ກອງປະຊຸມສະຫຼຸບຕີລາຄາການຈັດຕັ້ງປະຕິບັດ ແຜນການເຄື່ອນໄຫວວຽກງານຂອງຄະນະເລຂາທິການ ສະພາປະຊາຊົນ (ສພຂ) ແຂວງເຊກອງປີ 2021 ແລະ ວາງທິດທາງແຜນການປີ 2022 ໄດ້ຈັດຂຶ້ນໃນວັນທີ 8 ກຸມພາ 2022 ຜ່ານມານີ້ ທີ່ສະໂມສອນ ສພຂ ໂດຍການເປັນປະທານຂອງທ່ານ ນາງ ຄໍາເສັງ ທຸມມະວົງສາ ຮອງປະທານສະພາປະຊາຊົນແຂວງ, ມີຄະນະປະຈໍາ, ສສຊ-ສສຂ, ຄະນະເລຂາທິການ, ຄະນະກໍາມະການ ແລະ ພະນັກ ງານ-ລັດຖະກອນເຂົ້າຮ່ວມ.
ໃນກອງປະຊຸມ ທ່ານ ນາງ ຄໍາໄພ ວິລະສານ ເລຂາທິການສະພາປະຊາຊົນແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານຂອງຄະນະເລຂາທິການສະພາປະຊາຊົນປະຈໍາປີ 2021 ແລະ ທິດທາງແຜນການເຄື່ອນໄຫວປີ 2022 ໂດຍໄດ້ຍົກໃຫ້ເຫັນຜົນງານດ້ານດີທີ່ພົ້ນເດັ່ນເປັນຕົ້ນ: ພະນັກງານ-ລັດຖະກອນມີຄວາມເຊື່ອໝັ້ນຕໍ່ການນໍາພາ-ຊີ້ນໍາຂອງພັກ, ມີຄວາມສາມັກຄີ ແລະ ເປັນເຈົ້າການປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ໂດຍສະເພາະແມ່ນໜ້າທີ່ເປັນເສນາທິການໃຫ້ສະພາປະຊາຊົນແຂວງ ແລະ ຄະນະປະຈໍາສະພາປະຊາຊົນແຂວງ ໃນການຄົ້ນຄວ້າ-ສັງລວມເນື້ອໃນຮອບດ້ານ; ຄຸ້ມຄອງວຽກບໍລິຫານແຜນການ-ການເງິນ; ວຽກງານຈັດຕັ້ງ-ພະນັກງານ; ສ້າງເງື່ອນໄຂໃຫ້ແກ່ການເຄື່ອນໄຫວວຽກງານຂອງ ສສຊ-ສສຂ; ສ້າງແຜນບໍາລຸງ, ຍົກລະດັບ ແລະ ປະຕິບັດນະໂຍບາຍຕໍ່ພະນັກງານ ແລະ ວຽກງານອື່ນໆຕາມການມອບໝາຍຂອງຄະ ນະປະຈໍາ.
ສໍາລັບແຜນການເຄື່ອນໄຫວວຽກງານປີ 2022 ຄະນະເລຂາທິການສະພາປະຊາຊົນແຂວງ ຕ້ອງເພີ່ມທະວີສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນ ດ້ວຍການເຜີຍແຜ່ບັນດາມະຕິ, ຄໍາສັ່ງແນະນໍາ, ມູນເຊື້ອວັນສໍາຄັນຂອງພັກ-ຂອງຊາດ ແລະ ນິຕິກໍາທີ່ຕິດພັນກັບຄວາມຮັບຜິດຊອບຂອງຕົນ ເພື່ອໃຫ້ເຂົາເຈົ້າຮັບຮູ້, ເຂົ້າໃຈ ແລະ ກໍາໄດ້ບັນຫາຕ່າງໆ; ນໍາພາ-ຊີ້ນໍາສ້າງແຜນການ ແລະ ກະກຽມໃຫ້ ສສຊ-ສສຂ ລົງເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຊຸດທີ II ຕິດພັນກັບການລົງຕິດຕາມ, ກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາລຸ່ມກົດ ໝາຍ; ຕິດຕາມ, ກວດກາ, ຄຸ້ມຄອງການນໍາໃຊ້ພາຫະນະ ແລະ ງົບປະມານໃຫ້ຖືກຕ້ອງຕາມລະບຽບຫຼັກການ.
ພ້ອມນີ້ ກອງປະຊຸມ ຍັງໄດ້ຮັບຟັງການຜ່ານບົດລາຍງານຜົນສໍາເລັດການກະກຽມ ແລະ ການດໍາເນີນກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງເຊກອງຊຸດທີ II; ບົດສະຫຼຸບວຽກງານງົບປະມານປະຈໍາປີ 2021 ແລະ ທິດທາງແຜນການປີ 2022 ແລະ ມະຕິຂອງຄະນະປະຈໍາສະພາປະຊາຊົນແຂວງ ກ່ຽວກັບກົງຈັກຊ່ວຍວຽກໃນສະພາປະຊາຊົນແຂວງ.
#ຂ່າວ: ສັນຍາ #ພາບ: ນາລີວັນ