(ສພຊ) – ວັນທີ 15-17 ພະຈິກ 2024 ທີ່ເມືອງແກ້ວອຸດົມ ແຂວງວຽງຈັນ, ຄະນະກຳມະການລະດັບຊາດປັບປຸງລັດຖະທໍາມະນູນ ສະບັບປີ 2015 (ຄລຊ) ໄດ້ຈັດກອງປະຊຸມຄົ້ນຄວ້າປັບປຸງເນື້ອໃນລັດຖະທໍາມະນູນສະບັບປັບປຸງ ໂດຍການເປັນປະ ທານຂອງທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ກຳມະການ ຄລຊ; ມີບັນດາທ່ານຄະນະກຳມະການລະດັບຊາດປັບປຸງລັດຖະທໍາມະນູນ ແລະ ກອງເລຂາຊ່ວຍວຽກ ເຂົ້າຮ່ວມ 30 ກວ່າທ່ານ.

ໃນໄລຍະຜ່ານມາ, ຄະນະກຳມະການລະດັບຊາດປັບປຸງລັດຖະທຳມະນູນ ສະບັບປີ 2015 ໄດ້ມີການນໍາເອົາຮ່າງລັດຖະທໍາມະນູນສະບັບດັ່ງກ່າວ ໄປທາບທາມ ແລະ ຈັດກອງປະຊຸມສຳມະນາຫຼາຍຄັ້ງ ທັງຢູ່ສູນກາງ ແລະ ທ້ອງຖິ່ນ; ພາຍຫຼັງປັບປຸງສຳເລັດເບື້ອງຕົ້ນ ກໍໄດ້ນຳໄປຜ່ານໃນກອງປະຊຸມຄົບຄະນະບໍລິຫານງານສູນກາງພັກ ເທື່ອທີ 9 ສະໄໝທີ XI ເຊິ່ງກອງປະຊຸມຄົບຄະນະບໍລິຫານງານສູນກາງພັກ ໂດຍສະເພາະແມ່ນບັນດາສະຫາຍກົມການເມືອງສູນກາງພັກ, ສະຫາຍເລຂາທິການສູນກາງພັກ ໄດ້ມີການຕັ້ງຄຳຖາມເຈາະຈີ້ມ ແລະ ໃຫ້ທິດຊີ້ນຳ ເພື່ອປັບປຸງລັດຖະທຳມະນູນສະບັບປີ 2015 ໃຫ້ສົມບູນ, ຖືກຕ້ອງ ແລະ ສອດຄ່ອງຕາມທິດຊີ້ນໍາຂອງມະຕິ 05/ກມສພ ກໍຄືເນື້ອໃນຈິດໃຈຂອງຄະນະບໍລິຫານງານສູນກາງພັກ.

ທີ່ປະຊຸມໄດ້ຮັບຟັງການສະເໜີຮ່າງບົດລາຍງານການປັບປຸງລັດຖະທໍາມະນູນ, ຕາຕະລາງສົມທຽບລັດຖະທໍາມະນູນສະບັບປີ 2015 ກັບ ລັດຖະທໍາມະນູນສະບັບປັບປຸງໃໝ່ ປີ 2025; ຈາກນັ້ນ, ຜູ້ເຂົ້າຮ່ວມໄດ້ເອົາໃຈໃສ່ຍົກສູງສະຕິປັນຍາຂອງຕົນ ສຸມໃສ່ປະກອບຄຳຄິດຄຳເຫັນ ເພື່ອປັບປຸງເນື້ອໃນຂອງລັດຖະທຳມະນູນ ໂດຍເຮັດເປັນແຕ່ລະໝວດແຕ່ລະມາດຕາຢ່າງລະອຽດ.

(ສອນສັກ ວັນວິໄຊ)