ໂດຍປະຕິບັດຕາມກົດໝາຍວ່າດ້ວຍ ພະນັກງານ-ລັດຖະການ ສະບັບເລກທີ 74/ສພຊ, ລົງວັນທີ 18 ທັນວາ 2015 (ໝວດທີ 5, ມາດຕາ 70) ແລະ ມະຕິຕົກລົງ ວ່າດ້ວຍການອະນຸມັດໃຫ້ພະນັກງານພັກຜ່ອນກ່ອນມື້ຮັບອຸດໜູນບໍານານ ສະບັບເລກທີ 1241/ຄປພຂ.ອຊ, ລົງວັນທີ 18 ຕຸລາ 2022. ຕອນບ່າຍຂອງວັນທີ 11 ພະຈິກ 2022 ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດພິທີ ປະກາດອະນຸມັດໃຫ້ພະນັກງານພັກຜ່ອນກ່ອນມື້ຮັບອຸດໜູນບໍານານ ຢູ່ສະພາປະຊາຊົນແຂວງອຸດົມໄຊ 1 ທ່ານ, ພາຍໃຕ້ການເປັນປະທ່ານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດານທ່ານຄະນະປະຈໍາສະພາປະຊາຊົນແຂວງ, ຄະນະເລຂາທິການ, ພະແນກພາຍໃນແຂວງ, ຄະນະຈັດຕັ້ງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ແຂກເຊີນ ແລະ ພະນັກງານພາຍໃນ ສພຂ ເຂົ້າຮ່ວມ.

ໃນພິທີ, ໄດ້ຜ່ານມະຕິຕົກລົງ ວ່າດ້ວຍການອະນຸມັດໃຫ້ພະນັກງານພັກຜ່ອນກ່ອນຮັບມື້ຮັບອຸດໜູນບໍານານ. ຈາກນັ້ນ, ທ່ານ ຄໍາພວງ ເດດກົງພົນ ອະດີດຮອງເລຂາທິການສະພາປະຊາຊົນແຂວງອຸດົມໄຊ ໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດວຽກງານທີ່ຕົນຮັບຊອບ, ຊຶ່ງຕະຫຼອດໄລຍະຜ່ານມາທ່ານໄດ້ເອົາໃຈໃສ່ສຸມສະຕິປັນຍາຈັດຕັ້ງປະຕິບັດໜ້າທີ່, ນໍາພາ-ຊີ້ນໍາວຽກງານດ້ານວິຊາສະເພາະພາຍໃນສະພາປະຊາຊົນແຂວງ ມີຜົນສໍາເລັດຫຼາຍດ້ານ. ພ້ອມນັ້ນ, ຍັງໄດ້ມອບວຽກງານທີ່ຕົນຮັບຜິດຊອບຄືນ ໃຫ້ຄະນະເລຂາທິການສະພາປະຊາຊົນແຂວງ ສືບຕໍ່ຈັດຕັ້ງປະຕິບັດຕໍ່ໄປ. ຕອນທ້າຍ, ປະທານໄດ້ພິທີໄດ້ມີຄໍາເຫັນໂອ້ລົມ. ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ອະດີດທ່ານຮອງເລຂາທິການ ເປັນຜູ້ໜຶ່ງທີ່ມີແນວຄິດຫຼັກໝັ້ນ, ມີຄວາມຮູ້ຄວາມສາມາດ, ປະສົບການບົດຮຽນຫຼາຍດ້ານ ແລະ ໄດ້ສໍາເລັດພາລະກິດວຽກງານອັນສໍາຄັນ ຢູ່່ສະພາປະຊາຊົນແຂວງອຸດົມໄຊ. ໃນໂອກາດດັ່ງກ່າວທ່ານຍັງໄດ້ເນັ້ນບາງບັນຫາ: ພະນັກງານ-ລັດຖະກອນ ເມື່ອຮອດອາຍຸກະສຽນ ກໍ່ຕ້ອງຮັບອຸດໜູນບໍານານ ຊຶ່ງເປັນກົດເກນຂອງໝົດທຸກຄົນ; ວຽກງານພັກ-ພະນັກງານ ແມ່ນວຽກງານທີ່ສໍາຄັນເພາະພະນັກງານຈະເປັນຜູ້ຕັດສິນຜົນໄດ້ຜົນເສຍ, ໝາກຜົນສໍາເລັດຂອງວຽກງານ; ມອບໃຫ້ຄະນະຈັດຕັ້ງແຂວງ, ພະແນກພາຍໃນແຂວງ ແລະ ພາກສ່ວນທີ່ກ່ຽວຂ້ອງ ຄົ້ນຄວ້າພະນັກງານ ທີ່ມີເງື່ອນໄຂມອບຮັບອຸດໜູນບໍານານ ຢູ່ຂັ້ນເມືອງ-ຂັ້ນແຂວງ. 

ພາຍຫຼັງມອບ-ຮັບໜ້າທີ່ໃຫ້  ຄະນະເລຂາທິການພົວພັນກັບພະແນກພາຍໃນແຂວງ ສົມທົບກັບຄະນະປັບປຸງກົງຈັກການຕັ້ງຂັ້ນແຂວງ ເພື່ອຄົ້ນຄວ້າເປົ້າໝາຍປ່ຽນແທນຮອງເລຂາທິການຄົນໃໝ່ ແລະ ຂໍໃຫ້ອະດີດທ່ານຮອງເລຂາທິການສືບຕໍ່ປະຕິບັດໜ້າທີ່ຢູ່ຂັ້ນບ້ານ ເປັນທີ່ປຶກສາ, ຊ່ວຍພັດທະນາບ້ານ ແລະ ສ້າງເສດຖະກິດຄອບຄົວຕາມເງື່ອນໄຂ.

ພາບ/ຂ່າວ: ສພຂ.