ດັ້ນກີບເມກ

ທ່ານ ພູມີ ວົງວິຈິດ ໄດ້ຂຽນປຶ້ມຄຸນສົມບັດໃໝ່ ແລະ ສິນທໍາປະຕິວັດ ເພື່ອຢາກແນະນໍາໃຫ້ຄົນ (ພະນັກງານ) ໄດ້ເຂົ້າໃຈການດໍາເນີນຊີວິດປອດໃສຂາວສະອາດ ແລະ ຊື່ສັດຕໍ່ໜ້າທີ່ ມີລະບຽບວິໄນເຄັ່ງຄັດຕໍ່ພາລະກິດສ້າງສາພັດທະນາຊາດໃນທຸກຂົງເຂດວຽກງານ ດັ່ງທີ່ເພິ່ນໄດ້ເວົ້າແຈ້ງໃນປຶ້ມດັ່ງກ່າວໜ້າທີ 89 ວ່າ: ພື້ນຖານຄຸນສົມບັດສິນທໍາປະຕິວັດ ແມ່ນດຸໝັ່ນໃນສິ່ງທີ່ຄວນເຮັດ, ປະຢັດໃນສິ່ງທີ່ຄວນປົກປັກຮັກສາ, ປອດໃສ ແລະ ທ່ຽງທໍາໃນການພົວພັນກັບຄົນທັງຫຼາຍ…

ຄໍາວ່າປອດໃສ ແລະ ທ່ຽງທໍາໃນການພົວພັນກັບຄົນທັງຫຼາຍນີ້ ຍ່ອມຕ້ອງໄດ້ນໍາມາຄິດພິຈາລະນາໃຫ້ຮອບຄອບ ເພື່ອປ້ອງກັນບໍ່ໃຫ້ບາງຄົນສວຍໂອກາດໃຊ້ອໍານາດ, ໜ້າທີ່ຕໍາແໜ່ງໃນການປະຕິບັດໜ້າວຽກເຊັ່ນ: ການປະຊຸມ, ສໍາມະນາ ຫຼືການໄປປະຊຸມ, ທັດສະນະວຽກຢູ່ຕ່າງປະເທດ ເຊິ່ງມີຫາງສຽງຕໍານິສົ່ງຂ່າວຂອງສັງຄົມທີ່ມີພະນັກງານບາງຄົນຕິດນິໄສ ຫຼື ສວຍໂອກາດລວນລາມ-ຜິດສິນທໍາຮີດຄອງ ເພາະເຂົ້າໃຈວ່າຫ່າງໄກຄອບຄົວຫ່າງໄກປະເທດແລ້ວສວຍໂອກາດ ເຊິ່ງພົວພັນຜ່ານວຽກ-ໜ້າທີ່ຕ່າງໆ ພະນັກງານກ່ຽວຂ້ອງຄວນປະພຶດແບບຢ່າງທີ່ດີແກ່ສັງຄົມ ຫຼີກເວັ້ນການຕິດນິໄສທຶນນິຍົມ ອິດສະລະ ແລະ ເສລີຫຼີ້ນກິນຟຸມເຟືອຍ…

ປື້ມຄຸນສົມບັດໃໝ່ ໜ້າທີ 95 ຍັງເວົ້າຕື່ມວ່າ: ພະນັກງານຜູ້ໃດຫາກບໍ່ຮູ້ສຶກຕື່ນໂຕ, ສະດຸ້ງໄວຕໍ່ໜ້າທີ່ໃໝ່, ບໍ່ຍອມອົດທົນຄົ້ນຄິດ… ບໍ່ມີແນວຄິດປະດິດສ້າງໃນການປະຕິບັດແນວທາງຂອງພັກແລ້ວ ພະນັກງານຄົນນັ້ນບໍ່ສົມເປັນພະນັກງານດີ…, ຖ້າວ່າຜູ້ໃດຫາກໄດ້ອ່ານຄົ້ນຄິດໃນຫຼາຍຈຸດຂອງປຶ້ມຄຸນສົມບັດສິນທໍາປະຕິວັດໃໝ່ທີ່ ທ່ານ ພູມີ ວົງວິຈິດ ຂຽນໄວ້ກໍຈະເຂົ້າໃຈວ່າເພິ່ນ ມຸ້ງສ້າງຄົນໃຫ້ມີຄຸນສົມບັດສິນທໍາດີງາມ, ຕີຕ້ານການຟຸມເຟືອຍ, ປະພຶດແບບເສລີບີຮົ່ວ, ບໍ່ເຄົາລົບຮີດຄອງປະເພນີ ເຊິ່ງບາງກໍລະນີອາດກວມເອົາພວກນິໄສມັກມ່ວນທີ່ຂາດຄຸນສົມບັດເປັນພະນັກງານຂອງພັກ-ລັດ.

ພວກເຮົາບໍ່ຄວນຫຼົງລືມຄໍາແນະນໍາໃນປຶ້ມດັ່ງກ່າວວ່າ: ໃຫ້ແຕ່ລະຄົນຮຽນຮູ້ຄຸນສົມບັດອັນດີເປັນແວ່ນແຍງຂອງຜູ້ນໍາປະຕິວັດ, ປອດໃສ, ຂາວສະອາດ ເພື່ອສ້າງສັງຄົມສີວິໄລກ້າວໜ້າ…!