ໃນລະຫວ່າງວັນທີ 7-9 ທັນວາ 2022 ສະພາປະຊາຊົນ ແຂວງເຊກອງ ສົມທົບກັບພະແນກການ ແລະ ອົງການທີ່ກ່ຽວຂ້ອງຂອງແຂວງ ລົງຕິດຕາມກວດກາ ປະເມີນຄືນຜົນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດຍຸຕິທໍາ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຢູ່ 2 ເມືອງຄື: ເມືອງ ທ່າແຕງ ແລະ ເມືອງ ລະມາມ ນຳໂດຍທ່ານ ນາງ ຄຳເສັງ ທຸມມະວົງສາ ກຳມະການພັກແຂວງ, ຮອງປະທານສະພາປະຊາຊົນແຂວງ ໂດຍໃຫ້ກຽດ ຕ້ອນຮັບຂອງທ່ານ ແສງລາຕີ ຫຼອມຍະເດດ ຮອງເລຂາພັກເມືອງ ຫົວໜ້າຄະນະສະມາຊິກສະພາປະຊາຊົນແຂວງປະຈຳ ເຂດເລືອກຕັ້ງ ເມືອງ ທ່າແຕງ ແລະ ທ່ານ ໄຊຍະຫວັດ ກ້ອນຄໍາໝັ້ນ ຮອງເລຂາພັກເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງ ລະມາມ, ມີບັນດາຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ, ພະແນກການກ່ຽວຂ້ອງຂັ້ນແຂວງ ແລະ ຄະນະກຳມະການສະກັດກັ້ນ ແລະ ແກ້ໄຂ ບັນຫາຢາເສບຕິດຂັ້ນເມືອງ ແລະ ອໍານາດການປົກຄອງບ້ານເຂົ້າຮ່ວມ.

        ໂອກາດດັ່ງກ່າວ ພັທ ອ່ອນຕາ ສະສົມບັດ ຫົວໜ້າ ກອງບັນຊາການປ້ອງກັນຄວາມສະຫງົບ (ປກສ) ເມືອງ ທ່າແຕງ ໄດ້ລາຍງານການຈັດຕັ້ງປະຕິບັດ ວາລະແຫ່ງຊາດ: ວ່າດ້ວຍການແກ້ໄຂບັນກາຢາເສບຕິດ ໄລຍະ 9 ເດືອນຜ່ານມາ, ເຊິ່ງເຫັນໄດ້ວ່າຄະນະພັກ-ຄະນະນຳແຕ່ລະຂັ້ນ ໄດ້ຖືສຳຄັນວຽກງານ ສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ, ເຊື່ອມຊຶມເອກະສານ ທີ່ກ່ຽວຂ້ອງກັບວາລະແຫ່ງຊາດ ວ່າດ້ວຍການແກ້ໄຂ, ສະກັດກັ້ນບັນຫາຢາເສບຕິດ ແລະ ຜົນຮ້າຍຂອງຢາເສບຕິດ, ກົດລະບຽບການສັນຈອນທາງບົກ, ໂດຍສຸມໃສ່ໂຄສະນາຢູ່ບັນດາກົມກອງປ້ອງກັນຄວາມສະຫງົບຂອງຕົນ, ປກສ ກຸ່ມບ້ານໃນ 6 ເຂດຈຸດສຸມພັດທະນາທົ່ວເມືອງ ທ່າແຕງ, ເຊິ່ງສາມາດແກ້ໄຂມ້າງຄະດີຄ້າຂາຍຢາເສບຕິດໄດ້ 18 ລາຍ,ຈັບຜູ້ຖທກຫາໄດ້ 22 ຄົນ, ຍິງ 4 ຄົນ, ກັກຕົວກຸ່ມມົ້ວສຸມຢາເສບຕິດໄດ້ 27 ຄົນ, ຢຶດຂອງກາງຢາບ້າໄດ້ 21.707 ເມັດ, ມີເຄື່ອງຕິດຕົວປະເພດໂທລະສັບ 20 ໜ່ວຍ, ລົດຈັກ 3 ຄັນ, ເງິນສົດ 9 ແສນກວ່າກີບ, ບັດປະຈຳຕົວ 1 ບັດ, ບັດເອທີເອັມ 1 ບັດ, ໂມງໃສ່ແຂນ 1 ໜ່ວຍ, ໝາກຝ່າລະເບີດຫີນ 4 ໜ່ວຍ, ອຸປະກອນຄວບຄຸມການລະເບີດ 2 ອັນ ແລະລູກແກັບ 300 ລູກ, ຄະດີດັ່ງກ່າວແມ່ນໄດ້ສົ່ງໃຫ້ຫ້ອງຕຳຫຼວດ ປກສ ແຂວງ ເຊກອງເປັນຜູ້ດຳເນີນຕາມລະບຽບກົດໝາຍ.

         ຂະນະທີ່ທ່ານ ພັທ ຮຽມ ໄຊຍະລາດ ຫົວໜ້າກອງບັນຊາການ ປກສ ເມືອງ ລະມາມ ກໍໄດ້ລາຍງານກ່ຽວກັບສະພາບການຈັດຕັ້ງປະຕິບັດວຽກງານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ເມືອງ ຂອງຕົນ ໃນໄລະ 9 ເດືອນຜ່ານມາ ເຊິ່ງສາມາດຂຶ້ນບັນຊີເປົ້າໝາຍຄ້າ-ຂາຍຢາເສບຕິດ ໄດ້ທັງໝົດ 135 ຄົນ, ຍິງ 10 ຄົນ, ເປົ້າໝາຍເສບຕິດ 894 ຄົນ, ຍິງ 45 ຄົນ, ເກັບກໍາຈໍານວນຄອບຄົວປອດຢາເສບຕິດໄດ້ທັງໝົດ 15 ບ້ານ, ມີ 2.653 ຄອບຄົວ, ໃນນັ້ນ, ຄອບຄົວປອດຢາເສບຕິດມີ 1.393 ຄອບຄົວ, ຄອບຄົວພົວພັນຢາເສບຕິດມີ 1.260 ຄອບຄົວ, ໄດ້ຂຶ້ນບັນຊີກໍານົດບ້ານຈະສ້າງເປັນລ້ານປອດຢາເສບຕິດ ຈໍານວນ 02 ບ້ານຄື: ບ້ານປາກປູນ ແລະ ບ້ານຖໍ້າເດັ້ງ ແລະ ຍັງໄດ້ມ້າງຄະດີຄ້າ-ຂາຍຢາເສບຕິດ ໄດ້ທັງໝົດ 16 ລາຍ, ກັກຜູ້ຖືກຫາ ໄດ້ທັງໝົດ 27 ຄົນ, ຍິງ 2 ຄົນ, ໃນນັ້ນ ຜູ້ຖືກຫາຄ້າ-ຂາຍຢາເສບຕິດ 17 ຄົນ, ຍິງ 2 ຄົນ, ຜູ້ເສບ 7 ຄົນ ( 3 ຄົນ ແມ່ນບໍ່ມີຂອງກາງຄະດີ), ໄດ້ກວດຢຶດຂອງກາງ ປະເພດຢາບ້າ ໄດ້ທັງໝົດ 37.001 ເມັດ, ໂທລະສັບ 12 ເຄື່ອງ, ໝໍ້ໄຟ 1 ໜ່ວຍ, ປືນແກັບ 1 ກະບອກ, ລົດຈັກ 4 ຄັນ ແລະ ເງິນກີບ ຈໍານວນ 1 ລ້ານກີບ, ໄດ້ສຶກສາອົບຮົມເປົ້າໝາຍເສບຢາເສບຕິດ ທັງໝົດ 326 ຄົນ, ຍິງ 45 ຄົນ ແລະ ນໍາສົ່ງປິ່ນປົວຢູ່ສູນບໍາບັດ ຈໍານວນ 4 ຄົນ ແລະ ໄດ້ກວດນໍ້າປັດສະວະຊອກຫາສານເສບຕິດກຸ່ມເປົ້າໝາຍຜູ້ເສບຕິດທີ່ໄດ້ສຶກສາອົບຮົມແລ້ວ ຈໍານວນ 128 ຄົນ, ຍິງ 1 ຄົນ ແລະ ພົບເຫັນສານເສບຕິດ ຈໍານວນ 46 ຄົນ.

        ພ້ອມນັ້ນ, ຍັງໄດ້ລົງຊຸກຍູ້ ແລະ ຕິດຕາມກວດກາສະພາບຕົວຈິງ ຢູ່ບັນດາເຂດຈຸດສຸມພັດທະນາ ທີ່ເຫັນວ່າພົບບັນຫາຫຼາຍທີ່ສຸດຂອງທັງສອງເມືອງ ຕື່ມອີກ.

#ໂດຍ: ນາລີວັນ