(ສພຊ) – ກຳມາທິການກົດໝາຍ ໄດ້ຈັດກອງປະຊຸມຍົກສູງວຽກງານສ້າງ ແລະ ປັບປຸງກົດໝາຍ ໂດຍການເປັນປະທານຂອງທ່ານ ຄຳແພງ ວິລະພັນ ຄະນະປະຈຳສະພາແຫ່ງຊາດ, ປະທານກຳມາທິການກົດໝາຍ; ມີຮອງປະ ທານ, ຄະນະກົມ, ຄະນະພະແນກ ແລະ ວິຊາການຂອງກຳມາທິການດັ່ງກ່າວ, ບັນດາປະທານ-ຮອງປະທານຄະນະກຳ ມະການຍຸຕິທຳ ແລະ ປ້ອງກັນຊາດ-ປ້ອງຄວາມສະຫງົບ ສະພາປະຊາຊົນຂັ້ນແຂວງ ໃນຂອບເຂດທົ່ວປະເທດ ພ້ອມດ້ວຍວິຊາການ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ໃນພິທີເປີດ, ທ່ານ ຄຳແພງ ວິລະພັນ ໃຫ້ຮູ້ວ່າ: ກອງປະຊຸມຄັ້ງນີ້ ເປັນກອງປະຊຸມວິຊາການກ່ຽວກັບວຽກງານສ້າງ ແລະ ປັບປຸງກົດໝາຍ ແນໃສ່ຍົກລະດັບຄວາມຮູ້ຄວາມສາມາດໃຫ້ແກ່ພະນັກງານ-ລັດຖະກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງຈຳນວນໜຶ່ງ ໄດ້ຮັບຮູ້ ແລະ ເຂົ້າໃຈວຽກງານສ້າງ ແລະ ປັບປຸງກົດໝາຍ ທັງເປັນການແລກປ່ຽນບົດຮຽນເຊິ່ງກັນແລະກັນ ໃນການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາ ເພື່ອຊອກໃຫ້ເຫັນດ້ານດີ, ດ້ານອ່ອນຂໍ້ຄົງຄ້າງຂອງການເປັນເສນາທິການໃນການສ້າງນິຕິກຳຂັ້ນແຂວງ, ການເປັນເສນາທິການວຽກງານປິ່ນອ້ອມ ໃຫ້ແກ່ຄະນະນຳຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຮັບການປັບປຸງແກ້ໄຂໃຫ້ດີຂຶ້ນ.ຜູ້ເຂົ້າຮ່ວມໄດ້ຮັບຟັງການບັນລະຍາຍ ແລະ ສົນທະນາແລກປ່ຽນຄຳເຫັນຕໍ່ເນື້ອໃນຕ່າງໆຄື: ພາລະບົດບາດການເປັນເສນາທິການໃນການກວດກາເນື້ອໃນຮອບດ້ານຂອງຮ່າງກົດໝາຍ; ການກະກຽມ ແລະ ນຳສົ່ງຮ່າງກົດໝາຍໃຫ້ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ນຳທາບທາມຄຳເຫັນນຳສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພາກສ່ວນກ່ຽວຂ້ອງໃນທົ່ວປະເທດ; ການບັນທຶກ ແລະ ການກະກຽມບົດລາຍງານຜົນ ສຳເລັດຂອງກອງປະຊຸມຕໍ່ຮ່າງກົດໝາຍ; ບັນດາທ່ານປະທານ-ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ກໍໄດ້ຜັດປ່ຽນກັນສະເໜີບົດຮຽນການເປັນເສນາທິການໃນວຽກງານສ້າງນິຕິກຳຂັ້ນແຂວງ ແລະ ການຈັດຕັ້ງທາບທາມຮ່າງກົດໝາຍຂອງສະພາປະຊາຊົນຂັ້ນແຂວງ ພ້ອມທັງສົນທະນາແລກປ່ຽນ ແລະ ລະດົມຄຳຄິດຄຳເຫັນຕໍ່ໜ້າວຽກຕ່າງໆ ເພື່ອຊອກໃຫ້ເຫັນວິທີການ ແລະ ມາດຕະການແກ້ໄຂຕໍ່ດ້ານອ່ອນທີ່ໄດ້ຈັດຕັ້ງປະຕິບັດໄລຍະຜ່ານມາ. ພ້ອມນັ້ນ, ຍັງໄດ້ຮັບຟັງການສະເໜີກ່ຽວກັບຂະບວນການສ້າງ ແລະ ປັບປຸງກົດໝາຍຂອງປະເທດການາດາ ໂດຍຊ່ຽວຊານຈາກຕ່າງປະເທດ ແລະ ຄົ້ນຄວ້າແລກປ່ຽນບົດຮຽນກັບຊ່ຽວຊານ ເຊິ່ງເປັນພື້ນຖານສຳ ຄັນໃນການຄົ້ນຄວ້າ, ພິຈາລະນາ ແລະ ນຳໄປໝູນໃຊ້ເຂົ້າໃນໜ້າທີ່ວຽກງານຕົວຈິງ.
ກອງປະຊຸມຄັ້ງນີ້ ຈັດຂຶ້ນໃນວັນທີ 15-17 ສິງຫາ 2024 ຢູ່ເມືອງແກ້ວອຸດົມ ແຂວງວຽງຈັນ ໂດຍນຳໃຊ້ງົບ ປະມານສົມທົບຂອງມູນນິທິເອເຊຍ (TAF) ແລະ ຄະນະເລຂາທິການສະພາແຫ່ງຊາດ.
(ນາງ ປາກາລັກ ພົມມີໄຊ)