ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ເມື່ອວັນທີ 12 ມິຖຸນາຜ່ານມາ, ທ່ານ ນາງ ສວຍເພັດ ທອງສົມບັດ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 8 ແຂວງຫົວພັນ ໄດ້ປະກອບຄໍາເຫັນຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດບັນດາຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ ເປັນຕົ້ນການສ້າງຄອບຄົວພົ້ນທຸກ, ບ້ານພົ້ນທຸກ, ຄອບຄົວພັດທະນາ ແລະ ອື່ນໆ ເຊິ່ງປີ 2023 ມີຄອບຄົວພົ້ນທຸກກວມເອົາ 83.83% ບ້ານພົ້ນທຸກກວມເອົາ 69.69% ແລະ ເມືອງພົ້ນທຸກກວມເອົາ 48% ຖືວ່າເປັນຕົວເລກທີ່ດີ, ແຕ່ເຖິງຢ່າງໃດກໍຕາມ ນັ້ນແມ່ນຕົວເລກສະເລ່ຍ; ເມື່ອເບິ່ງຕົວຈິງເຫັນວ່າຍັງມີບາງແຂວງຕົວເລກຄວາມທຸກຍາກຍັງສູງ ໂດຍສະເພາະແມ່ນແຂວງຫົວພັນ ເຊິ່ງປັດຈຸບັນນີ້ ອັດຕາສ່ວນຄອບຄົວທຸກຍາກຍັງກວມເອົາ 44.39% ບ້ານທຸກຍາກກວມເອົາ 67.82% ແລະ ໃນນີ້ ບ້ານທີ່ຍັງບໍ່ມີໄຟຟ້ານໍາໃຊ້ ມີຮອດ 44 ບ້ານ ກວມເອົາ 6.08% ການນໍາໃຊ້ໂທລະສັບ, ອິນເຕີເນັດ ບາງບ້ານຍັງມີຄວາມຫຍຸ້ງຍາກ, ເມືອງທຸກຍາກກວມເອົາຮ້ອຍສ່ວນຮ້ອຍ ໝາຍຄວາມວ່າ 10 ເມືອງໃນແຂວງຫົວພັນ ຍັງເປັນເມືອງທຸກຍາກ.