ໃນຕອນເຊົ້າຂອງວັນທີ 29 ສິງຫາ 2024 ນີ້,​ ຊາວໜຸ່ມແຂວງຈໍາປາສັກ ສ້າງຂະບວນການອອກແຮງງານປັບໜ້າດິນສວນສາທາລະນາຮ່ວມໃຈຊາວແຂວງຈໍາປາສັກ ຢູ່ຈຸດສະໜາມກິລາແຂວງຈໍາປາສັກ ນໍາພາໂດຍ ທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກ, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ທັງເປັນຮອງປະທານສະພາປະຊາຊົນແຂວງຈໍາປາສັກ ແລະ ບັນດາທ່ານໃນຄະນະປະຈໍາພັກແຂວງ,​ ກໍາມະການພັກແຂວງ, ຄະນະນໍາທີ່ສັງກັດໃນ 3 ອະນຸກຳມະການຮັບໃຊ້ກອງປະຊຸມໃຫຍ່ 3 ຂັ້ນ ຂອງພັກ, ຂັ້ນແຂວງ ພ້ອມດ້ວຍບັນດາທ່ານການນໍາ ແລະ ຊາວໜຸ່ມຈາກພະແນກການ-ກົມກອງ ອ້ອມຂ້າງແຂວງເຂົ້າຮ່ວມຈໍານວນ 300 ກວ່າຄົນ.

ຈຸດປະສົງ​ຂອງການສ້າງຂະບວນການໃນຄັ້ງນີ້ເພື່ອຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ​ ຂັ້ນແຂວງ ກໍ່ຄືການຈັດຕັ້ງປະຕິບັດ ຄຳສັ່ງຂອງຄະນະເລຂາທິການສູນກາງພັກ, ຄຳແນະນຳ ຂອງຄະນະຈັດຕັ້ງສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ​ ໃຫ້ເປັນຂະບວນຟົດຟື້ນຕໍ່ເນື່ອງ. ດັ່ງນັ້ນ, ຊາວໜຸ່ມຈາກບັນດາພະແນກການ-ກົມກອງ ແລະອົງການທຽບເທົ່າຂອງແຂວງຈໍາປາສັກ ຈິ່ງໄດ້ສຸມກຳລັງໃນການປັບໜ້າດິນດ້ານພື້ນຖານຂອງສວນໃຫ້ໄດ້ລະດັບເຕັກນິກຂອງວິຊາການ. ເປັນການສະແດງໃຫ້ເຫັນເຖິງຄວາມສາມັກຄີ ເປັນຈິດໜຶ່ງໃຈດຽວກັນປະກອບສ່ວນກຳລັງແຮງຈັດຕັ້ງປະຕິບັດຂະບວນການດັ່ງກ່າວໄດ້ຮັບຜົນສໍາເລັດຕາມແຜນການວາງໄວ້.

ສວນສາທາລະນະຈຸດສະໜາມກິລາແຫ່ງນີ້ ແຂວງຈໍາປາສັກ ຈະໄດ້ປັບປຸງບູລະນະຄືນໃໝ່ໃຫ້ມີຄວາມສວຍງານ, ເປັນເອກະລັກ, ເປັນບ່ອນເຕົ້າລວມຄວາມສາມັກຄີຂອງປະຊາຊົນ, ເປັນບ່ອນພັກຜ່ອນ, ອອກກຳລັງກາຍ ແລະເຄື່ອນໄຫວກິດຈະກຳອື່ນໆຕາມຄວາມເໝາະສົມ.