(ສພຊ) – ວັນທີ 3-4 ມັງກອນຜ່ານມາ ທີ່ເມືອງແກ້ວອຸດົມ, ແຂວງວຽງຈັນ ໄດ້ມີກອງປະຊຸມຄົ້ນຄວ້າ ແລະ ຮຽບຮຽງເນື້ອໃນປະຫວັດ ຂອງສະພາແຫ່ງຊາດ ໂດຍການເປັນປະທານຂອງທ່ານ ສຸບັນ ສະວະບຸດ ຮອງຫົວໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດ ຂອງສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ; ມີບັນດາທ່ານໃນຄະນະຮັບຜິດຊອບຈາກກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳ (ສພຊ), ສະຖາບັນຄົ້ນຄວ້າປະຫວັດສາດ ແລະ ບູຮານວິທະຍາ (ສວສຊ), ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.

ທ່ານ ສຸບັນ ສະວະບຸດ ກ່າວວ່າ: ການຈັດກອງປະຊຸມໃນຄັ້ງນີແມ່ນເພື່ອເປັນການທົບທວນຄືນ ຕໍ່ບັນດາຄຳຄິດເຫັນ ຂອງ ຜູ້ເຂົ້າຮ່ວມກອງປະຊຸມ ແລະ ທິດຊີ້ນໍາຂອງຫົວໜ້າຄະນະຮັບຜິດຊອບ ຕາມການຕີລາຄາຕໍ່ໂຄງຮ່າງ ແລະ ເນື້ອໃນແລ້ວ ພວກເຮົາຈະຕ້ອງໄດ້ປັບປຸງ ແລະ ຮຽບຮຽງຄືນ ເພື່ອໃຫ້ຮ່າງໂຄງບົດ ແລະ ເນື້ອໃນ ຂອງຮ່າງບົດປະຫວັດນັ້ນ ມີຄວາມຈະແຈ້ງ, ຮັດກຸມ ແລະ ເປັນລະບົບ.

ກອງປະຊຸມ ໄດ້ສຸມໃສ່ ຄົ້ນຄວ້າ ແລະ ຮຽບຮຽງ ບັນດາເນື້ອໃນ ຂອງ ພາກທີ I ຂະບວນວິວັດການກຳເນີດສະພາປະຊາຊົນສູງສຸດ, ພາກທີ II ສະພາປະຊາຊົນສູງສຸດ ໃນພາລະກິດການປະຕິບັດສອງໜ້າທີ່ຍຸດທະສາດ ແລະ ແນວທາງປ່ຽນແປງໃໝ່ ຂອງການປະຕິວັດລາວ (1975-1992), ພາກທີ III ສະພາແຫ່ງຊາດ ໃນຖານະອົງການນິຕິບັນຍັດ ທີ່ປະຕິບັດພາລະບົດບາດອັນຄົບຖ້ວນ ຕາມທີ່ກຳນົດໄວ້ໃນລັດຖະທໍາມະນູນ ສປປ ລາວ ແລະ ພາກທີ IV ສະຫຼຸບສັງລວມ ຂອງຮ່າງປື້ມ 50 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍ ຂອງສະພາແຫ່ງຊາດ ແຫ່ງ ສປປ ລາວ (2 ທັນວາ 1975 – 2 ທັນວາ 2025) ເພື່ອເຮັດໃຫ້ໂຄງຮ່າງ ແລະ ເນື້ອໃນຂອງບົດດັ່ງກ່າວ ມີຄວາມອຸດົມສົມບູນຄົບຖ້ວນ ທາງດ້ານເນື້ອໃນ ແລະ ຮູບການ, ຖືກຕ້ອງຕາມສະພາບຄວາມເປັນຈິງ ແລະ ສອດຄ່ອງກັບຂໍ້ມູນຫຼັກຖານກ່ຽວຂ້ອງ ເພື່ອກຽມນໍາເຂົ້າລາຍງານຕໍ່ຫົວໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດຂອງສະພາແຫ່ງຊາດ ໄດ້ພິຈາລະນາ ແລະ ມີຄໍາເຫັນ ຕໍ່ການຈັດຕັ້ງປະຕິບັດວຽກງານຈຸດສຸມ ປີ 2025 ໃນຂັ້ນຕໍ່ໄປ ໃຫ້ທັນຕາມແຜນການ ທີ່ວາງໄວ້.

(ຄໍາສິງ ທາດາສະຫວັນ)