ວັນທີ 15 ພະຈິກ 2022 ນີ້, ທ່ານ ປອ ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມຄະນະທີມງານຈາກສູນກາງ ແລະ ທ້ອງຖິ່ນ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ຢູ່ເມືອງ ທ່າແຕງ ແຂວງ ເຊກອງ ເປັນຕົ້ນ: ການປະຕິບັດວຽກງານຂອງເຂື່ອນໄຟຟ້າຫ້ວຍລໍາພັນໃຫຍ່ ແລະ ບໍລິສັດ ກາດເກ້ລາວ-ເຊກອງ (ໂຄງການປູກກາເຟ).
      ເຊິ່ງການລົງເຮັດວຽກໃນຄັ້ງນີ້, ແມ່ນໄດ້ລົງຕິດຕາມຢູ່ພາກສະໜາມເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງບັນດາບໍລິສັດດັ່ງກ່າວໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ບັນຫາການລົງທຶນ, ການຜະລິດເປັນສິນຄ້າເພື່ອສົ່ງອອກ, ການຈັດເກັບລາຍຮັບເຂົ້າງົບປະມານຂອງລັດ, ການຄຸ້ມຄອງແຮງງານ, ການປະຕິບັດນະໂຍບາຍ ແລະ ການແກ້ໄຂບັນຫາຕ່າງໆທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ.
     ພ້ອມນັ້ນ, ຍັງໄດ້ພົບປະ ແລະ ຕິດຕາມຊີວິດການເປັນຢູ່ຂອງພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້າຫ້ວຍລໍາພັນໃຫຍ່ 2 ບ້ານຄື: ບ້ານທົ່ງໂກງ ແລະ ທົ່ງຍາວ ເຊິ່ງບໍລິສັດໄດ້ຍົກຍ້າຍໄປຢູ່ເຂດຈັດສັນໃໝ່ຊື່ວ່າ: ບ້ານຫ້ວຍດໍາໃໝ່ ເມືອງ ທ່າແຕງ ເຊິ່ງຕັ້ງຢູ່ຫ່າງຈາກຖິ່ນຖານເກົ່າປະມານ 15 ກິໂລແມັດ ແລະ ຫ່າງຈາກທາງຫຼວງ ປະມານ 5 ກິໂລແມັດ.
        ທັງນີ້, ກໍເພື່ອເປັນການເກັບກໍາຂໍ້ມູນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດຕັ້ງປະຕິບັດ 2 ວາລະແຫ່ງຊາດ ແລະ ບັນຫາຄວາມເຄັ່ງຮ້ອນຈໍານວນໜຶ່ງ ຈາກໂຄງການພັດທະນາຂອງລັດ, ບັນດາຫົວໜ່ວຍທຸລະກິດ ທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ, ການແກ້ໄຂບັນຫາຕ່າງໆທີ່ຄົງຄ້າງ ຢູ່ຂັ້ນທ້ອງຖິ່ນ ເພື່ອຈະນໍາໄປສະເໜີຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຈະໄດ້ໄຂຂຶ້ນໃນໝໍ່ໆນີ້.#ໂດຍ: ນາລີວັນ.