(ສພຊ) – ວັນທີ 23 ຕຸລານີ້ ທີ່ສະພາແຫ່ງຊາດ, ໄດ້ມີການພົບປະສອງຝ່າຍລະ ຫວ່າງທ່ານ ປອ. ໄຊສົມ ພອນ ພົມວິຫານ ປະທານສະພາແຫ່ງຊາດ ກັບ ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ (Samdech Maha Rathsapheathika Thipadei Khuon Sudary) ປະທານສະພາແຫ່ງຊາດ ແຫ່ງ ລາຊະອານາຈັກກຳປູ ເຈຍ ໃນໂອກາດທີ່ນໍາພາຄະນະຜູ້ແທນຂັ້ນສູງສະພາແຫ່ງຊາດກຳປູເຈຍ ມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ທີ່ ສປປລາວ ເປັນເຈົ້າພາບ.

ທ່ານ ປອ. ໄຊສົມພອນ ພົມວິຫານ ໄດ້ຕີລາຄາສູງຕໍ່ການເຂົ້າຮ່ວມກອງປະຊຸມໄອປາຄັ້ງນີ້ ເປັນການປະກອບສ່ວນສືບຕໍ່ເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອ, ການພົວພັນແບບຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງສອງປະ ເທດລາວ-ກໍາປູເຈຍ ທັງເປັນການໃຫ້ກໍາລັງໃຈ ແລະ ສະໜັບສະ ໜູນສະພາແຫ່ງຊາດລາວ ປະຕິບັດພັນທະສາກົນໃຫ້ສໍາເລັດຢ່າງຈົບງາມ; ພ້ອມທັງຝາກຄວາມຢື້ຢາມຖາມຂ່າວ ແລະ ຄໍາເຊື້ອເຊີນ ຜ່ານສົມເດັດປະທານສະພາແຫ່ງຊາດ ໄປຍັງສົມເດັດ ຮຸນເຊນ ປະທານສະພາສູງກຳປູເຈຍ ມາຢ້ຽມຢາມ ສປປລາວ ຢ່າງເປັນທາງການ ໃນວັນເວລາທີ່ເໝາະສົມ.

ໃນການພົບປະ, ສອງຝ່າຍໄດ້ແຈ້ງສະພາບການທີ່ພົ້ນເດັ່ນຂອງປະເທດ ແລະ ຂອງສະພາແຫ່ງຊາດ ໃຫ້ກັນ ແລະກັນຊາບໂດຍຫຍໍ້ ພ້ອມທັງຕີລາຄາສູງຕໍ່ການພົວພັນ ແລະ ການຮ່ວມມືລະຫວ່າງສອງປະເທດທີ່ໄດ້ຮັດແໜ້ນ ແລະ ເສີມຂະຫຍາຍຢ່າງຕໍ່ເນື່ອງ ສະແດງອອກໃນການແລກປ່ຽນຄະນະຜູ້ແທນຂັ້ນສູງສຸດ ແລະ ຂັ້ນຕ່າງໆ ນັບແຕ່ສູນກາງຮອດທ້ອງຖິ່ນຢ່າງປົກກະຕິ; ນອກນີ້, ບັນດາຂະແໜງການຂອງສອງປະເທດ ກໍມີການພົວພັນຮ່ວມມື ແລະ ຊ່ວຍເຫຼືອເຊິ່ງກັນແລະກັນ ເຊິ່ງໄດ້ມີສົນທິສັນຍາ, ສັນຍາ, ບົດບັນທຶກ ແລະ ນິຕິກໍາອື່ນໆນໍາກັນ ທີ່ພົວພັນເຖິງການຮ່ວມມືດ້ານການເມືອງ-ການຕ່າງປະເທດ, ວຽກ ງານປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນດ້ານພະລັງງານ, ການຄົມມະນາຄົມ-ຂົນສົ່ງ, ການສຶກສາ-ກິລາ, ການທ່ອງທ່ຽວ ແລະ ອື່ນໆ. ທ່ານປະ ທານສະພາແຫ່ງຊາດລາວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດອັນໃຫຍ່ຫຼວງໃນຫຼາຍ ດ້ານທີ່ປະຊາຊົນກໍາປູເຈຍຍາດມາໄດ້, ເປັນການປະກອບສ່ວນເຮັດໃຫ້ລາຊະອານາຈັກກໍາປູເຈຍ ມີສະຖຽນລະ ພາບດ້ານການເມືອງ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປົວ ແປງດີຂຶ້ນເປັນກ້າວໆ ແລະ ບົດບາດອິດທິພົນຊື່ສຽງຂອງກໍາປູເຈຍ ນັບມື້ນັບໄດ້ຮັບການຍົກສູງຂຶ້ນໃນເວທີພາກພື້ນ ແລະ ສາກົນ.

ທ່ານ ປອ. ໄຊສົມພອນ ພົມວິຫານ ຍັງໄດ້ແຈ້ງໃຫ້ຊາບຕື່ມອີກວ່າ: ປັດຈຸບັນ ສປປລາວ ສຸມໃສ່ກະກຽມ ປັບປຸງລັດຖະທໍາມະນູນ ແລະ ກົດໝາຍທີ່ກ່ຽວຂ້ອງຕ່າງໆ ຕາມແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກ ການຂອງພັກ ເຮັດໃຫ້ການຄຸ້ມຄອງລັດ, ຄຸ້ມ ຄອງເສດຖະກິດ-ສັງຄົມດ້ວຍກົດໝາຍ ມີຄວາມເຂັ້ມງວດ ແລະ ສັກ ສິດເປັນກ້າວໆ, ສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍໃນທົ່ວສັງຄົມ ໄດ້ຮັບການຍົກສູງ ຂຶ້ນ ໄດ້ສ້າງເງື່ອນໄຂພື້ນຖານໃຫ້ແກ່ການສ້າງລັດ ສປປລາວ ໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ ແລະ ການກະກຽມກອງປະຊຸມໃຫຍ່ 3 ຂັ້ນ ກ້າວເຂົ້າສູ່ກອງປະຊຸມໃຫຍ່ຄັ້ງທີ XII ຂອງພັກໃນຕົ້ນປີ 2026 ແລະ ສະ ພາແຫ່ງຊາດ ກໍຫ້າງຫາກະກຽມໃຫ້ແກ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນ ເດືອນພະຈິກນີ້.

ສອງປະທານສະພາແຫ່ງຊາດ ມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າສະພາແຫ່ງຊາດລາວ ແລະ ກຳປູ ເຈຍ ໄດ້ມີມູນເຊື້ອແຫ່ງການພົວພັນຮ່ວມມືທີ່ດີງາມ ສະໜິດສະໜົມແຕ່ດົນນານ ເປັນການສະແດງອອກໃນການ ຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງສອງອົງການນິຕິບັນຍັດ ເປັນຕົ້ນແມ່ນການ ແລກປ່ຽນຢ້ຽມຢາມທຸກໆຂັ້ນທີ່ຕິດພັນກັບການແລກປ່ຽນບົດຮຽນປະສົບການໃນການປະຕິບັດພາລະບົດບາດດ້ານນິຕິບັນຍັດ. ອັນພົ້ນເດັ່ນ ໃນເດືອນທັນວາ 2023, ສົມເດັດປະທານສະພາແຫ່ງຊາດກໍາປູເຈຍ ໄດ້ຢ້ຽມຢາມ ສປປລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດລັດຖະສະພາກຳປູເຈຍ-ລາວ-ຫວຽດນາມ (CLV) ຄັ້ງທີ 1; ໃນວັນທີ 09 ຕຸລາຜ່ານມານີ້, ທ່ານ ປອ. ໄຊສົມພອນ ພົມວິຫານ ກໍໄດ້ຕ້ອນຮັບທ່ານ ຈຽມຢຽບ (Cheam Yeab) ຮອງປະທານສະພາແຫ່ງຊາດກໍາປູເຈຍຜູ້ທີໜຶ່ງ ໃນໂອກາດເຂົ້າຮ່ວມກອງປະຊຸມພົບປະລະຫວ່າງ ຜູ້ນໍາອາຊຽນ ແລະ ໄອປາ ຄັ້ງທີ 13 ເຊິ່ງສະແດງໃຫ້ເຫັນວ່າສອງສະພາແຫ່ງຊາດ ຍາມໃດກໍມີການຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

ສຳລັບທິດທາງການຮ່ວມມືລະຫວ່າງສອງສະພາແຫ່ງຊາດໃນຕໍ່ໜ້າ, ສອງຝ່າຍຈະສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືທີ່ສອງສະພາແຫ່ງຊາດໄດ້ລົງນາມຮ່ວມກັນໃນໄລຍະຜ່ານມາ ໃຫ້ເປັນຮູບປະທໍາກວ່າເກົ່າ ໂດຍສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ນັບແຕ່ສູນ ກາງຮອດທ້ອງຖິ່ນຢ່າງປົກກະຕິ ໂດຍສະເພາະການແລກປ່ຽນຢ້ຽມຢາມລະຫວ່າງສະພາປະຊາຊົນຂັ້ນແຂວງທີ່ມີ ຊາຍແດນຕິດຈອດກັນ ເພື່ອແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດຂອງອົງການນິຕິບັນ ຍັດນໍາກັນ; ຊຸກຍູ້ ແລະ ສົ່ງເສີມໃຫ້ຂະແໜງການຂອງສອງລັດຖະ ບານ ເອົາໃຈໃສ່ຈັດຕັ້ງປະຕິບັດບັນດາສົນທິສັນຍາ, ສັນຍາ ແລະ ນິຕິກຳອື່ນໆທີ່ສອງຝ່າຍໄດ້ລົງນາມຮ່ວມກັນ ໃຫ້ມີປະສິດທິຜົນສູງກວ່າເກົ່າ ແລະ ນໍາເອົາປະ ໂຫຍດອັນແທ້ຈິງມາສູ່ປະຊາຊົນສອງຊາດ; ຮັດແໜ້ນ ແລະ ເສີມຂະຫຍາຍການພົວພັນຮ່ວມມືທີ່ເປັນມູນເຊື້ອທີ່ດີ ງາມມາແຕ່ດົນນານຂອງສອງອົງການນິຕິບັນຍັດ ໃນການສະໜັບສະໜູນ ແລະ ຮ່ວມມືກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ໄຊໂສພາພອນ ມິ່ງມຸງຄຸນ)