ໃນວັນທີ 11  ມີນາ 2023. ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກທີ 17 ແຂວງອັດຕະປື ໄດ້ລົງເຄື່ອນໄຫວ ຕິດຕາມກວດກາ ແລະ ຊຸກຍູ້ ການປູກຕົ້ນໄມ້ທົດແທນຄືນ ໃນການພັດທະນາໂຄງການ ຂອງບໍລິສັດ ວັງຕັດຂຸດຄົ້ນບໍ່ແຮ່ ຢູ່ເມືອງຊານໄຊ ເຊິ່ງນໍາໂດຍທ່ານ ນາງ ມີນາພອນ ໄຊສົມພູ ປະທານ ຄະນະ ສສຊ ປະຈໍາເຂດເລືອຕັ້ງທີ 17 ແຂວງອັດຕະປື, ປະທານສະພາປະຊາຊົນແຂວງ (ສພຂ). ມີທ່ານ ມະນີໂສ ຊາມົນຕີ ຮອງປະທານກໍາມາທິການເສດຖະກິດ,ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ທັງເປັນ ສສຊ ເຂດ 17 ແລະ ບັນດາທ່ານ ສສຊ ເຂດ17 ພ້ອມດ້ວຍຄະນະ. ມີພະແນການທີ່ກ່ຽວຂ້ອງຂອງ ແລະ ຜູ້ຕາງໜ້າຈາກບໍລິສັດ ເຂົ້າຮ່ວມ.

ໂອກາດດັ່ງກ່າວ, ໄດ້ຮັບຟັງການລາຍງານຈາກບໍລິສັດວັງຕັດຂຸດຄົ້ນບໍ່ແຮ່ ກ່ຽວກັບຄວາມຄືບໜ້າແຜນການຈັດຕັ້ງປະຕິບັດການປູກໄມ້ທົດແທນຄືນໂດຍຫຍໍ້ໃຫ້ຊາບວ່າ: ຕາມມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 72/ຄປຈ, ລົງວັນທີ 24/03/2022 ໃນການຈັດປະຕິບັດການປູກໄມ້ທົດແທນຄືນເນື້ອທີ່ດີນປ່າໄມ້ທີ່ໄດ້ຮັບອະນຸບຍາດ ຫັນປ່ຽນໃຫ້ບໍລິສັດຂຸດຄົ້ນແຮ່ທາດ, ໃນປະຈຸບັນບໍລິສັດແມ່ນມີ 4 ເຂດຖອກດີນເຟືອຍ, ເຊິ່ງກໍງລັງດໍາເນີນການຖອກດີນເຟືອຍ, ສະນັ້ນຈິ່ງບໍ່ທັນສາມາດປູກຕົ້ນໄມ້ໄດ້, ຄາດຄະເນຈະໄດ້ປະຕິບັດໃນໄລຍະທີ 1 ປະມານ 2 ເຮັກຕາ ໂດຍອີງໃສ່ເງື່ອນໄຂ ສະພາບດີນໃນຂອບເຂດດັ່ງກ່າວໄດ້ມີການປັບລະດັບໃໝ່ບໍ່ທັນໝັ້ນຄົງ ຫລື ແໜ້ນພໍ, ອຸນນະພູມໃນດີນຕໍ່າ,ສະພາບອາກາດບໍ່ທັນເໝາະສົມໃນຊ່ວງນີ້, ຕາມແຜນຂອງບໍລິສັດແມ່ນຈະໄດ້ປູກຕົ້ນໄມ້ທົ່ວພື້ນທີ່ຂຸດຄົ້ນທັງໝົດ, ຕົ້ນໄມ້ທີ່ຈະປູກແມ່ນຕົ້ນແປກ ແລະ ຕົ້ນອື່ນໆທີ່ເໝາະສົມກັບສະພາບດີນ. ຈາກນັ້ນ, ກໍ່ໄດ້ຮັບຟັງການລາຍງານຈາກພະແນກການກ່ຽວຂ້ອງຕື່ມອີກ ແລະ ໄດ້ປືກສາຫາລື,ແລກປ່ຽນ.

ໃນນັ້ນ, ທ່ານ ມີນາພອນ ໄຊສົມພູ ຍັງໄດ້ມີຄໍາເຫັນໂອ້ລົມ ເຊິ່ງທ່ານ ໄດ້ສະແດງຄວາມຊົມເຊີຍຕໍ່ບໍລິສັດໃນການຈັດຕັ້ງປະຕິວຽກງານຜ່ານມາເຊິ່ງເຫັນໄດ້ມີຜົນສໍາເລັດຫລາຍດ້ານ, ແລະ ສະເໜີໃຫ້ບໍລິສັດ ສືບຕໍ່ເອົາໃຈໃສ່ຈັດຕັ້ງປະຕິບັດແຜນການປູກຕົ້ນໄມ້ຕາມມະຕິຂອງຄະນະປະຈໍາສະພາແຫ່ງຊາດ ໃຫ້ມີຜົນສໍາເລັດ.

(ວິນັດ)