(ສພຊ) ວັນທີ 4-5 ກັນຍາ 2021, ທີ່ເມືອງວັງວຽງ ແຂວງວຽງຈັນ ກົມສື່ມວນຊົນ ສະພາແຫ່ງຊາດ (ສພຊ) ໄດ້ໄຂກອງປະຊຸມເຝິກອົບຮົມ ໃນຫົວຂໍ້ “ການສ້າງສາລະຄະດີ ແລະ ສຳເນົາຮູບພາບ-ວີດີໂອ” ໃຫ້ແກ່ເລຂາ-ຮອງເລຂາທິການສະພາປະຊາຊົນແຂວງ/ນະຄອນຫລວງ ແລະ ວິຊາການຂອງ ແຂວງຫົວພັນ, ຊຽງຂວາງ, ວຽງຈັນ, ບໍລິຄຳໄຊ,  ໄຊສົມບູນ ແລະ ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ; ເຂົ້າຮ່ວມມີຮອງເລຂາທິການສະພາແຫ່ງຊາດ, ບັນດາທ່ານເລຂາ-ຮອງເລຂາທິການສະພາປະຊາຊົນແຂວງ/ນະຄອນຫລວງ, ຄະນະກົມ, ຄະນະພະແນກ ແລະ ວິຊາການຂອງ 6 ແຂວງ ພ້ອມດ້ວຍພະນັກງານວິຊາການທີ່ກ່ຽວຂ້ອງຈາກກົມສື່ມວນຊົນ ຈາກ ສພຊ ເຊິ່ງກອງປະຊຸມດັ່ງກ່າວໄດ້ຮັບການສະໜັບສະໜູນຈາກແຜນງານມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດິນ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).

ທັງນີ້, ເພື່ອຊ່ວຍສະພາປະຊາຊົນແຂວງສ້າງສາລະຄະດີຜົນງານການເຄື່ອນໄຫວຂອງສະພາປະຊາຊົນຂັ້ນແຂວງ/ນະຄອນຫລວງ ຊຸດທີ I, ເພື່ອເກັບກໍາ, ສໍາເນົາຮູບພາບ ແລະ ວິດີໂອການເຄື່ອນໄຫວຂອງສະພາປະຊາຊົນຂັ້ນແຂວງ/ນະຄອນຫລວງ ຊຸດທີ I; ຍົກສູງຄຸນນະພາບຂອງວຽກງານສື່ ໃນຖານະເປັນກະບອກສຽງຂອງສະພາແຫ່ງຊາດ ເພື່ອໂຄສະນາເຜີຍແຜ່ການເຄື່ອນໄຫວຂອງອົງການນິຕິບັນຍັດ ເປັນຕົ້ນແມ່ນສະພາແຫ່ງຊາດ ແລະ ສະພາປະຊາຊົນຂັ້ນແຂວງ/ນະຄອນຫລວງ ທັງເປັນຂົວຕໍ່ລະຫວ່າງປະຊາຊົນກັບຕົວແທນຂອງເຂົາເຈົ້າ ກໍຄື ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນແຂວງ (ສສຂ), ສະໜອງຂໍ້ມູນ-ຂ່າວສານ ໃຫ້ ແກ່ ສສຊ, ສສຂ ແລະ ປະຊາຊົນ ຢູ່ເຂດເລືອກຕັ້ງຕ່າງໆໃນທົ່ວປະເທດ ແລະ ເພື່ອກວດຜ່ານປື້ມບັນທຶກ “ຜູ້ແທນປະຊາຊົນ” ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II.

ທ່ານ ນາງ ປິ່ງຄຳ ລາຊະສິມມາ ໄດ້ກ່າວວ່າ: ເພື່ອເປັນການພັດທະນາວຽກງານສື່ມວນຊົນ, ສື່ອອນລາຍ, ເວັບໄຊ ຂອງສະພາແຫ່ງຊາດ ແລະ ການສ້າງສາລະຄະດີ ຂອງສະພາປະຊາຊົນຂັ້ນແຂວງ ເພື່ອເຮັດໃຫ້ການເຜີຍແຜ່ຂໍ້ມູນຂ່າວສານ ທວງທັນກັບສະພາບການໃນໄລຍະໃໝ່, ມີຄຸນນະພາບ ແລະ ທັນສະໄໝຍິ່ງຂຶ້ນ ລວມທັງການປະສານວຽກງານວິຊາສະເພາະ ລະຫວ່າງສະພາແຫ່ງຊາດ ກັບສະພາປະຊາຊົນຂັ້ນແຂວງ ໄດ້ມີການຫັນປ່ຽນຢ່າງຕັ້ງໜ້າໃນສະພາບ ແລະ ເງື່ອນໄຂໃໝ່; ພ້ອມນັ້ນ, ທ່ານຍັງໄດ້ທັງຮຽກຮ້ອງໃຫ້ຜູ້ເຂົ້າຮ່ວມສຸມໃສ່ຄົ້ນຄວ້າ, ປຶກສາຫາລື, ປະກອບຄຳເຫັນ ແລະ ເກັບກຳຂໍ້ມູນ-ບົດຮຽນຕ່າງໆ ເພື່ອເຮັດໃຫ້ກອງປະຊຸມເຝິກອົບຮົມຄັ້ງນີ້ບັນລຸຜົນສຳເລັດຕາມຄາດໝາຍທີ່ວາງໄວ້.

ກອງປະຊຸມ, ຜູ້ເຂົ້າຮ່ວມໄດ້ຮັບຟັງບົດຮຽນກ່ຽວກັບພື້ນຖານການຂຽນບົດສາລະຄະດີ, ເຕັກນິກພື້ນຖານການຖ່າຍທຳ ແລະ ຕັດຕໍ່; ບົດຮຽນກ່ຽວກັບຄວາມຮູ້ພື້ນຖານການນຳໃຊ້ເວັບໄຊ, ຫລັກການຂຽນຂ່າວລົງສື່ອອນລາຍ, ການຖ່າຍທຳນອກສະຖານທີ່ ແລະ ກວດຟີມສາລະຄະດີ ສະພາປະຊາຊົນແຂວງ/ນະຄອນຫລວງ; ຈາກນັ້ນ, ໄດ້ເຮັດແບບເຝິກຫັດຕັດຕໍ່ຕົວຈິງ ແລະ ເຊີດຊູສະຕິປັນຍາ ແລະ ຄວາມຮັບຜິດຊອບການເມືອງຂອງຕົນ ສຸມໃສ່ຄົ້ນຄວ້າ, ປຶກສາຫາລື, ປະກອບຄຳເຫັນ ແລະ ເກັບກຳຂໍ້ມູນບົດຮຽນຕ່າງໆ ເພື່ອເຮັດໃຫ້ກອງປະຊຸມບັນລຸຜົນສຳເລັດຕາມຄາດໝາຍ.

ກອງປະຊຸມ, ຈະໄດ້ດຳເນີນໄປຈົນຮອດວັນທີ 6 ກັນຍາ 2021 ຈຶ່ງຈະສຳເລັດ.

(ພາບ ແລະ ຂ່າວ: ອາລິນ ສຸພິມມະປະດິດ)