I’m(ສພຊ)ລະຫວ່າງວັນທີ 19-21 ທັນວາ 2021, ທີ່ເມືອງນາກາຍ ແຂວງຄຳມ່ວນ ກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ໄຂກອງປະຊຸມເຝິກອົບຮົມ ໃນຫົວຂໍ້ “ການສ້າງສາລະຄະດີ ແລະ ສຳເນົາຮູບພາບ-ວິດີໂອ” ໃຫ້ແກ່ເລຂາ-ຮອງເລຂາທິການສະພາປະຊາຊົນແຂວງແລະ ວິຊາການຂອງແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ເຂົ້າຮ່ວມມີທ່ານ ນາງ ບົວກາ ແກ້ວມະນີ ເຈົ້າເມືອງໆນາກາຍ; ມີຮອງເລຂາທິການສະພາແຫ່ງຊາດ, ບັນດາທ່ານເລຂາ-ຮອງເລຂາທິການສະພາປະຊາຊົນແຂວງ, ຄະນະກົມ, ຄະນະພະແນກ ແລະ ວິຊາການຂອງ 6 ແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງຈາກກົມສື່ມວນຊົນ ຄະນະເລຂາທິການສະພາແຫ່ງຊາດ ເຊິ່ງກອງປະຊຸມດັ່ງກ່າວ ໄດ້ຮັບການສະໜັບສະໜູນຈາກແຜນງານມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດິນ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).
ທັງນີ້, ເພື່ອຊ່ວຍສະພາປະຊາຊົນແຂວງສ້າງສາລະຄະດີຜົນງານການເຄື່ອນໄຫວຂອງສະພາປະຊາຊົນຂັ້ນແຂວງ/ນະຄອນຫລວງ ຊຸດທີ I, ເພື່ອເກັບກໍາ, ສໍາເນົາຮູບພາບ ແລະ ວິດີໂອການເຄື່ອນໄຫວຂອງສະພາປະຊາຊົນຂັ້ນແຂວງ/ນະຄອນຫລວງ ຊຸດທີ I; ຍົກສູງຄຸນນະພາບຂອງວຽກງານສື່ ໃນຖານະເປັນກະບອກສຽງຂອງສະພາແຫ່ງຊາດ ເພື່ອໂຄສະນາເຜີຍແຜ່ການເຄື່ອນໄຫວຂອງອົງການນິຕິບັນຍັດ ເປັນຕົ້ນແມ່ນສະພາແຫ່ງຊາດ ແລະ ສະພາປະຊາຊົນຂັ້ນແຂວງ/ນະຄອນຫລວງ ທັງເປັນຂົວຕໍ່ລະຫວ່າງປະຊາຊົນກັບຕົວແທນຂອງເຂົາເຈົ້າ ກໍຄືສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນແຂວງ (ສສຂ), ສະໜອງຂໍ້ມູນ-ຂ່າວສານ ໃຫ້ແກ່ ສສຊ, ສສຂ ແລະ ປະຊາຊົນ ຢູ່ເຂດເລືອກຕັ້ງຕ່າງໆໃນທົ່ວປະເທດແລະ ເພື່ອກວດຜ່ານປື້ມບັນທຶກ “ຜູ້ແທນປະຊາຊົນ” ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II.
ກອງປະຊຸມ ໄດ້ຮັບຟັງການລາຍງານໂດຍຫຍໍ້ ຈາກທ່ານເຈົ້າເມືອງໆນາກາຍ ກ່ຽວກັບທີ່ຕັ້ງ-ຈຸດພິເສດ ແລະ ສະພາບລວມໃນການພັດທະນາເສດຖະກິດ-ສັງຄົມຮອບດ້ານ ຢູ່ເມືອງນາກາຍວ່າ: ເມືອງນາກາຍ ເປັນເມືອງໜຶ່ງທີ່ນອນໃນ 10 ເມືອງ ທີ່ຂຶ້ນກັບແຂວງຄຳມ່ວນ ຕັ້ງຢູ່ທິດຕາເວັນອອກສ່ຽງເໜືອຂອງແຂວງ ຕັ້ງຢູ່ເທິງພູພຽງນາກາຍ ແລະ ມີອ່າງນ້ຳເທີນ 2 ມີຄວາມສູງຈາກລະດັບໜ້ານ້ຳທະເລ 500-600 ແມັດ ໄລຍະຫ່າງຈາກເທສະບານແຂວງ 77 ກິໂລແມັດ ມີເນື້ອທີ່ລວມທັງໝົດ 3.400 ກິໂລຕາແມັດ, ມີ 6 ກຸ່ມບ້ານ, ມີ 31 ບ້ານ, ມີ 68 ຄຸ້ມບ້ານ, ມີ 6.098 ຄອບຄົວ, ມີພົນລະເມືອງ 28.951 ຄົນ ຍິງ 13.692 ຄົນ, ປະກອບມີ 3 ຊົນເຜົ່າຄື: ເຜົ່າລາວ ກວມເອົາ 34%, ເຜົ່າມະກອງ ກວມເອົາ 55%, ເຜົ່າແຊກ ກວມເອົາ4%, ເຜົ່າກຼີ ກວມເອົາ 2% ແລະ ເຜົ່າໄຕກວມເອົາ 5%, ມີຊາຍແດນເຊື່ອມຕໍ່ກັບ 4 ຕົວເມືອງພາຍໃນແຂວງ, 1 ເມືອງຕ່າງແຂວງ ແລະ ມີຊາຍແດນເຊື່ອມຕໍ່ລະຫວ່າງຊາດລາວ-ຫວຽດນາມ; ອີງໃສ່ຈຸດພິເສດທີ່ຕັ້ງພູມສັນຖານຂອງເມືອງໄດ້ແບ່ງອອກເປັນ 3 ເຂດນິເວດວິທະຍາຄື: 1. ເຂດພູດອຍ: ເຂດນີ້ກວມເອົາເຂດປ່າສະຫງວນແຫ່ງຊາດນາກາຍ-ນໍ້າເທີນ ເປັນສ່ວນໃຫຍ່ ຫລື ເອີ້ນວ່າເຂດຄຸ້ມຄອງອຸທິຍານແຫ່ງຊາດນາກາຍ-ນໍ້າເທີນ 2 ກວມເອົາ 13 ບ້ານ, 2. ເຂດພູພຽງ: ເປັນເຂດທີ່ຕັ້ງຢູ່ເທິງພູອາກມີອ່າງນ້ຳຂະໜາດໃຫຍ່ ເຊິ່ງມີເນື້ອທີ່ 450 ກິໂລຕາແມັດ ຫລື ເອີ້ນວ່າເຂດຍົກຍ້າຍຈັດສັນປະຊາຊົນໂຄງການໄຟຟ້ານ້ຳເທີນ 2 ກວມເອົາ 10 ບ້ານ; 3. ເຂດທົ່ງພຽງ: ເປັນເຂດທົ່ງພຽງເຊິ່ງອ້ອມຮອບດ້ວຍປ່າສະຫງວນ ເຊື່ອມຕໍ່ພູຫີນໜາມໜໍ່ ມີເນື້ອທີ່ 43.730 ເຮັກຕາ ກວມເອົາ 8 ບ້ານ; ປະຊາຊົນສ່ວນຫລາຍຖືເອົາອາຊີບປູກຝັງ-ລ້ຽງສັດ ແລະ ຄ້າຂາຍ.
ປັດຈຸບັນ ກຳລັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ນັບແຕ່ປີ 2020–2024 ຕາມ 6 ເປົ້າໝາຍ, 56 ໂຄງການ ແລະ 93 ໂຄງການຍ່ອຍ ແລະ ໄດ້ກຳນົດເອົາຈຸດສຸມພັດທະນາຄື: ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ, ໂຮມບ້ານນ້ອຍເຂົ້າເປັນບ້ານໃຫຍ່, ສ້າງບ້ານເປັນຫົວໜ່ວຍພັດທະນາຕາມທິດສາມສ້າງ.
ທ່ານ ນາງ ປິ່ງຄຳ ລາຊະສິມມາ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ:ເພື່ອເປັນການພັດທະນາວຽກງານສື່ມວນຊົນ, ສື່ອອນລາຍ, ເວັບໄຊ ຂອງສະພາແຫ່ງຊາດ ແລະ ການສ້າງສາລະຄະດີ ຂອງສະພາປະຊາຊົນຂັ້ນແຂວງ ເພື່ອເຮັດໃຫ້ການເຜີຍແຜ່ຂໍ້ມູນຂ່າວສານ ທັນກັບສະພາບການໃນໄລຍະໃໝ່, ມີຄຸນນະພາບ ແລະ ທັນສະໄໝຍິ່ງຂຶ້ນ ລວມທັງການປະສານງານວຽກງານວິຊາສະເພາະ ລະຫວ່າງສະພາແຫ່ງຊາດ ກັບສະພາປະຊາຊົນຂັ້ນແຂວງ ໄດ້ມີການຫັນປ່ຽນຢ່າງຕັ້ງໜ້າໃນສະພາບ ແລະເງື່ອນໄຂໃໝ່; ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມສຸມໃສ່ຄົ້ນຄວ້າ, ປຶກສາຫາລື, ປະກອບຄຳເຫັນ ແລະ ເກັບກຳຂໍ້ມູນ-ບົດຮຽນຕ່າງໆ ເພື່ອເຮັດໃຫ້ກອງປະຊຸມເຝິກອົບຮົມຄັ້ງນີ້ ບັນລຸຜົນສຳເລັດຕາມຄາດໝາຍທີ່ວາງໄວ້.
ຜູ້ເຂົ້າຮ່ວມກອງປະຊຸມ ໄດ້ຮັບຟັງບົດຮຽນກ່ຽວກັບພື້ນຖານການຂຽນບົດສາລະຄະດີ, ເຕັກນິກພື້ນຖານການຖ່າຍທຳ ແລະ ຕັດຕໍ່; ບົດຮຽນກ່ຽວກັບຄວາມຮູ້ພື້ນຖານການນຳໃຊ້ເວັບໄຊ, ຫລັກການຂຽນຂ່າວລົງສື່ອອນລາຍ, ການຖ່າຍທຳນອກສະຖານທີ່ ແລະ ກວດຟີມສາລະຄະດີ ສະພາປະຊາຊົນແຂວງ/ນະຄອນຫລວງ; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ສຸມໃສ່ຄົ້ນຄວ້າປະກອບຄໍາເຫັນ ແລະ ເກັບກຳຂໍ້ມູນຕ່າງໆ ໂດຍຜ່ານຮູບແບບເຝິກຫັດຕັດຕໍ່ຕົວຈິງ.
(ພາບ ແລະ ຂ່າວ: ສອນສັກ ວັນວິໄຊ)