(ສພຊ) ເພື່ອເຮັດໃຫ້ການຕິດຕາມກວດກາວຽກງານໃນຂົງເຂດຍຸຕິທໍາ ໄດ້ຮັບການຈັດຕັ້ງປະຕິບັດຢ່າງມີໝາກຜົນ ຈຶ່ງມີຄວາມຈຳເປັນເພີ່ມທະວີ ແລະ ຍົກສູງຄຸນນະພາບຂອງ ສະມາຊິກສະພາແຫ່ງຊາດ ທີ່ສັງກັດກຳມາທິການຍຸຕິທຳ ໃຫ້ຮັບຮູ້, ເຂົ້າໃຈ ແລະ ສາມາດປະຕິບັດພາລະບົດບາດຕິດຕາມກວດກາ ຕາມຂອບເຂດສິດ ແລະ ໜ້າທີ່ຂອງຕົນ ໄດ້ເປັນຢ່າງດີ; ເພື່ອຍົກສູງຂີດຄວາມສາມາດຂອງພະນັກງານ-ລັດຖະກອນ ຂອງກໍາມາທິການຍຸຕິທໍາ ແລະ ຄະນະກຳມະການຍຸຕິທໍາ ແລະ ປກຊ-ປກສ ສະພາປະຊາຊົນຂັ້ນແຂວງ ແລະ ການຄົ້ນຄວ້າ, ເກັບກຳຂໍ້ມູນ, ວິເຄາະວິໄຈ ແລະ ສະໜອງຂໍ້ມູນກ່ຽວກັບການຕິດຕາມກວດກາວຽກງານຍຸຕິທຳ ໃຫ້ແກ່ຄະນະກຳມາທິການຍຸຕິທຳ ສະພາແຫ່ງຊາດ ແລະ ຄະນະກໍາມະການຍຸຕິທໍາ ແລະ ປກຊ-ປກສ ໃນການປະກອບຄຳເຫັນ, ຊັກຖາມໃນທີ່ປະຊຸມ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ໃນການຕິດຕາມກວດກາມີຜົນສັກສິດຍິ່ງຂຶ້ນ. ກໍາມາທິການຍຸຕິທໍາ ສະພາແຫ່ງຊາດ ໄດ້ຈັດກອງປະຊຸມສໍາມະນາຍົກສູງຂີດຄວາມສາມາດໃນການຕິດຕາມກວດກາວຽກງານຍຸຕິທໍາ ໃນລະຫວ່າງວັນທີ 8-9 ພຶດສະພາ 2023 ທີ່ແຂວງໄຊຍະບູລີ ໂດຍການເປັນປະທານຮ່ວມລະຫວ່າງທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທໍາສະພາແຫ່ງຊາດ ແລະ ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ, ເຂົ້າຮ່ວມມີທ່ານເລຂາທິການສະພາປະຊາຊົນແຂວງໄຊຍະບູລີ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ສັງກັດກຳມາທິການຍຸຕິທຳ ຈາກ 11 ແຂວງຄື: ຜົ້ງສາລີ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ, ໄຊສົມບູນ, ວຽງຈັນ ແລະ ນະຄອນຫຼວງວຽງຈັນ ແລະ ແຂກຖືກເຊີນ.

ກອງປະຊຸມ ໄດ້ຮັບຟັງການສະເໜີບົດການຕິດຕາມກວດກາຂອງສະພາແຫ່ງຊາດ ແລະ ການຕິດຕາມກວດກາວຽກງານຍຸຕິທຳ, ການສະເໜີບົດການຄົ້ນຄວ້າການແຕ່ງຕັ້ງ, ຍົກຍ້າຍ ຫຼື ປົດຕຳແໜ່ງບຸກຄະລາກອນຂອງສານປະຊາຊົນ; ຈາກນັ້ນ ຜູ້ເຂົ້າຮ່ວມ ໄດ້ພ້ອມກັນປະກອບຄຳຄິດຄຳເຫັນຢ່າງສ້າງສັນ, ມີຈຸດສຸມ ແລະ ກົງໄປກົງມາ; ກອງປະຊຸມ ຍັງໄດ້ແລກປ່ຽນບົດຮຽນ ແລະ ປະສົບການຂອງບາງເຂດເລືອກຕັ້ງ ໃນການຈັດຕັ້ງປະຕິບັດວຽກງານຕິດຕາມກວດກາຂອງຄະນະກຳມະການຍຸຕິທຳ, ປກຊ-ປກສ ສະພາປະຊາຊົນຂັ້ນແຂວງ ແລະ ແລກປ່ຽນບົດຮຽນການຕິດຕາມກວດກາໂດຍຜ່ານຄຳຮ້ອງຂໍຄວາມເປັນທຳ.

ໃນພິທີເປີດກອງປະຊຸມ, ທ່ານ ສີສູນທອນ ສ.ຜາບມີໄຊຍ໌ ໄດ້ມີຄຳເຫັນຕໍ່ກອງປະຊຸມວ່າ: ກອງປະຊຸມສຳມະນາຍົກສູງຂີດຄວາມສາມາດ ໃນການຕິດຕາມກວດກາວຽກງານຍຸຕິທຳຄັ້ງນີ້ ມີຄວາມໝາຍສຳຄັນເປັນຢ່າງຍິ່ງ ບັນດາເນື້ອໃນທີ່ນຳມາພິຈາລະນາໃນກອງປະຊຸມຄັ້ງນີ້ ເຫັນວ່າມີຄວາມໝາຍສຳຄັນ ເຖິງວ່າຈະມີເວລາຈຳກັດ; ສະນັ້ນ ເພື່ອເຮັດໃຫ້ບັນດາເນື້ອໃນຂອງກອງປະຊຸມໄດ້ຮັບພິຈາລະນາ, ຄົ້ນຄວ້າຢ່າງເລິກເຊິ່ງ ຮຽກຮ້ອງມາຍັງບັນດາທ່ານຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ແທນກອງປະຊຸມ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ຕໍ່ກັບບັນດາເນື້ອໃນທີ່ນຳມາພິຈາລະນາໃນກອງປະຊຸມຄັ້ງນີ້ ຢ່າງກົງໄປກົງມາ, ມີເຫດມີຜົນ ເພື່ອເຮັດໃຫ້ບັນດາເນື້ອໃນຕ່າງໆນັ້ນ ສາມາດຮັບຮອງເອົາ ແລະ ນຳໄປຈັດຕັ້ງຜັນຂະຫຍາຍ ໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ໃຫ້ມີຜົນສຳເລັດຫຼາຍຂຶ້ນກວ່າເກົ່າ.

ກອງປະຊຸມຄັ້ງນີ້, ໄດ້ຮັບການສະໜັບສະໜູນທຶນຈາກ ໂຄງການຊ່ວຍເຫຼື່ອຂອງ ມູນນິທິເວສມິນສະເຕີ (WFD) ແລະ ກອງປະຊຸມຈະດຳເນີນໄປຈົນຮອດວັນທີ 9 ພຶດສະພາ 2023 ຈຶ່ງຈະສຳເລັດ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)