(ສພຊ) – ເພື່ອຍົກລະດັບໃຫ້ແກ່ພະນັກງານທີ່ເປັນເລຂານຸການຂອງ​ບັນດາການນຳ ​ມີຄວາມຮູ້, ຄວາມສາມາດ, ເສີມສ້າງທັກສະບຸກຄະລິກກະພາບ ໃນການປະກອບສ່ວນເຮັດໜ້າທີ່ວຽກງານທີ່ກ່ຽວຂ້ອງ ໃຫ້ສົມບູນ ແລະ ຕອບສະໜອງການປະຕິບັດໜ້າທີ່ວຽກງານດັ່ງກ່າວ ໄດ້ຮັບຜົນດີ, ມີປະສິດທິພາບ, ປະສິດທິຜົນດີຍິ່ງໆຂຶ້ນ; ຄະນະເລຂາທິການ​ສະພາ​ແຫ່ງ​ຊາດ ຈຶ່ງໄດ້ຈັດ​ກອງປະຊຸມເຝິກອົບຮົມສ້າງຄວາມເຂັ້ມແຂງດ້ານການເກັບກຳຂໍ້ມູນ, ສັງລວມ ແລະ ຂີດຂຽນເອກະສານ ໃຫ້ແກ່ບັນດາເລຂານຸການການນຳພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນລະຫວ່າງວັນ​​ທີ 29-30 ມີນາ 2024 ໂດຍ​ການ​ເປັນ​ປະທານ​ຂອງ​ທ່ານ ສິງ​ຄຳ ວົງ​ພະຈັນ ຮອງ​ເລຂາທິການ​ສະພາ​ແຫ່ງ​ຊາດ.
ຊຸດເຝິກອົບຮົມໄດ້ສຸມໃສ່ຮຽນຮູ້ດ້ານທິດສະດີ, ຄົ້ນຄວ້າແລກປ່ຽນສົນທະນາ ແລະ ຈັດຕັ້ງແບ່ງກຸ່ມເພື່ອລົງເລິກ​ເຝິກຫັດຕົວຈິງຕໍ່ບັນດາເນື້ອໃນກ່ຽວ​ກັບບົດຮຽນໃນການກະກຽມບົດພົບປະປະຊາຊົນ ແລະ ການຮ່າງບົດລາຍງານພາຍຫຼັງລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນຂອງສະພາແຫ່ງຊາດ, ​ບົດຮຽນໃນການຂຽນບົດຄໍາເຫັນໃນການພົບປະສອງຝ່າຍ ແລະ ຫຼາຍຝ່າຍ, ບົດຮຽນວຽກງານພິທີການທູດ ​ເຊິ່ງຜູ້​ເຂົ້າ​ຮ່ວມ​ໄດ້ສຸມສະຕິປັນຍາເຂົ້າໃນການຄົ້ນຄວ້າແລກປ່ຽນບົດຮຽນຕໍ່ບັນດາເນື້ອໃນທີ່ນຳມາແລກປ່ຽນກັນຢ່າງຟົດຟື້ນ, ສ້າງສັນ, ກ້າສະແດງອອກ, ແລກປ່ຽນບົດຮຽນທິດສະດີ ແລະ ສົມທຽບໃສ່ກັບການປະຕິບັດວຽກງານຕົວຈິງຂອງຕົນ; ພ້ອມ​ນັ້ນ, ກໍໄດ້ສົນທະນາແລກປ່ຽນບົດຮຽນປະສົບການຕົວຈິງທີ່ຕົນເອງໄດ້ປະສົບພົບພໍ້ມາ ໂດຍສະເພາະແມ່ນການເປັນເລຂານຸ ການ, ສິ່ງທີ່ໄດ້ຮຽນຮູ້ຈາກບັນດາທ່ານການນຳຂອງຕົນ ເຊັ່ນ: ຄຸນສົມບັດ, ທັດສະນະຄະຕິ, ແບບແຜນວິທີເຮັດວຽກ, ການນຳພາ-ຊີ້ນຳ, ວິທີຂີດຂຽນ, ທັກສະໃນການບໍລິຫານເວລາ ແລະ ອື່ນໆ ລ້ວນແຕ່ເປັນຄຸນຄ່າໃຫ້ແກ່ການປະຕິບັດໜ້າທີ່ເພື່ອກ້າວໄປສູ່ການເປັນຜູ້ບໍລິຫານ, ຜູ້ນຳພາ ເຊິ່ງປັດຈຸບັນຫຼາຍທ່ານກໍກາຍເປັນພະນັກງານຄຸ້ມຄອງຂັ້ນກົມ, ຂັ້ນພະແນກ ຫຼື ຕຳແໜ່ງທຽບເທົ່າຂັ້ນພະແນກແລ້ວ; ນອກຈາກນັ້ນ, ຍັງໄດ້ຍົກບັນຫາທີ່ນອນຢູ່ໃນຄວາມຮັບຜິດຊອບ, ສິດ ແລະ ໜ້າທີ່ຂອງຕົນ ມາແລກປ່ຽນບົດຮຽນ ແລະ ສະເໜີຕໍ່ການຈັດຕັ້ງ ເພື່ອຮັບປະກັນຄວາມເຂົ້າໃຈຖືກຕ້ອງສອດ ຄ່ອງກັບນິຕິກຳວາງອອກ ແລະ ສະພາບຄວາມເປັນຈິງຂອງວຽກງານສະພາແຫ່ງຊາດ (ສພຊ) ແລະ ສະພາປະຊາຊົນຂັ້ນແຂວງ (ສພຂ) ໃນໄລຍະໃໝ່.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ເຊິ່ງມີ​ບັນດາທ່ານວິທະຍາກອນຜູ້ຊົງຄຸນວຸດທິຈາກກຳມາທິການວຽກງານສະມາຊິກສະພາແຫ່ງຊາດ, ກົມພົວພັນລັດຖະສະພາສອງຝ່າຍ ກຳມາທິການການຕ່າງປະເທດ ແລະ ກະຊວງການຕ່າງປະເທດ; ບັນດາສຳມະນາກອນ​ທີ່ເປັນ​ເລຂາ​ນຸການການ​ນຳ​​ພາຍໃນ​ ສພຊ, ເລຂາ​ນຸການບັນດາທ່ານປະທານ-ຮອງປະທານ ສພຂ 18 ແຂວງ​​ທົ່ວ​ປະ​ເທດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
(ຂ່າວ-ພາບ: ນາງ ປາ​ກາ​ລັກ ພົມ​ມີ​ໄຊ)