(ສພຊ) – ສະຖາບັນຄົ້ນຄວ້ານິຕິກຳສະພາແຫ່ງຊາດ ໄດ້ຈັດກອງປະຊຸມເຝິກອົບຮົມຍົກສູງຂີດຄວາມສາ ມາດການຄົ້ນຄວ້າຄັດຫຍໍ້, ການສົມທຽບຮ່າງກົດໝາຍ ແລະ ການຄົ້ນຄວ້າຄັດຫຍໍ້ຮ່າງແຜນພັດທະນາເສດຖະກິດ-ສັງຄົມ ໃຫ້ແກ່ພະນັກງານຂອງຕົນ ແລະ ກຳມາທິການທີ່ກ່ຽວຂ້ອງຂອງສະພາແຫ່ງຊາດ ໃນວັນທີ 15-19 ກໍລະ ກົດນີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳ ເຊິ່ງວິທະຍາກອນຈາກມູນນິທິອາຊີ (The Asia Foundation-TAF) ທ່ານ ມານະ ສຸທິຈັກ ທີ່ປຶກສາດ້ານການພັດທະນາເສດຖະກິດ ແລະ ການຄ້າລະຫວ່າງປະເທດ.
ຜູ້ເຂົ້າຮ່ວມໄດ້ຮັບຟັງການສະເໜີບົດຮຽນ: ພາບລວມຂອງຂະບວນການສ້າງນິຕິກຳ ແລະ ການບໍລິການຄົ້ນຄວ້ານິຕິກຳ ຂອງ ຫວຽດນາມ, ອາເມລິກາ, ຝຣັ່ງ, ຈີນ; ວິທີການຄົ້ນຄວ້າ ແລະ ຮູບແບບບົດຄັດຫຍໍ້ນະໂຍ ບາຍ; ຂອບເຂດການຄົ້ນຄວ້າ ແລະ ການກຳນົດຂໍ້ມູນທີ່ຕ້ອງການ. ຈາກນັ້ນ, ກໍໄດ້ສົນທະນາແລກປ່ຽນຄຳເຫັນເຊິ່ງກັນແລະກັນ, ແບ່ງກຸ່ມເພື່ອເຝິກຫັດຕົວຈິງແຕ່ລະເນື້ອໃນ. ໃນມື້ສຸດທ້າຍ, ໄດ້ມີພິທີມອບໃບຢັ້ງຢືນຜົນສຳເລັດໃຫ້ແກ່ນັກເຝິກອົບຮົມອີກດ້ວຍ.
ທ່ານ ສິນທະລາ ຫຼ້າສຸກສະໄໝ ມີຄຳເຫັນວ່າ: ກອງປະຊຸມຄັ້ງນີ້ ສາມາດຕີລາຄາໄດ້ວ່າມີຜົນສໍາເລັດອັນຈົບງາມຕາມຈຸດປະສົງ ແລະ ລະດັບຄາດໝາຍ, ແຕ່ພວກເຮົາຍັງຈະຕ້ອງໄດ້ສືບຕໍ່ພ້ອມກັນຄົ້ນຄວ້າ ແລະ ຮຽນຮູ້ຕື່ມໃຫ້ກວ້າງຂວາງກວ່າເກົ່າ; ຜົນສໍາເລັດທີ່ເປັນຮູບປະທໍາໃນໄລຍະຍາວ ແລະ ມີໝາກຜົນອັນກວ້າງຂວາງນັ້ນ ແມ່ນອີງໃສ່ການຈັດຕັ້ງຜັນຂະຫຍາຍບົດຮຽນເຂົ້າໃນວຽກງານຕົວຈິງຕາມພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ໄດ້ຮັບຜົນສຳເລັດສູງຂຶ້ນເລື້ອຍໆ.
ການເຝິກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກ TAF ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.
(ຂ່າວ-ພາບ: ອານຸສອນ ພູມມີທອນ)