(ສພຊ) ເພື່ອຍົກສູງຄວາມຮັບຮູ້ ແລະ ຄວາມເຂົ້າໃຈກ່ຽວກັບວຽກງານຄົ້ນຄວ້າ ແລະ ສັງລວມເນື້ອໃນກອງປະ ຊຸມ, ການຄົ້ນຄວ້າ, ສ້າງນິຕິກຳໃຕ້ກົດໝາຍ ແລະ ເສີມສ້າງຫົວຄິດປະດິດສ້າງ ໃຫ້ແກ່ເສນາທິການຂອງກຳມາທິການວຽກງານສະມາຊິກສະພາແຫ່ງຊາດ (ສສຊ) ແລະ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ໂດຍສະເພາະວຽກງານຄຸ້ມຄອງສະມາຊິກສະພາ, ວຽກງານກົງຈັກການຈັດຕັ້ງ ແລະ ການກະກຽມການເລືອກຕັ້ງ. ໃນລະຫວ່າງວັນທີ 25-26 ມັງກອນ 2024 ທີ່ສະພາແຫ່ງຊາດ (ສພຊ) ໄດ້ຈັດກອງປະຊຸມຍົກສູງຂີດຄວາມສາມາດໃນການເປັນເສນາທິການໃຫ້ແກ່ກຳມາທິການວຽກງານ ສສຊ ແລະ ຄະນະ ສສຊ ປະຈຳເຂດເລືອກຕັ້ງ ໂດຍການເປັນປະທານຂອງທ່ານ ສຸ ບັນ ສະວະບຸດ ກໍາມະການຄະນະປະຈໍາສະພາສະພາແຫ່ງຊາດ; ມີບັນດາທ່ານຮອງປະທານກຳມາທິການ, ຄະນະກົມ ພ້ອມດ້ວຍພະນັກງານຊ່ວຍວຽກຄະນະ ສສຊ ປະຈຳເຂດເລືອກຕັ້ງ ຈາກ 9 ແຂວງຄື: ນະຄອນຫຼວງວຽງຈັນ, ຫຼວງພະບາງ, ໄຊຍະບູລີ, ຊຽງຂວາງ, ບໍລິຄຳໄຊ, ຄໍາມ່ວນ, ສະຫວັນນະເຂດ, ສາລະວັນ, ຈຳປາສັກ ແລະ ພະນັກງານວິຊາການຈຳນວນໜຶ່ງພາຍໃນ ສພຊ.

ທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ ໄດ້ມີຄຳເຫັນກ່າວເປີດກອງປະຊຸມວ່າ: ກອງປະຊຸມຄັ້ງນີ້ ຖືວ່າມີຄວາມສໍາຄັນຫຼາຍ ເພາະເປັນໄລຍະທີ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຄື່ອນໄຫວມາແລ້ວເຄິ່ງສະໄໝ ເຊິ່ງກໍມີດ້ານຕັ້ງໜ້າ ແລະ ກໍຍັງມີບາງດ້ານທີ່ຈະໄດ້ສຶກສາຄົ້ນຄວ້າປັບປຸງ ເພື່ອຮັບປະກັນການເປັນເສນາທິການ ເຮັດໃຫ້ການເຄື່ອນໄຫວຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສາ ມາດບັນລຸຕາມຄາດໝາຍຕາມທີ່ກົດໝາຍກໍານົດ ໂດຍສະເພາະວຽກງານໃນຄວາມຮັບຜິດຊອບຂອງກໍາມາທິການວຽກງານສະມາຊິກສະພາແຫ່ງຊາດ ເຊິ່ງຕິດພັນໂດຍກົງກັບຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ຄະ ນະປະຈໍາສະພາປະຊາຊົນຂັ້ນແຂວງ; ສະນັ້ນ, ການເຝິກອົບຮົມຄັ້ງນີ້ ຈະໄດ້ຮັບຟັງ ແລະ ແລກປ່ຽນບົດຮຽນເນື້ອໃນຕ່າງໆດັ່ງນີ້: ການຍົກສູງຄວາມຮູ້ ແລະ ຄວາມເຂົ້າໃຈ ກ່ຽວກັບການຄົ້ນຄວ້າ ແລະ ສັງລວມເນື້ອໃນກອງປະຊຸມ; ທັກສະໃນການຄົ້ນຄວ້າ ແລະ ການສ້າງນິຕິກໍາໃຕ້ກົດໝາຍ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ແນະນຳແຜນການເຄື່ອນໄຫວວຽກງານຂອງກຳມາທິການວຽກງານສະມາຊິກສະພາແຫ່ງຊາດ ແຕ່ນີ້ຮອດທ້າຍສະໄໝ (ກອງປະ ຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ X) ແລະ ແຜນການປະຈໍາປີ 2024. ທ່ານຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມ ເອົາໃຈໃສ່ຕິດຕາມຮັບຟັງການສະເໜີບົດຮຽນແຕ່ລະເນື້ອໃນຂອງກອງປະຊຸມທີ່ໄດ້ກ່າວມານັ້ນ ເພື່ອໃຫ້ມີຄວາມເຂົ້າໃຈຢ່າງເລິກເຊິ່ງ, ບັນຫາໃດທີ່ບໍ່ທັນເຂົ້າໃຈ ກໍໃຫ້ມີການສະເໜີຖາມ ແລະ ປຶກສາຫາລືແລກປ່ຽນບົດຮຽນ ນໍາກັນ ເພື່ອຮັບປະກັນໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ກົງຈັກການຈັດຕັ້ງຂອງຕົນມີຄວາມສໍາເລັດ ແລະ ມີປະສິດທິພາບຕາມແຜນການທີ່ວາງໄວ້.

(ຂ່າວ ແລະ ພາບ: ກົງທະນູຄໍາ ພິພັດເສລີ)