ໃນຕອນເຊົ້າວັນທີ 31 ມີນາ ນີ້ ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ແຂວງເຊກອງ, ເຊິ່ງນໍາພາໂດຍ ທ່ານ ແສງໂນພາ ມິກດາວົງ ຮອງເລຂາ ຄຊປປລ ແຂວງເຊກອງ, ຫົວໜ້າອານຸຂະບວນການ, ພ້ອມດ້ວຍຄະນະຊາວໜຸ່ມ ປປລ ຮາກຖານ, ສະມາຊິກຊາວໜຸ່ມຈາກພະແນກການອ້ອມຂ້າງແຂວງ ໄດ້ພ້ອມກັນສ້າງຂະບວນການອອກແຮງງານອະນາໄມລວມ ຕາມເສັ້ນທາງໃນເທສະບານແຂວງເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງພັກ-ຂອງຊາດ. ຂະນະທີ່ຊາວໜຸ່ມຮາກຖານ ສພຂ ເຊກອງ ກໍໄດ້ເຂົ້າຮ່ວມຂະບວນການໃນຄັ້ງນີ້ດ້ວຍບັນຍາກາດທີ່ຄຶກຄື້ນ. 
ທ່ານ ແສງໂນພາ ມິກດາວົງ ໄດ້ໃຫ້ຮູ້ວ່າ: ການສ້າງຂະບວນການອອກແຮງງານອະນາໄມລວມໃນຄັ້ງນີ້ ແມ່ນເປັນການສ້າງຂະບວນການເພື່ອຂໍ່ານັບຮັບຕ້ອນວັນສໍາຄັນຕ່າງໆ ນັ້ນກໍຄືວັນສ້າງຕັ້ງຊາວໜຸ່ມ ປປລ ຄົບຮອບ 67 ປີ (14 ເມສາ 1955-14 ເມສາ 2022), ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 67 ປີ ( 22 ມີນາ 1955-22 ມີນາ 2022 ) ທີ່ຜ່ານມາ ແລະວັນສ້າງຕັ້ງປ້ອງກັນຄວາມສະຫງົບ ຄົບຮອບ 61 ປີ ( 5 ເມສາ 1955-5 ເມສາ 2022 ) ທີ່ຈະບັນຈົບຄົບຮອບອີກວາລະໜຶ່ງໃຫ້ເປັນຂະບວນຟົດຟື້ນ.
ເຊິ່ງການອອກແຮງງານໃນຄັ້ງນີ້ ແມ່ນໄດ້ພ້ອມກັນອະນາໄມ ປັດກວາດຂີ້ເຫຍື້ອ, ເກັບມ້ຽນຂີ້ເຫຍື້ອ, ກະໂປະ ກະປ໋ອງ, ສິ່ງກີດຂວາງທີ່ຮົກເຮື້ອຕາມແຄມທາງ ເສັ້ນທາງໜ້າ ແລະຫຼັງຕະຫຼາດສົດຂອງແຂວງ ໃຫ້ມີຄວາມສະອາດຈົບງາມ ແລະມີຄວາມເປັນລະບຽບຮຽບຮ້ອຍ; ນອກນີ້ ຍັງໄດ້ສ້າງຂະບວນການຈັດກິດຈະກໍາແຂ່ງຂັນກິລາມິດຕະພາບ ເພື່ອຮັດແໜ້ນຄວາມສາມັກຄີກັນລະຫວ່າງ ຄະນະ ແລະສະມາຊິກຊາວໜຸ່ມອ້ອມຂ້າງແຂວງໃຫ້ແນ້ນແໜ້ນແຟ້ນກວ່າເກົ່າ, ພ້ອມນີ້ຍັງໄດ້ຊຸກຍູ້ບັນດາເມືອງ ໃຫ້ສ້າງຂະບວນການອອກແຮງງານ ແລະປາຖະກະຖາມວັນສ້າງຕັ້ງຊາວໜຸ່ມ ປປລ ຄົບຮອບ 67 ປີ ໃຫ້ຄຶກຄື້ນມ່ວນຊື່ນ.
#ໂດຍ: ນັກຂ່າວ ສພຂ ເຂດທີ 16