ໃນລະຫວ່າງວັນທີ 18-19 ພຶດສະພາ 2022 ນີ້, ທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ ສະພາແຫ່ງຊາດ ພ້ອມດ້ວຍຄະນະທີມງານ ໄດ້ລົງມາເຄື່ອນໄຫວຢ້ຽມຢາມ ແລະ ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດຢູ່ ແຂວງ ເຊກອງ ເຊິ່ງໃຫ້ການຕ້ອນຮັບໃນຄັ້ງນີ້ ໂດຍທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ພ້ອມດ້ວຍພະແນກການທີ່ກ່ຽວຂ້ອງເຂົ້າຮ່ວມ.
ທ່ານ ປອ ແພງສີ ສີລາວີ ສສຊ, ຮອງປະທານສະພາປະຊາຊົນແຂວງ, ກໍາມະການກໍາມາທິການການຕ່າງປະເທດ ໄດ້ລາຍງານການຈັດຕັ້ງປະຕິບັດວຽກງານໃນຂົງເຂດການຕ່າງປະເທດຢູ່ແຂວງເຊກອງ ເຊິ່ງໃນໄລຍະຜ່ານມາ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງເຊກອງ ກໍຄືສະພາປະຊາຊົນແຂວງ ໄດ້ປະສານສົມທົບກັບຄະນະພັກ-ຄະນະນໍາຂອງແຂວງ ໄດ້ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກ່ຽວກັບການເຄື່ອນໄຫວວຽກງານການຕ່າງປະເທດຂອງອົງການປົກຄອງແຂວງ ບົນພື້ນຖານຫຼັກການນໍາພາຂອງພັກ ແລະ ກົດໝາຍຂອງລັດ ໂດຍສະເພາະການຄຸ້ມຄອງລັດ ດ້ວຍລະບຽບກົດໝາຍ ແລະ ຊຸກຍູ້, ຕິດຕາມການຮ່ວມມືກັບຕ່າງປະເທດໃນອະນຸພາກພື້ນທີ່ມີຊາຍແດນຕິດຈອດ, ການຈັດຕັ້ງປະຕິບັດວຽກງານ ແລະ ຄຸ້ມຄອງການຊ່ວຍເຫຼືອລ້າ (ODA) ການລົງທຶນຂອງຕ່າງປະເທດ ໂດຍສະເພາະໂຄງການລົງທຶນ ແລະ ການຊ່ວຍເຫຼືອ ຂອງ ສປ ຈີນ ແລະ ສສ ຫວຽດນາມ.
ໃນໄລຍະຜ່ານມາ ແຂວງເຊກອງໄດ້ຮັບທຶນຊ່ວຍເຫຼືອລ້າ ຈາກ ສສ ຫວຽດນາມ ເຂົ້າໃນການພັດທະນາວຽກງານ ກໍ່ສ້າງຊັບພະຍາກອນມະນຸດມີ 91 ທຶນ; ທຶນຊ່ວຍເຫຼືອດ້ານການພັດທະນາທັງໝົດມີ 19 ໂຄງການ ມູນຄ່າ 53,788,12 ຕື້ກີບ ເຊິ່ງເປັນການປະກອບສ່ວນປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງປະຊາຊົນດີຂື້ນເປັນກ້າວໆ; ສຳລັບໂຄງການຊ່ວຍເຫຼືນຂອງ ສປ ຈີນ ທັງໝົດ 40 ໂຄງການ, ມູນຄ່າ 4 ຕື້ຢວນ ແມ່ນສະເໜີກະຊວງແຜນການ ແລະ ການລົງທຶນຮັບຮອງແລ້ວ ແຕ່ຍັງບໍ່ທັນໄດ້ຈັດຕັ້ງປະຕິບັດ. ພ້ອມນີ້ ກໍຍັງໄດ້ມີການແລກປ່ຽນປະກອບຄຳຄິດຄຳເຫັນໃນວຽກງານໃນຂົງເຂດການຕ່າງປະເທດຕື່ມອີກ.
ພ້ອມນັ້ນ, ທ່ານ ຮອງປະທານກໍາມາທິການການຕ່າງປະເທດ ພ້ອມຄະນະທີມງານ ຍັງ ໄດ້ລົງເຄື່ອນໄຫວຕິດຕາມກວດກາພື້ນທີ່ຕົວຈິງຂອງໂຄງການຟື້ນຟູ ແລະ ຂະຫຍາຍລະບົບນໍ້າປະປາ ຢູ່ເມືອງ ລະມາມ ຕື່ມອີກ.
