ໃນວັນທີ 23 ກັນຍາ 2024 ນີ້, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານຄະນະສະມາຊິກສະພ່ແຫ່ງຊາດ ປະຈໍາເຂດເລືອກຕັ້ງທີ 15, ກັບ ທ່ານ ບົວລີ ເພັດສົງຄາມ ຄະນະປະຈໍາພັກແຂວງ, ເຈົ້ານະຄອນປາກເຊ ແລະ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງ ສົມທົບກັບບັນດາທ່ານຄະນະນໍາຂອງແຂວງ, ການນໍາພະແນກການອອ້ມຂ້າງ, ຄະນະກໍາມະການຄຸ້ມຄອງໄພພິບັດຂັ້ນແຂວງ, ອົງການປົກຄອງບ້ານ, ອົງການຈັດຕັ້ງມະຫາຊົນ, ກໍາລັງ ປກສ – ປກຊ, ລັດວິສະຫະກິດ, ຜູ້ປະກອບການ ລົງຕິດຕາມ ແລະ ຊຸກຍູ້ວຽກງານການກະກຽມຄວາມພ້ອມຕ້ານໄພນໍ້າຖ້ວມຢູບັນດາຈຸດທີ່ເຝົ້າລະວັງໃນນະຄອນປາກເຊ ຄື: ຈຸດສານປູສົບເຊ, ບ້ານບຸ່ງອຸດົມ, ບ້ານທ່າຫຼວງ, ບ້ານໂພນສະອາດ, ບ້ານແກ ແລະ ຈຸດອື່ນໆ ທີ່ມີຄວາມຊ່ຽງທີ່ຈະເກີດໄພນໍາຖ້ວມ.

ການເຄື່ອນໄຫວຂອງຄະນະໄດ້ຂີ້ເຮືອລົງຕິດຕາມໃນແຕ່ລະຈຸດຢ່າງໄກ້ຊິດ ພ້ອມທັງໄດ້ຮັບຟັງການລາຍງານຈາກຄະນະຄຸ້ມຄອງໄພພິບັດຂັ້ນແຂວງ ກ່ຽວກັບສະພາບລວມ ແລະ ລະດັບນໍ້າຢູ່ແຂວງຈໍາປາສັກ ເຊິ່ງ, ໃນເວລາ 13 ໂມງ ຂອງວັນທີ 23/9/2024 ເຫັນວ່າເພີ່ມຂຶ້ນ ໂດຍສະເພາະລະດັບນໍ້າຂອງ ຈຸດນະຄອນປາກເຊ ແທກໄດ້ 11,66 ແມັດ, ທຽບໃສ່ລະດັບນໍ້າໃນເວລາ 7 ໂມງຂອງເຊົ້າມື້ນີ້, ເພີ່ມຂຶ້ນ 3 ຊັງຕີແມັດ ເຊິ່ງລະດັບນໍ້າ ໄດ້ຂຶ້ນກາຍເຂດລະວັງໄພແລ້ວ, ລະດັບນໍ້າເຂດລະວັງໄພ 11 ແມັດ, ເຂດອັນຕະລາຍ ແມ່ນ 12 ແມັດ; ລະດັບນໍ້າເຊໂດນ ຈຸດບ້ານສຸວັນນະກິລິ ເມືອງຊະນະສົມບູນ ແທກໄດ້ 10,06 ແມັດ, ທຽບໃສ່ລະດັບນໍ້າໃນເວລາ 7 ໂມງເຊົ້າຂອງມື້ນີ້, ເພີ່ມຂຶ້ນ 22 ຊັງຕີແມັດ ເຊິ່ງລະດັບນໍ້າໄດ້ຂຶ້ນກາຍເຂດລະວັງໄພແລ້ວ (ລະດັບນໍ້າເຂດລະວັງໄພ 10 ແມັດ, ເຂດອັນຕະລາຍ ແມ່ນ 11 ແມັດ); ລະດັບນໍ້າເຊໂດນ ຈຸດບ້ານດອນແຊ ເມືອງຊະນະສົມບູນ ແທກໄດ້ 6,18 ແມັດ, ທຽບໃສ່ລະດັບນໍ້າໃນເວລາ 7 ໂມງເຊົ້າຂອງມື້ນີ້, ເພີ່ມຂື້ນ 24 ຊັງຕີແມັດ (ລະດັບນໍ້າເຂດລະວັງໄພ 9 ແມັດ, ເຂດອັນຕະລາຍ ແມ່ນ 10 ແມັດ).

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນ ທີ່ອາໄສຢູ່ໃກ້ລຽບຕາມແຄມແມ່ນໍ້າ ແລະ ເຂດພື້ນທີ່ຕໍ່າ ຕາມລໍານໍ້າແມ່ນໍ້າຂອງ ແລະ ແມ່ນໍ້າສາຂາ ເຊັ່ນ: ເຊຈຳພອນ ແລະ ເຊບັ້ງໄຟ ຈົ່ງມີສະຕິລະມັດລະວັງຕໍ່ສະພາບຝົນຕົກຕໍ່ເນື່ອງ ທີ່ອາດຈະເຮັດໃຫ້ເກີດນໍ້າຖ້ວມ ແລະ ໃຫ້ມີສະຕິ ຕິດຕາມເຝົ້າລະວັງລະດັບນໍ້າ ແມ່ນໍ້າຂອງ ຢູ່ແຂວງພາກໃຕ້ ທີ່ອາດຈະເຮັດໃຫ້ລະດັບນໍ້າເພີ່ມຂື້ນສູງຮອດເຂດເຕືອນໄພ ໃນ ໄລຍະ 1 ຫາ 2 ວັນຕໍ່ໜ້ານີ້. ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກ ກະສາດ ຢ່າງຕໍ່ເນື່ອງ.

(ພາບ-ຂ່າວ: ສພຂ.ຈສ)