສຂ ເພື່ອເປັນຂໍ້ມູນນໍາໄປສະເໜີຕໍ່ພາກສ່ວນທີ່ກ່ຽວຂ້ອງພິຈາລະນາແກ້ໄຂຕາມຄວາມເໝາະສົມ.
ໂອກາດດັ່ງກ່າວ, ທ່ານ ປອ ແພງສີ ສີລາວີ ຮອງປະທານສະພາປະຊາຊົນແຂວງ ເຊກອງ ກໍໄດ້ໂອ້ລົມຕໍ່ຄະນະພັກ, ອໍານາດການປົກຄອງເມືອງ-ບ້ານ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕຳຫລວດ ບັນດາບໍລິສັດ, ຜູ້ປະກອບການທຸລະກິດ ຕະຫຼອດຮອດພໍ່ແມ່ປະຊາຊົນຜູ້ມີສິດເລືອກຕັ້ງ ໃຫ້ສືບຕໍ່ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ, ເພີ່ມທະວີຄວາມສາມັກຄີປອງດອງ, ມີປະຊາທິປະໄຕ ແລະ ມີຄວາມສະເໝີພາບຕໍ່ແນວທາງຂອງພັກ, ເຄົາລົບລະບຽບກົດໝາຍຂອງລັດ, ອະນຸລັກຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າ, ສຸມໃສ່ດ້ານກະສິກໍາການປູກ-ການລ້ຽງໃຫ້ກຸ້ມກິນ ແລະ ກາຍເປັນສິນຄ້າ ເພື່ອສ້າງເສດຖະກິດຄອບຄົວໃຫ້ດີຂຶ້ນ ຄຽງຄູ່ກັບການປະຢັດມັດທະຍັດໃຫ້ເປັນພື້ນຖານ.
ພ້ອມນີ້, ທ່ານຍັງໄດ້ຮຽກຮ້ອງໃຫ້ຂະແໜງການກ່ຽວຂ້ອງຂັ້ນເມືອງ ແລະ ບັນດາບໍລິສັດຕ້ອງໄດ້ເອົາໃຈໃສ່ປະສານສົມທົບເຊິ່ງກັນ ແລະ ກັນໃນການປະຕິບັດວຽກງານຕ່າງໆໃຫ້ມີຄວາມກົມກຽວຫລາຍຂຶ້ນກວ່າເກົ່າ; ສຸມໃສ່ການຂຸດຄົ້ນ-ປຸງແຕ່ງ ແລະ ສົ່ງອອກສິນຄ້າ ໃຫ້ໄດ້ຕາມແຜນການ ທັງຮັບປະກັນໄດ້ຜົນກະທົບຕໍ່ສັງຄົມ ແລະ ສິ່ງແວດລ້ອມໜ້ອຍທີ່ສຸດ. ຄຽງຄູ່ກັນນີ້ ກໍຕ້ອງສົ່ງເສີມອາຊີບ, ສ້າງວຽກເຮັດງານທໍາໃຫ້ປະຊາຊົນພາຍໃນແຂວງ ກໍຄື ເມືອງກະລຶມ ດ້ວຍການສົ່ງເສີມດ້ານການປະກອບແຮງງານ, ດ້ວຍການສົ່ງເສີມໃຫ້ປະຊາຊົນເປັນຜູ້ສະໜອງສະບຽງອາຫານໃຫ້ແກ່ພະນັກງານກໍາມະກອນຂອງບໍລິສັດ; ພ້ອມນີ້, ກໍໃຫ້ເອົາໃຈໃສ່ປະກອບສ່ວນມອບພັນທະອາກອນ ແລະ ຄ່າທໍານຽມຕ່າງໆໃຫ້ຖືກຕ້ອງຕາມລະບຽບກົດໝາຍ ເພື່ອເປັນການປະກອບສ່ວນເຂົ້າໃນການສ້າງສາ, ພັດທະນາປະເທດຊາດ ກໍຄື ແຂວງເຊກອງ ໃຫ້ນັບມື້ນັບດີຂຶ້ນເປັນກ້າວໆ. ໂອກາດນີ້, ຄະນະ ສສຊ-ສສຂ ຍັງໄດ້ມອບເຄື່ອງຊ່ວຍເຫຼືອຈໍານວນໜຶ່ງໃຫ້ອໍານາດການປົກຄອງເມືອງ-ບ້ານ ເພື່ອນໍາໄປແຈກຢາຍໃຫ້ກົມກອງ ແລະ ຄອບຄົວທີ່ທຸກຍາກຂາດເຂີນພາຍໃນບ້ານ ທົ່ງແຄນ ແລະ ບ້ານ ອາຣອງ ເຊິ່ງໃນນັ້ນ, ມີຄັອມພິວເຕີຕັ້ງໂຕະ ຈໍານວນ 1 ຊຸດ, ເຂົ້າສານ, ເຄື່ອງນຸ່ງຫົ່ມ ແລະ ອຸປະກອນການສຶກສາ ແລະ ກິລາ.
#ໂດຍ: ນາລີວັນ.