ຕອນບ່າຍຂອງວັນອັງຄານທີ 22 ຕຸລາ 2024 ຢູ່ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກສະພາປະຊາຊົນແຂວງ ໄດ້ດໍາເນີນຊີວິດພັກປະຈໍາເດືອນ ຕຸລາ ປີ 2024, ໂດຍການເປັນປະທານຂອງສະຫາຍ ນາງ ວັນສີ ພວງມະໄລ ເລຂາໜ່ວຍພັກສະພາປະຊາຊົນແຂວງ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ສະຫາຍ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຄະນະໜ່ວຍພັກ, ສະມາຊິກພັກ ພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ທ່ານ ທອງໄຊ ທໍ່ຈົງເລ່ຍຈີ ຮອງເລຂາໜ່ວຍພັກ ໄດ້ຕາງໜ້າຄະນະພັກ ຜ່ານມະຕິຕົກລົງຂອງຄະນະປະຈໍາສະພາປະຊາຊົນແຂວງ ເລກທີ 114/ຄປຈ, 10 ຕຸລາ 2024 ວ່າດ້ວຍການແຕ່ງຕັ້ງ ຮອງເລຂາທິການ; ເລກທີ 1150/ຄປຈ, 14 ຕຸລາ 2024 ວ່າດ້ວຍການແບ່ງຄວາມຮັບຜິດຊອບພາຍໃນ ຄະນະເລຂາທິການ ສພຂ ແລະ ຂໍ້ຕົກລົງຂອງກອງບັນຊາ ການປ້ອງກັນຄວາມສະຫງົບແຂວງ ເລກທີ 1451/ປກສ.ອຊ, 16 ຕຸລາ 2024 ວ່າດ້ວຍການແຕ່ງຕັ້ງຄະນະໜ່ວຍປ້ອງກັນພາຍໃນ ສພຂ.
ປະຕິບັດຕາມວາລະ ສະຫາຍ ນາງ ວັນສີ ພວງມະໄລ ເລຂາໜ່ວຍພັກສະພາປະຊາຊົນແຂວງ ໄດ້ຜ່ານຮ່າງບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ແລະ ທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ຂອງໜ່ວຍພັກສະພາປະຊາຊົນແຂວງອຸດົມໄຊ ແລະໄດ້ຜ່ານຮ່າງບົດສະຫຼຸບການເຄື່ອນໄຫວນໍາພາ-ຊີ້ນໍາ ຂອງຄະນະໜ່ວຍພັກສະພາປະຊາຊົນແຂວງ ປະຈໍາເດືອນ ຕຸລາ ແລະ ທິດທາງແຜນການເດືອນ ພະຈິກ 2024.
ຫຼັງຈາກນັ້ນ, ບັນດາສະຫາຍສະມາຊິກພັກ ໄດ້ປະກອບຄໍາຄິດຄໍາເຫັນໃສ່ 2 ຮ່າງບົດສະຫຼຸບດັ່ງກ່າວ, ຕໍານິສົ່ງຂ່າວເຊິ່ງກັນ ແລະກັນຢ່າງກົງໄປກົງມາ ເພື່ອເຮັດໃຫ້ຮ່າງບົດສະຫລຸບມື້ເນື້ອໃນຄົບຖ້ວນສົມບູນ ແລະເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າ.
ພາບ/ຂ່າວ: ສະພາປະຊາຊົນແຂວງ.