​ໂດຍປະຕິບັດຕາມແຜນການລົງເຄື່ອນໄຫວຕິດຕາມກວດກາ ຂອງຄະນະເລຂາທິການ ເລກທີ 341/ຄລຂ, ລົງວັນທີ 11 ກັນຍາ 2023 ແລະ ແຜນລົງຕິດຕາມກວດກາຂອງ ຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ເລກທີ 14/ຄສຜງ, ລົງວັນທີ 04 ກັນຍາ 2023.

​ໃນວັນທີ 20 ກັນຍາ 2023 ທ່ານ ນາງ ວຽນວິໄລ ດີລະພັນຄະນະປະຈໍາພັກແຂວງ,   ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6, ທັງເປັນ ກໍາມະການສັງກັດ ຄະນະກໍາມະການເສດຖະກິດ, ແຜນການ ແລະ ການເງິນ, ພ້ອມຄ້ວຍຄະນະ ໄດ້ລົງຕິດຕາມກວດກາ ການຈັດຕັ້ງປະຕິບັດ ການທົດແທນຜົນເສຍຫາຍໃຫ້ແກ່ປະຊາຊົນ ທີ່ໄດ້ຮັບຜົນກະທົບ ຈາກໂຄງການຄຸດຄົ້ນຫີນອ່ອນມາໂບ ຢູ່ ບ້ານແດນສະຫວ່າງ ນະຄອນ-ຫຼວງພະບາງ.

ການລົງຕິດຕາມກວດກາໃນຄັ້ງນີ້ ແມ່ນເຮັດວຽກຮ່ວມກັບ ບໍລິສັດ ແດນສະຫວ່າງມາໂບ ຈໍາກັດຜູ້ດຽວ ເຊີງໄດ້ຮັບຟັງການລາຍງານຈາກບໍລິສັດ ກ່ຽວກັບ ສະພາບທົ່ວໄປຂອງໂຄງການ, ຂັ້ນຕອນການສໍາຫຼວດ, ການທົດແທນຄ່າເສຍຫາຍ ໃຫ້ແກ່ປະຊາຊົນ ທີ່ໄດ້ຮັບຜົນກະທົບ ຈາກການຈັດຕັ້ງປະຕິບັດໂຄງການ ເຊິ່ງມີຈໍານວນ ຄອບຄົວທີ່ໄດ້ຮັບຜົນກະທົບ ຈໍານວນ 26 ຄອບຄົວ, ໄດ້ຮັບການຊົດເຊີຍເປັນຈໍານວນເງິນ 551.415.500 ກີບ, ໃນນັ້ນ: ມີການຊົດເຊີຍການຍົກຍ້າຍຫຼຸບຝັງສົບ ຈໍານວນ 13 ຫຼຸບ, ເປັນຈໍານວນເງິນ 184.860.000 ກີບ ແລະ ຊົດເຊີຍຜົນກະທົບການສ້າງເສັ້ນທາງຫຼັກເຂົ້າຫາເຂດທົດລອງຂຸດຄົ້ນຂອງບໍລິສັດ ເປັນຈໍານວນເງິນ 366.555.500 ກີບ. ຈາກນັ້ນຄະນະທີມງານຈື່ງໄດ້ມີຄໍາຖາມເຈາະຈິ້ມ ແລະ ແລກປ່ຽນຄວາມຄິດເຫັນ ຢ່າງພາວະວິໄສ ແລະ ກົງໄປ-ກົງມາ.

​ໃນຕອນທ້າຍ ທ່ານ ນາງ ວຽນວິໄລ ດີລະພັນ ຫົວໜ້າຄະນະ ລົງຕິດຕາມກວດກາໃນຄັ້ງນີ້ ຍັງໄດ້ເນັ້ນໜັກ ໃຫ້ພະແນກການທີ່ກ່ຽວຂ້ອງ ດໍາເນີນການ ຕິດຕາມກວດກາ ຜົນກະທົບຕໍ່ສິ່ງແວດລ້ອມ ເປັນຕົ້ນແມ່ນ: ການປ້ອງກັນດິນເຈື່ອນ, ການຕັດໄມ້ທໍາລາຍປ່າ, ຜົນກະທົບທາງອາກາດ, ຜົນກະທົບທາງນໍ້າ ແລະ ຜົນກະທົບທາງສຽງ. ພ້ອມທັງຊີ້ນໍາໃຫ້ບໍລິສັດ ແດນສະຫວ່າງມາໂບ ຈໍາກັດຜູ້ດຽວ ປະຕິບັດຕາມສັນຍາ ໃນການມອບພັນທະໃຫ້ແກ່ລັດຖະບານຕາມລະບຽບການ ແລະ ຊຸກຍູ້ການສ້າງວຽກເຮັດງານທໍາໃຫ້ແກ່ປະຊາຊົນເຂດໃກ້ຄຽງ ພ້ອມກັນນັ້ນ ກໍ່ຕ້ອງຟື້ນຟູສະພາບແວດລ້ອມ ຫຼັງການສໍາຫຼວດໃຫ້ຢູ່ໃນຄວາມເໝາະສົມຕາມເງືອນໄຂຕົວຈິງ.

ຂຽນຂ່າວໂດຍ: ນາງ ຈັນທິມາ ສໍພັນໄຊແກ້ວ