(ສພຊ) – ກໍາມາທິການບັນດາເຜົ່າ (ກບຜ) ໄດ້ຈັດກອງປະຊຸມເຝິກອົບຮົມຍົກຂີດຄວາມສາມາດ ປະຈຳປີ 2024 ໃຫ້ແກ່ພະນັກງານພາຍໃນກໍາມາທິການ ໃນວັນທີ 25-26 ທັນວານີ້ ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ ເຊິ່ງມີທ່ານຮອງປະທານ ກບຜ, ແຂກຖືກເຊີນຈາກພາຍໃນສະພາແຫ່ງຊາດ (ສພຊ), ສູນກາງແນວລາວສ້າງຊາດ ແລະ ກະຊວງພາຍໃນ ເຂົ້າຮ່ວມ 44 ທ່ານ.

ທ່ານ ນາງ ທັດສະດາພອນ ຈັນທະມາດ ກ່າວວ່າ: ກອງປະຊຸມຄັ້ງນີ້ ເປັນການຍົກສູງຂີດຄວາມສາມາດ, ເພີ່ມທັກສະໃນການປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງພະນັກງານ ເພື່ອຮັບປະກັນການເປັນເສນາທິການທີ່ດີໃຫ້ແກ່ພະແນກ, ກົມ ກໍຄືກຳມາທິການ ໃຫ້ມີຄວາມເຂັ້ມແຂງຂຶ້ນເທື່ອລະກ້າວ ພ້ອມທັງເຊື່ອມຊຶມບັນດານິຕິກຳທີ່ກ່ຽວຂ້ອງໃນຂົງເຂດວຽກງານຂອງກຳມາທິການບັນດາເຜົ່າ, ກະຊວງພາຍໃນ, ສູນກາງແນວລາວສ້າງຊາດ ເພື່ອນຳໄປຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານທີ່ຕົນຮັບຜິດຊອບ.

ກອງປະຊຸມໄດ້ຮັບຟັງການເຜີຍແຜ່ເນື້ອໃນມະຕິກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ກ່ຽວກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, (ຮ່າງ) ມະຕິກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ກ່ຽວກັບວຽກງານ 3 ສ້າງ, ເຜີຍແຜ່ເນື້ອໃນ (ຮ່າງ) ປຶ້ມ 50 ຊົນເຜົ່າໃນວົງຄະນາຍາດແຫ່ງ ສປປລາວ, ເນື້ອໃນວຽກງານແນວໂຮມ ແລະ ວຽກງານຊັ້ນຄົນ-ສັງຄົມ, ບົດຮຽນການແຍກໂຄງປະກອບການຈັດຕັ້ງ (ແຍກພະແນກ), ບາງເນື້ອໃນການກຳນົດຕຳແໜ່ງງານຂອງຂັ້ນພະແນກ, ບາງເນື້ອໃນຂອງດຳລັດວ່າດ້ວຍອົງການຈັດຕັ້ງສັງຄົມໃນໄລຍະຜ່ານມາ ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂ.

ຜູ້ເຂົ້າຮ່ວມໄດ້ຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ໂດຍສຸມໃສ່ຈຸດປະສົງທີ່ບັນດາວິທະຍາກອນໄດ້ຍົກຂຶ້ນ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.

(ສອນສັກ ວັນວິໄຊ)