ໃນວັນທີ 26 ກໍລະກົດ 2024 ທີ່ຜ່ານມານີ້ ກອງປະຊຸມສະໄໝ ສາມັນ ເທື່ອທີ 7 ຂອງສະພາປະຊາຊົນແຂວງສະຫວັນນະເຂດ ຊຸດທີ II ປິດລົງ ແລະ ໄດ້ຮັບຜົນສໍາເລັດຢ່າງຈົບງາມ, ພາຍຫຼັງໄດ້ດໍາເນີນມາເປັນເວລາ 3 ວັນ ທີ່ຫໍວັດທະນະທໍາໄກສອນພົມວິຫານ ພາຍໃຕ້ການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານສະພາປະຊາຊົນແຂວງ; ເຂົ້າຮ່ວມມີບັນດາທ່ານ ການນໍາພັກ-ລັດ ຂັ້ນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງສະຫວັນນະເຂດ, ອະດີດສະມາຊິກສະພາແຫ່ງຊາດ, ວິລະຊົນແຮງງານ ພ້ອມດ້ວຍແຂກຖືກເຊີນ.

ການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສະຫວັນນະເຂດ ຊຸດທີ II ໄດ້ດໍາເນີນມາແຕ່ວັນທີ 24 – 26 ກໍລະກົດນີ້ ດ້ວຍບັນຍາກາດອັນຟົດຟື້ນໃນການຄົ້ນຄວ້າ, ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ ແລະ ທິດທາງແຜນການ 06 ທ້າຍປີ 2024; ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ; ຮັບຮອງເອົາ ການຈັດຕັ້ງປະຕິບັດບັນດາຄາດໝາຍຂອງວຽກງານການພັດທະນາຊົນນະບົດ ແລະ ການແກ້ໄຂຄວາມທຸກຍາກ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ຮັບຮອງເອົາບົດລາຍງານຂອງສະພາປະຊາຊົນ ກ່ຽວກັບການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 06 ຫາ ເທື່ອທີ 07 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 08 ຂອງຄະນະປະຈໍາສະພາປະຊາຊົນແຂວງ; ຮັບຮອງເອົາ “ຮ່າງ”ຂໍ້ຕົກລົງຂອງທ່ານເຈົ້າແຂວງວ່າດ້ວຍການຄຸ້ມຄອງ ແລະ ນຳໃຊ້ທີ່ດິນກະສິກຳ; ຮັບຮອງເອົາ“ຮ່າງ”ຂໍ້ຕົກລົງຂອງທ່ານເຈົ້າແຂວງວ່າດ້ວຍການຄຸ້ມຄອງກອງທຶນໄພບັດແຂວງ. ນອກຈາກນີ້ ກອງປະຊຸມຍັງໄດ້ຮັບຟັງການຊີ້ແຈງ ບາງບັນຫາສໍາຄັນຈໍານວນໜຶ່ງ ທີ່ພົວພັນກັບສະພາບພົ້ນເດັ່ນຂອງສັງຄົມ ແລະ ຕິດພັນກັບຊີວິດການເປັນຢູ່ຂອງປະຊາຊົນ ແລະ ບັນຫາສໍາຄັນອື່ນໆ.

ໃນວັກທ້າຍປະທານກອງປະຊຸມ ໄດ້ກ່າວຕື່ມວ່າ: ໃນນາມຕາງໜ້າໃຫ້ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ຂໍຮຽກຮ້ອງມາຍັງອົງການປົກຄອງແຂວງ, ບັນດາອົງການຈັດຕັ້ງລັດ, ຜູ້ມີສິດເລືອກຕັ້ງ ຈົ່ງເອົາໃຈໃສ່ໃນການຈັດຕັ້ງປະຕິບັດລັດຖະທໍາມະນູນ, ກົດໝາຍ, ກົດລະບຽບຕ່າງໆ ເພື່ອເຮັດໃຫ້ການພັດທະນາເສດຖະກິດ-ສັງຄົມ ບັນລຸຕາມແຜນການທີ່ກໍານົດໄວ້. (ຂ່າວ-ພາບ: ທ. ສະຫວັດດີ; ນາງ ຄອນສະຫວັນ)