ໃນວັນທີ​ 23​ ມີຖຸນາ​ 2023 ນີ້.​ ທີ່ຫ້ອງວ່າການປົກຄອງເມືອງພູວົງ ຄະນະກໍາມະການເສດຖະກິດ,​ແຜນການ​ ແລະ​ ການເງີນ​ (ຄສຜງ)​ ສະພາປະຊາຊົນແຂວງ​ (ສພຂ). ໄດ້ຈັດກອງປະຊຸມ​ຕິດຕາມກວດກາ​ ແລະ​ ຊຸກຍູ້​ ການຈັດຕັ້ງປະຕິບັດ​ວຽກງານ​ 6​ ເດືອນ​ຕົ້ນ​ປີ​ 2023 ໃນຂົງເຂດ​ເສດຖະກິດ, ແຜນການ ​ແລະ​ ການເງີນ.​ ໂດຍ​ການເປັນປະທານຂອງ ທ່ານ​ ສຸກສໍາລານ​ ໄຊຍະແສງ​ ຮອງປະທານ​ ສພຂ ທັງເປັນປະທານ​ ຄສຜງ​ ພ້ອມຄະນະ.​ ເຂົ້າຮ່ວມ​ມີ​ ທ່ານ​ ທິດສະຫວັນ ໄຊຍະແສງ ຮອງເຈົ້າເມືອງພູວົງ ຜູ້ຊີ້ນໍາວຽກງານຂົງເຂດເສດຖະກິດ.​ ມີບັນດາທ່ານ​ ສະມາຊິກສະພາປະຊາຊົນແຂວງ​ (ສສຂ) ປະຈໍາເຂດເລືອກຕັ້ງເມືອງ, ຫົວຫນ້າ-ຮອງ​ຫົວຫນ້າ​ຫ້ອງການ​ ແລະ​ ວີຊາການທີ່ກ່ຽວຂ້ອງເຂົ້າຮ່ວມ.

ທ່ານ​ ທິດສະຫວັນ ໄຊຍະແສງ ຮອງເຈົ້າເມືອງພູວົງ ໄດ້ລາຍງານສະພາບການຈັດຕັ້ງປະຕິບັດວຽກງານໃນຂົງເຂດເສດຖະກິດຂອງເມືອງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ໃຫ້ຮູ້ວ່າ: ການພັດທະນາເສດຖະກິດຂອງເມືອງ ມີການຂະຫຍາຍຕົວຢ່າງຕໍ່ເນື່ອງ ແລະ ສາມາດບັນລຸໄດ້ 89.839 ລ້ານກີບ, ສະເລ່ຍລາຍຮັບຕໍ່ຫົວຄົນ (GDP) ເທົ່າກັບ 5 ລ້ານກວ່າກີບ, ອັດຕາການເຕີມໂຕຂອງເສດຖະກິດສະເລ່ຍ5,38%ຕໍ່ປີ, ເຮັດໃຫ້ໂຄງປະກອບເສດຖະກິດຂອງເມືອງ ມີການຫັນປ່ຽນຢ່າງຈະແຈ້ງຄື: ຂະແໜງກະສີກໍາ-ປ່າໄມ້ ມີ 61.721 ລ້ານກີບ ກວມເອົາ 68,70% ຂອງ GDP, ຂະແໜງອຸດສະຫະກໍາມີ 3.949 ລ້ານກີບ ກວມເອົາ 4,40% ຂອງ GDP ແລະ ຂະແໜງການບໍລິການມີ 24.169 ລ້ານກີບ ກວມເອົາ 26,90% ຂອງ GDP, ແຜນການ 6 ເດືອນທ້າຍປີ ສືບຕໍ່ ຕິດຕາມ, ຊຸກຍູ້ຜົນຜະລິດລະດູຝົນ, ການປູກພືດສວນຄົວ, ການຜະລິດເປັນສີນຄ້າ, ຕິດຕາມເຜົ້າລະວັງການລະບາດຂອງພະຍາດສັດ ແລະ ສັດຕູພືດ, ອອກສໍາມະໂນທີ່ດີນໃນທົ່ວເມືອງໃຫ້ບັນລຸຕາມຄາດໝາຍ, ສຸມໃສ່ການຈັດເກັບລາຍຮັບເຂົ້າງົບປະມານ ແລະ ການຄຸ້ມຄອງລາຍຈ່າຍໃຫ້ເຂົ້າສູ້ລະບຽບກົດໝາຍ, ຕິດຕາມການນໍາເຂົ້າ-ສົ່ງອອກສິນຄ້າທຸກປະເພດ ແລະ ການເໜັງຕີງລາຄາສີນຄ້າໃນທ້ອງຕະຫຼາດ ລາຄານໍ້າມັນເຊື່ອໄຟ ແລະ ສົ່ງເສີມກຸ່ມການຜະລິດຫັດຖະກໍາ-ຈັກສານ, ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ ແລະ ການເງີນ ໃຫ້ບັນລຸງຕາມຄາດໝາຍທີ່ວ່າງໄວ້.

ຈາກນັ້ນ ກອງປະຊຸມໄດ້ມີການແລກປ່ຽນ ຄວາມຄິດຄວາມເຫັນ ຂໍ້ສະດວກ, ຂໍ້ຄົງຄ້າງ, ຜົນສໍາເລັດ ແລະ ມາດຕະການແກ້ໄຂ ໃນການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ, ແຜນການລົງທືນ, ແຜນງົບປະມານ, ການປ່ອຍສີນເຊື່ອ ແລະ ເປົ້າໝາຍການເຂົ້າເຖິງສີນເຊື່ອ, ການແກ້ໄຂໜີ້ບໍ່ເກີດດອກອອກຜົນ (NPL) ແລະ ດ້ານວຽກງານອືື່ນໆໃນຂົງເຂດເສດຖະກິດ.