(ສພຊ) – ຕອນເຊົ້າວັນທີ 9 ທັນວານີ້, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ, ທ່ານ ງາມປະສົງ ເມືອງມະນີ ລັດ ຖະມົນຕີກະຊວງໂຍທາທິການ ແລະ ຂົນສົ່ງ ໄດ້ສະເໜີສ້າງກົດໝາຍວ່າດ້ວຍທີ່ຢູ່ອາໄສ ເຊິ່ງຜ່ານການຈັດຕັ້ງປະຕິບັດ ແລະ ຄຸ້ມຄອງວຽກງານທີ່ຢູ່ອາໄສໃນໄລຍະຜ່ານມາ ເຫັນວ່າຍັງພົບຄວາມຫຍຸ້ງຍາກ ແລະ ມີຫຼາຍບັນຫາ, ຈຶ່ງເປັນເຫດ ຜົນ ແລະ ຄວາມຈໍາເປັນໃນການສ້າງຮ່າງກົດໝາຍສະບັບນີ້ ເປັນຕົ້ນບໍ່ທັນມີກົດໝາຍ ແລະ ນິຕິກຳໃຕ້ກົດໝາຍ ຄຸ້ມຄອງສະເພາະກ່ຽວກັບວຽກງານທີ່ຢູ່ອາໄສ; ທີ່ຢູ່ອາໄສຍັງບໍ່ທັນມີການຂຶ້ນທະບຽນ, ເກັບກຳຂໍ້ມູນສະຖິຕິ, ສ້າງຖານຂໍ້ມູນທີ່ຢູ່ອາໄສ ເພື່ອຄຸ້ມຄອງໃຫ້ເປັນລະບົບ, ລວມສູນ ເປັນເອກະພາບໃນຂອບເຂດທົ່ວປະເທດ ທັງເພື່ອເປັນພື້ນຖານໃຫ້ແກ່ລັດໃນການສ້າງນະໂຍບາຍ, ການຂຸດຄົ້ນແຫຼ່ງລາຍຮັບຕາມຄວາມເໝາະສົມ ແລະ ສອດຄ່ອງໃນແຕ່ລະໄລຍະ; ທີ່ຢູ່ອາໄສຈຳນວນໜຶ່ງ ຍັງບໍ່ທັນໄດ້ມາດຕະຖານເຕັກນິກ, ບໍ່ທັນມີລະບົບສຸຂາພິບານທີ່ດີ ແລະ ຍັງຂາດພື້ນຖານໂຄງລ່າງທາງດ້ານເຕັກນິກ ແລະ ສັງຄົມ, ສິ່ງອໍານວຍຄວາມສະດວກຕ່າງໆ; ນອກຈາກນັ້ນ, ຍັງບໍ່ທັນມີກົນໄກການຄຸ້ມຄອງວຽກງານທີ່ຢູ່ອາໄສ.

ທ່ານ ງາມປະສົງ ເມືອງມະນີ ກ່າວຕື່ມອີກວ່າ: ເມື່ອຮ່າງກົດໝາຍວ່າດ້ວຍທີ່ຢູ່ອາໄສ ໄດ້ຜ່ານການຮັບຮອງຈາກສະພາແຫ່ງຊາດ ຈະກາຍເປັນເຄື່ອງມືໃຫ້ແກ່ການຄຸ້ມຄອງວຽກງານທີ່ຢູ່ອາໄສໃຫ້ມີປະສິດທິພາບ ແລະ ປະສິດທິຜົນ ເຮັດໃຫ້ການຄຸ້ມຄອງ, ຕິດຕາມກວດກາ ແລະ ການແບ່ງຄວາມຮັບຜິດຊອບກ່ຽວກັບວຽກງານທີ່ຢູ່ອາໄສ ລະຫວ່າງສູນກາງ, ທ້ອງຖິ່ນ ແລະ ຂະແໜງການທີ່ກ່ຽວຂ້ອງ ເປັນລະບົບ, ລວມສູນ ແລະ ເປັນເອກະພາບໃນຂອບເຂດທົ່ວປະເທດ; ການຂຶ້ນທະບຽນທີ່ຢູ່ອາໄສ ຈະຂຶ້ນທະບຽນທຸກລັກສະນະຂອງທີ່ຢູ່ອາໄສ ແຕ່ຈະເສຍຄ່າທຳນຽມ ແລະ ຄ່າບໍລິການ ແມ່ນທີ່ຢູ່ອາໄສຖາວອນເທົ່ານັ້ນ, ສ່ວນທີ່ຢູ່ອາໄສເຄິ່ງຖາວອນ ແລະ ບໍ່ຖາວອນ ແມ່ນຍົກເວັ້ນ; ລະບົບຖານຂໍ້ມູນໃນການຂຶ້ນທະບຽນທີ່ຢູ່ອາໄສ ແມ່ນກະຊວງໂຍທາທິການ ແລະ ຂົນສົ່ງ ຈະປະສານສົມທົບກັບກະຊວງປ້ອງກັນຄວາມສະ ຫງົບ ໃນການກຳນົດລະບົບເລກລະຫັດການຂຶ້ນທະບຽນ; ເປັນເຄື່ອງມືທີ່ສຳຄັນໃນການຄຸ້ມຄອງລັດດ້ວຍກົດໝາຍ, ປະ ກອບສ່ວນໃຫ້ແກ່ການພັດທະນາເສດຖະກິດ-ສັງຄົມຂອງຊາດ ທັງເປັນການຊຸກຍູ້, ສົ່ງເສີມໃຫ້ປະຊາຊົນປຸກສ້າງ, ຕໍ່ຕື່ມທີ່ຢູ່ອາໄສໂດຍຖືກຕ້ອງຕາມກົດໝາຍ ແລະ ລະບຽບການ; ຍົກລະດັບທີ່ຢູ່ອາໄສໃຫ້ໄດ້ມາດຕະຖານ, ມີລະບົບສຸຂາພິບານ ແລະ ສິ່ງແວດລ້ອມທີ່ດີ; ຊຸກຍູ້, ສົ່ງເສີມໃຫ້ພາກສ່ວນເອກະຊົນທັງພາຍໃນ ແລະ ຕ່າງປະເທດ ມີສ່ວນຮ່ວມໃນການພັດທະນາວຽກງານທີ່ຢູ່ອາໄສ ແລະ ດຶງດູດການຮ່ວມມື, ການຊ່ວຍເຫຼືອຈາກຕ່າງປະເທດ, ອົງການຈັດຕັ້ງສາກົນ, ຄູ່ຮ່ວມພັດທະນາ ແລະ ສະຖາບັນການເງິນ ໃນວຽກງານການພັດທະນາທີ່ຢູ່ອາໄສ; ຮັບປະກັນການຈັດຕັ້ງປະຕິບັດວຽກງານທີ່ຢູ່ອາໄສ ໃຫ້ມີຄວາມຄ່ອງຕົວ, ປົກປ້ອງສິດ ແລະ ຜົນປະໂຫຍດຂອງລັດ, ປະຊາຊົນ ແລະ ຜູ້ດຳເນີນທຸລະກິດ ໃຫ້ຖືກຕ້ອງຕາມກົດໝາຍ ແລະ ລະບຽບການ.