ໃນລະຫວ່າງວັນທີ 14 ຫາ 15 ກໍລະກົດ 2022 ຢຸ່ທີ່ສະໂມສອນຫ້ອງວ່າການເມືອງພີນ ແຂວງສະຫວັນນະເຂດ ສະພາປະຊາຊົນແຂວງໆສະຫວັນນະເຂດ ໄດ້ຈັດກອງປະຊຸມຝຶກອົບຮົມ ສ້າງຄວາມເຂັ້ມແຂງ ໃນການຕິດຕາມກວດກາ ການຈັດຕັ້ງປະຕິບັດແຜນພັດຖະນາເສດຖະກິດ-ສັງຄົມ ແລະ ແຜນງົບປະມານ; ການພິຈາລະນາຄໍາຮ້ອງຂໍຄວາມເປັນທຳ ແລະ ນະໂຍບາຍຂອງພັກຕໍ່ວຽກງານຊົນເຜົ່າ-ສາສະໜາໃຫ້ແກ່ສະມາຊິກສະພາປະຊາຊົນແຂວງ ແລະ ພະນັກງານ-ລັດຖະກອນ ຂອງສະພາປະຊາຊົນແຂວງ ໂດຍການເປັນປະທານ
ຂອງທ່ານ ຄຳຜັນ ຄູນສະຫວັນ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ ໃຫ້ກຽດເຂົ້າຮ່ວມ ແລະ ເປັນນັກວິທະຍາກອນ ໂດຍທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງີນ ແລະ ການກວດສອບ ສະພາແຫ່ງຊາດ, ພ້ອມດ້ວຍທ່ານ ສາລີ ວິນລາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆພີນ, ມີບັນດາທ່ານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ ຊຸດທີ II ປະຈຳເຂດເລືອກຕັ້ງ 14 ເມືອງ ແລະ 01 ນະຄອນ ໃນທົ່ວແຂວງ, ນັກວິທະຍາກອນຈາກສູນກາງ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານວິຊາການ ຈຳນວນໜຶ່ງພາຍໃນສະພາປະຊາຊົນແຂວງເຂົ້າຮ່ວມ.
ຈຸດປະສົງໃນການຈັດຝຶກອົບຮົມຄັ້ງນີ້ ກໍເພື່ອສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນແຂວງ ແລະ ເສນາທິການຊ່ວຍວຽກ ຂອງສະພາປະຊາຊົນແຂວງສະຫວັນນະເຂດ ພ້ອມທັງເປັນການຍົກລະດັບຄວາມຮູ້,ຄວາມສາມາດໃນການຈັດຕັ້ງປະຕິບັດໜ້າທີ່ວຽກງານໃນສາມພາລະບົດບາດ ຕົ້ນຕໍຂອງສະພາປະຊາຊົນແຂວງ ທີ່ໄດ້ກຳນົດໄວ້: ດ້ານນິຕິບັນຍັດ ແມ່ນ ສ້າງ ແລະ ປັບປຸງນິຕິກໍາໃຕ້ກົດໝາຍ, ດ້ານການຕົກລົງບັນຫາພື້ນຖານສຳຄັນຂອງແຂວງ ເປັນຕົ້ນ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ແລະ ດ້ານການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ພາຍໃນແຂວງ. ຊຶ່ງໃນກອງປະຊຸມແມ່ນໄດ້ຮັບຟັງການນໍາສະເໜີ ແລະ ບັນຍາຍເນື້ອໃນເອກະສານຈາກນັກວິທະຍາກອນທີ່ມີຄວາມຮູ້,ຄວາມສາມາດ, ມີປະສົບການຕົວຈິງ ຈາກຂັ້ນກໍາມາທິການ ແລະ ກົມຕ່າງໆຂອງສະພາແຫ່ງຊາດ ແລະ ຈາກສະພາປະຊາຊົນ
ແຂວງ ປະກອບມີ 04 ຫົວຂໍ້ : ນະໂຍບາຍຂອງພັກຕໍ່ກັບວຽກງານຊົນເຜົ່າ ແລະ ສາສະໜາ; ການພິຈາລະນາຄໍາຮ້ອງຂໍຄວາມເປັນທໍາຂອງສະພາແຫ່ງຊາດ ແລະ ສະພາປະຊາຊົນແຂວງ; ການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ; ການສ້າງຄວາມເຂັ້ມແຂງ ໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານຂອງຄະນະ
ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ-ນະຄອນ ຈາກນັ້ນຜູ້ແທນທີ່ເຂົ້າຮ່ວມກອງປະຊຸມ ກໍ່ໄດ້ຄົ້ນຄ້ວາແລກປຽນບົດຮຽນ ພ້ອມທັງປະກອບຄຳຄິດ-ຄຳເຫັນ ເຊິ່ງກັນ ແລະ ກັນ ໃນແຕ່ລະຫົວຂໍ້ທີ່ນຳມາສະເໜີ ເຮັດໃຫ້ມີເນື້ອໃນເລີກເຊິ່ງ ແລະ ສາມາດນຳໄປໝູນໃຊ້ເຂົ້າໃນວຽກງານຕົວຈິງໃຫ້ເກີດດອກອອກຜົນ ເຮັດໃຫ້ແຜນການຈັດຝຶກອົບຮົມ ໄດ້
ຮັບຜົນສຳເລັດຕາມຈຸດປະສົງ ແລະ ລະດັບ ຄາດໝາຍ ທີ່ວາງໄວ້. ກອງປະຊຸມຝຶກອົບຮົມໃນຄັ້ງນີ້ ແມ່ນໄດ້ຮັບການສະໜັບສະໜູນໂດຍ: ຈາກແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດ ທີ່ປົກຄອງດ້ວຍກົດໝາຍ ( ແຜນງານເຊກາ-CEGGA ).
ພາບ-ຂາວ:ນນ.ຄອນສະຫວັນ ເມກສະຫວັນ
