ຕອນບ່າຍວັນທີ 06 ມິນາຜ່ານມານີ້, ຢູ່ທີ່ສະໜາມກິລາແຂວງອຸດົມໄຊ ໄດ້ຈັດການແຂ່ງຂັນກິລາມິດຕະພາບ ລະຫວ່າງ ເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດ ສສ ຫວຽດນາມຂຶ້ນ. ໂດຍການເປັນກຽດເຂົ້າຮ່ວມຂອງ ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດລາວ, ທ່ານ ບຸ໋ຍ ວັນ ເກືອງ ກຳມະການສູນກາງພັກ, ຫົວໜ້າຫ້ອງວ່າການສະພາແຫ່ງຊາດ ແຫ່ງ ສສ ຫວຽດນາມ. ມີບັນດາທ່ານ ຄະນະເລຂາທິການສະພາແຫ່ງຊາດ ແຫ່ງ ສປປ ລາວ, ຄະນະຫ້ອງວ່າການສະພາແຫ່ງຊາດ ແຫ່ງ ສສ ຫວຽດນາມ, ຄະນະນໍາຂອງແຂວງອຸດົມໄຊ, ສະພາປະຊາຊົນແຂວງອຸດົມໄຊ ພ້ອມດ້ວຍ ພະນັງານ-ລັດຖະກອນ ຂອງສອງສະພາແຫ່ງຊາດລາວ-ຫວຽດນາມ ແລະ ມວນຊົນພາຍໃນແຂວງອຸດົມໄຊເຂົ້າຮ່ວມຊົມ.
ຈຸດປະສົງຂອງການຈັດກິດຈະກຳໃນຄັ້ງນີ້ ແມ່ນເພື່ອເປັນການຮັດແໜ້ນຄວາມສາມັກຄີຮັກແພງ ລະຫວ່າງການນໍາ ແລະ ພະນັກງານ-ລັດຖະກອນ ຂອງທັງສອງສະພາແຫ່ງຊາດລາວ-ຫວຽດນາມ ໃຫ້ມີຄວາມແໜ້ນແຟ້ນຍິ່ງຂຶ້ນ ແລະ ເພື່ອເປັນການຜ່ອນຄາຍພາຍຫຼັງທີ່ໄດ້ມີການພົບປະແລກປ່ຽນບົດຮຽນຮ່ວມກັນ. ການແຂ່ງຂັນກິລາມິດຕະພາບຄັ້ງນີ້ລວມມີກິລາ 2 ປະເພດຄື: ບານເຕະຊາຍ ແລະ ດຶງເຊືອກ ຜ່ານການແຂ່ງຂັນຜົນປາກົດວ່າ ທິມກິລາຈາກ ຫ້ອງວ່າການສະພາແຫ່ງຊາດ ສສ ຫວຽດນາມເອົາຊະນະທິມກິລາຂອງ ຄະນະເລຂາທິການສະພາແຫ່ງຊາດລາວ ທັງສອງປະເພດກິລາ ພາຍຫຼັງສຳເລັດຈາກການແຂ່ງຂັນ ກໍໄດ້ມີພິທີມອບຂັນ ແລະ ລຽນລາງວັນໃຫ້ແກ່ທິມທີ່ໄດ້ຊະນະ ແລະ ນັກກິລາທັງໝົດ ຢ່າງສົມກຽດ.
ພາບລຂ່າວ: ສພຂ.