ວັນທີ່ 23 ມັງກອນ 2023 ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ  ພ້ອມດ້ວຍຄະນະ, ມີຫົວໜ້າ, ຮອງຫົວໜ້າຂະແໜງ ແລະ ວິຊາການທີ່ກ່ຽວຂ້ອງເຂົ້າຮ່ວມກອງປະຊຸມປະຈຳປີຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ດ້ວຍລະບົບທາງໄກ ຢູ່ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ປອ ຢ່າງກູ້ ຢາງລືໄຊ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ມີບັນດາຄະນະເລຂາທິການ, ພະນັກງານວິຊາການທີ່ກ່ຽວຂ້ອງຂອງສະພາປະຊາຊົນແຂວງປະຈຳເຂດເລືອກຕັ້ງທົ່ວປະເທດເຂົ້າຮ່ວມ.

ວາລະດຳເນີນກອງປະຊຸມໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານສະຖາບັນຄົ້ນຄວ້ານິຕິກຳ ຂອງສະພາແຫ່ງຊາດປະຈຳປີ 2022 ແລະ ທິດທາງແຜນການ 2023 ເປັນຕົ້ນ; ດ້າວິທະຍາສາດໄດ້ມີຄວາມຮູ້ພື້ນຖານກ່ຽວກັບສະພາແຫ່ງຊາດ, ສະພາປະຊາຊົນແຂວງ, ການສ້າງກົດໝາຍ, ການຕິດຕາມກວດກາ, ການພົບປະຜູ້ມີສິດເລືອກຕັ້ງ ຂອງ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນນາມເປັນຕົວແທນແຫ່ງສິດຜົນປະໂຫຍດຂອງປະຊາຊົນບັນດາເຜົ່າ ແລະ ພາວະການເປັນຜູ້ນຳ, ດ້ານນິຕິກຳໄດ້ຄົ້ນຄວ້າຮ່າງກົດໝາຍ ແລະ ປັບປຸງກົດໝາຍບາງກົດໝາຍ ພ້ອມນີ້ ຍັງໄດ້ຈັດປື້ມປະມວນຕ່າງໆ, ມະຕິກອງປະຊຸມ, ການຈັດຫ້ອງສະມຸດ, ການສະໜອງຂໍ້ມູນຂ່າວສານ, ການພົວພັນຮ່ວມມືກັບຕ່າງປະເທດ ແລະ ບັນດາວຽກທີ່ປິ່ນອ້ອມອື່ນໆ ໃຫ້ແກ່ການຮັບໃຊ້ກອງປະຊຸມຕ່າງໆ, ການເຝິກອົບຮົມສຳມະນາວິທະຍາສາດ, ບັນດາກິດຈະກຳຕ່າງໆແມ່ນມີຜົນສຳເລັດ ແລະ ຈະສືບຕໍ່ທິດທາງແຜນການ 5 ປີ 2021-2025 ໃນຕໍ່ໜ້າ ໃຫ້ສຳເລັດຕາມຄາດໝາຍ, ນອກນັ້ນ ບັນດາທ່ານເຂົ້າຮ່ວມກອງປະຊຸມໄດ້ແລກປ່ຽນປະກອບຄໍາຄິດເຫັນຕໍ່ວຽກງານຄົ້ນຄວ້ານິຕິກໍາຂອງສະພາແຫ່ງຊາດ ຢ່າງມີຈຸດສຸມ ເພື່ອເຮັດໃຫ້ວຽກງານດັ່ງກ່າວໄດ້ຮັບການປັບປຸງ ແລະ ແທດເໜາະກັບສະພາບຄວາມເປັນຈິງ.