(ສພຊ) ກອງປະຊຸມປຶກສາຫາລື ແລະ ທາບທາມຄວາມຄິດເຫັນໃສ່ຮ່າງມະຕິຂອງຄະນະປະຈຳສະພາແຫ່ງຊາດ ແລະ ຮ່າງປຶ້ມຄູ່ມື ກ່ຽວກັບການຄຸ້ມຄອງວຽກງານສາຍດ່ວນ ແລະ ຕູ້ຮັບຄຳສະເໜີ ໄດ້ຈັດຂຶ້ນໃນວັນທີ 12 ກັນຍາ 2023 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ເຂົ້າຮ່ວມມີທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ, ມີບັນດາຄະນະກົມພາຍໃນສະພາແຫ່ງຊາດ, ບັນດາທ່ານຮອງເລຂາທິການສະພາປະຊາຊົນແຂວງຈາກ 18 ແຂວງທົ່ວປະເທດ ພ້ອມດ້ວຍພາກສ່ວນທີ່ກ່ຽວຂ້ອງ.

ທັງນີ້, ກໍເພື່ອເປັນການປຶກສາຫາລື ແລະ ຮັບຟັງຄວາມຄິດເຫັນຈາກ ຄະນະເລຂາທິການສະພາປະຊາຊົນແຂວງ ແລະ ຄະນະກົມພາຍໃນສະພາແຫ່ງຊາດ ໃນການຈັດຕັ້ງປະຕິບັດການຮັບຄໍາສະເໜີຂອງປະຊາຊົນ ຜ່ານທາງສາຍດ່ວນ ໃນໄລຍະດຳເນີນກອງປະຊຸມສະພາປະຊາຊົນແຂວງ ແລະ ກອງປະຊຸມສະພາແຫ່ງຊາດໃນໄລຍະຜ່ານມາ ມີຂໍ້ສະດວກ, ຂໍ້ຫຍຸ້ງຍາກ ຄືແນວໃດ; ເພື່ອທາບທາມຄວາມຄິດເຫັນໃສ່ 2 ຮ່າງນິຕິກຳຄື: ມະຕິວ່າດ້ວຍການຄຸ້ມຄອງວຽກງານສາຍດ່ວນຂອງສະພາແຫ່ງຊາດ ແລະ ປຶ້ມຄູ່ມື ກ່ຽວກັບວຽກງານສາຍດ່ວນ ໃຫ້ມີເນື້ອໃນສົມບູນຄົບຖ້ວນ; ເພື່ອເປັນການຮຽບຮຽງຄືນ ແລະ ປັບປຸງດ້ານເນື້ອໃນຂອງ 2 ຮ່າງນິຕິກຳສະບັບດັ່ງກ່າວ ໃຫ້ສາມາດນຳໄປຈັດພິມເປັນປຶ້ມ ແລະ ເຜີຍແຜ່ວຽກງານສາຍດ່ວນຂອງສະພາແຫ່ງຊາດ ໄດ້ຮັບຮູ້ຢ່າງທົ່ວເຖິງ.

ໃນກອງປະຊຸມ, ທ່ານ ນາງ ປິ່ງຄຳ ລາຊະສິມມາ ໄດ້ມີຄຳເຫັນກ່າວເປີດກອງປະຊຸມວ່າ: ດັ່ງທີ່ຮູ້ນໍາກັນແລ້ວວ່າ ວຽກງານສາຍດ່ວນ ເປັນວຽກງານໜຶ່ງທີ່ສໍາຄັນ ໃນການຮັບຄໍາສະເໜີຂອງພົນລະເມືອງ, ການຈັດຕັ້ງ ຫຼື ນິຕິບຸກຄົນ ຜ່ານທາງໂທລະສັບສາຍດ່ວນ, ສື່ເອເລັກໂຕຣນິກ ແລະ ຕູ້ຮັບຄໍາສະເໜີ ກ່ຽວກັບບັນຫາເສດຖະກິດ, ວັດທະນະທໍາ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ຍຸຕິທໍາ ແລະ ການປະຕິບັດສິດ, ໜ້າທີ່ຂອງ ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ ເຊິ່ງກົມກວດກາ ເປັນເສນາທິການ ໃຫ້ແກ່ຄະນະເລຂາທິການສະພາແຫ່ງຊາດ ປະຕິບັດວຽກງານສາຍດ່ວນໃນໄລຍະດໍາເນີນກອງປະຊຸມສະພາແຫ່ງຊາດ. ນອກຈາກນັ້ນ, ຄະນະເລຂາທິການສະພາປະຊາຊົນຂັ້ນແຂວງ ກໍຍັງເປັນເສນາທິການໃຫ້ແກ່ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ໃນເວລາດຳເນີນກອງປະຊຸມ ໝາຍຄວາມວ່າ ຄະນະເລຂາທິການສະພາແຫ່ງຊາດ ມີສາຍກ່ຽວພັນທີ່ຕິດຂາດອອກຈາກກັນບໍ່ໄດ້ ໃນການປະຕິບັດໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ດັ່ງທີ່ກົດໝາຍ ແລະ ມະຕິຂອງຄະນະປະຈຳສະພາແຫ່ງຊາດ ກຳນົດໄວ້ ເຊິ່ງໃນປີ 2017 ສະພາແຫ່ງຊາດ ຊຸດທີ VIII ກໍໄດ້ທາບທາມເອກະສານນີ້ ນຳບັນດາກົມ, ສູນ ຂອງກົງຈັກຂອງສະພາແຫ່ງຊາດ ໃນເວລານັ້ນຄົບຖ້ວນ 25 ກົມ, 2 ສູນ ມາແລ້ວ. ສຳລັບມື້ນີ້ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ ຄະນະເລຂາທິການສະພາແຫ່ງຊາດ ຈຶ່ງໄດ້ນໍາເອົາຮ່າງມະຕິຂອງຄະນະປະຈໍາສະພາແຫ່ງຊາດ ແລະ ຮ່າງປື້ມຄູ່ມື ກ່ຽວກັບການຄຸ້ມຄອງວຽກງານສາຍດ່ວນ ເພື່ອໃຫ້ຜູ້ແທນກອງປະຊຸມໄດ້ມີຄໍາຄິດຄໍາເຫັນໃສ່ ຮ່າງນິຕິກໍາດັ່ງກ່າວ ແນໃສ່ໃຫ້ມີຄວາມເປັນເອກະພາບທາງດ້ານເນື້ອໃນ, ໂຄງປະກອບ, ຫຼັກການ, ວິທີການ, ກົນໄກການປະສານງານກັບພາກສ່ວນກ່ຽວຂ້ອງ ໃນການຕິດຕາມ ກວດກາຜົນການແກ້ໄຂຄໍາສະເໜີ ໃຫ້ມີຄວາມຖືກຕ້ອງ ແລະ ທັນກັບສະພາບການ.

ກອງປະຊຸມຄັ້ງນີ້ ແມ່ນຈະໄດ້ດໍາເນີນໄປຈົນຮອດວັນທີ 15 ກັນຍາ ຈຶ່ງຈະສຳເລັດ ເຊິ່ງໄດ້ຮັບການສະໜັບສະໜູນໂດຍ ໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ (steps).