(ສພຊ) ເພື່ອຍົກລະດັບຄວາມຮັບຮູ້, ຄວາມເຂົ້າໃຈເປັນເອກະພາບກັນຕໍ່ບັນດານິຕິກໍາທີ່ກ່ຽວຂ້ອງກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ; ເພື່ອຍົກສູງພາລະບົດບາດໃນການຕິດຕາມກວດກາແຕ່ຫົວທີຕໍ່ຂົງເຂດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ແກ່ສະມາຊິກສະພາແຫ່ງຊາດ ທີ່ເປັນ ກໍາມະການຂອງກໍາມາທິການບັນດາເຜົ່າ ແລະ ສະມາຊິກສະພາປະຊາຊົນຂັ້ນແຂວງ ທີ່ເປັນປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ແລະ ວິຊາການທີ່ກ່ຽວຂ້ອງ; ເພື່ອປະກອບສ່ວນຢ່າງຕັ້ງໜ້າຊຸກຍູ້ການ ຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ບັນລຸຕາມຄາດໝາຍຂອງມະຕິທີ່ສະ ພາແຫ່ງຊາດຮັບຮອງ. ລະຫວ່າງວັນທີ 04-05 ມີນາ 2024 ກໍາມາທິການບັນດາເຜົ່າ (ກບຜ) ໄດ້ຈັດກອງປະຊຸມສໍາມະນາຍົກສູງບົດບາດການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕໍ່ວຽກງານພັດ ທະນາຊົນນະບົດ ແລະ ແກ້ໄຂຄວາມທຸກຍາກ, ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຮ່ວມຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ຜູ້ຊີ້ນຳວຽກງານກໍາມາທິການບັນດາເຜົ່າ, ທ່ານ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ ແລະ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້; ມີບັນດາທ່ານຮອງປະທານ ກບຜ, ຮອງປະທານສະພາປະຊາຊົນຂັ້ນແຂວງ ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ ແລະ ບັນດາເຜົ່າ, ກຳມະການຂອງ ກບຜ ປະຈຳເຂດເລືອກຕັ້ງທົ່ວປະເທດ, ບັນດາກົມທີ່ກ່ຽວຂ້ອງອ້ອມຂ້າງສູນກາງ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານຂອງ ກບຜ ເຂົ້າຮ່ວມ.
ທ່ານ ຄຳຈັນ ໂສຕາປະເສີດ ໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມຈະໄດ້ຮັບຟັງການສະເໜີບົດຂອງກໍາມາທິການບັນດາເຜົ່າ, ກະຊວງກະສິກໍາ ແລະ ປ່າໄມ້ ແລະ ແລກປ່ຽນບົດຮຽນໃນແຕ່ລະບັນຫາ. ດັ່ງທີ່ພວກເຮົາຮູ້ແລ້ວວ່າ ວິໄສທັດຮອດປີ 2030 ລັດເຮົາໄດ້ວາງຄາດໝາຍແກ້ໄຂຢ່າງສິ້ນເຊີງ; ປະຊາຊົນບັນດາເຜົ່າ ມີພູມລໍາເນົາ, ແຫຼ່ງລາຍຮັບໝັ້ນຄົງ, ເຂົ້າເຖິງການບໍລິການສາທາລະນະຢ່າງທົ່ວເຖິງ ແລະ ມີຄຸນນະພາບ; ຊົນນະບົດໄດ້ຮັບການພັດທະນາແບບຍືນຍົງຢູ່ໃນລະດັບໃກ້ຄຽງກັບຕົວເມືອງ ແລະ ປະກອບສ່ວນສໍາຄັນເຂົ້າໃນການເຊື່ອມໂຍງເສດຖະກິດກັບສາກົນ ແລະ ການຫັນເປັນອຸດສາຫະກໍາ ແລະ ທັນສະໄໝເທື່ອລະກ້າວ; ລະບົບການເມືອງ-ການປົກຄອງຂັ້ນຮາກຖານ ມີຄວາມໜັກແໜ້ນ, ເຂັ້ມແຂງ ຕາມທິດ 3 ສ້າງ; ທົ່ວສັງຄົມມີຄວາມສະຫງົບ-ປອດໄພ ຢ່າງໜັກແໜ້ນ. ເພື່ອປະຕິບັດແຜນພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະວຽກງານພັດທະນາຊົນ ນະບົດ ໃຫ້ມີປະສິດທິພາບ, ປະສິດທິຜົນ ແລະ ປະກອບສ່ວນທີ່ສໍາຄັນ, ມີໝາກຜົນນັ້ນ ຮຽກຮ້ອງມາຍັງບັນດາທ່ານຈົ່ງໄດ້ຍົກສູງຄວາມຮັບຜິດຊອບຂອງຕົນ ເພື່ອຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງມີຈຸດສຸມ ເຂົ້າໃສ່ວຽກງານດັ່ງກ່າວ; ກອງປະຊຸມສໍາມະນາຄັ້ງນີ້ ຈະເຂົ້າໃຈເພີ່ມຕື່ມກ່ຽວກັບຄວາມຮັບຜິດຊອບ, ບັນດານິຕິກໍາ, ກົນໄກການປະສານງານລະຫວ່າງສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນຂັ້ນແຂວງ ກັບຂະແໜງການຕ່າງໆທີ່ກ່ຽວຂ້ອງໃນຂົງເຂດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ.
ກອງປະຊຸມໄດ້ຮັບຟັງການສະເໜີບົດລາຍງານຜົນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ປະຈຳປີ 2023 ແລະ ທິດທາງແຜນການປະຈຳປີ 2024; ຜົນການຕິດຕາມກວດກາບັນດາຄາດໝາຍດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິ 82/ສພຊ ໄລຍະຜ່ານມາ; ນິຕິກຳກ່ຽວກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ຕາມຄຳສັ່ງຂອງກົມການເມືອງສູນກາງພັກ ສະບັບເລກທີ 097/ກມສມ, ລົງວັນທີ 18 ກຸມພາ 2020 ແລະ ຄຳສັ່ງແນະນຳຂອງຄະນະເລຂາທິການສູນກາງພັກ ສະບັບເລກທີ 233/ຄລສພ, ລົງວັນທີ 7 ພະຈິກ 2022; ການກຳນົດຈຸດສຸມພັດທະນາທີ່ເປັນບຸລິມະ ສິດ ລະຫວ່າງສູນກາງ ແລະ ທ້ອງຖິ່ນ ໄລຍະ 2021-2025 ຕາມຂໍ້ຕົກລົງສະບັບເລກທີ 72/ສຍ, ລົງວັນທີ 11 ສິງຫາ 2022 ແລະ ການພັດທະນາບັນດາຈຸດສຸມທີ່ກຳນົດໄວ້; ມາດຕະຖານພົ້ນທຸກ ແລະ ມາດຕະຖານພັດທະນາ ແລະ ການປະເມີນການພົ້ນທຸກ ແລະ ການພັດທະນາ ຕາມດຳລັດສະບັບເລກທີ 348/ລບ, ລົງວັນທີ 16 ພະຈິກ 2017; ບາງເນື້ອໃນກົດໝາຍວ່າດ້ວຍການຈັດສັນພູມລຳເນົາ ສະບັບເລກທີ 45/ສພຊ, ລົງວັນທີ 15 ມິຖຸນາ 2018 ແລະ ຜົນການຈັດຕັ້ງປະຕິບັດ 25 ຈຸດສຸມຈັດສັນພູມລຳເນົາ ແລະ ອາຊີບ ຕາມຂໍ້ຕົກລົງສະບັບເລກທີ 72/ນຍ, ລົງວັນທີ 11 ສິງຫາ 2022; ບາງເນື້ອໃນມະຕິຂອງຄະນະປະຈຳສະພາແຫ່ງຊາດ ວ່າດ້ວຍກົນໄກປະສານງານລະຫວ່າງກຳມາທິການບັນດາເຜົ່າສະພາແຫ່ງຊາດ ກັບບັນດາກະຊວງ-ອົງການທີ່ກ່ຽວຂ້ອງ ສະບັບເລກທີ 109/ຄປຈ, ລົງວັນທີ11 ພຶດສະພາ 2023.
(ພາບ ແລະ ຂ່າວ: ນາງ ຕາດຳ ຫ່ານຟ້າ)