ຕອນເຊົ້າວັນທີ 9 ມີນາ 2022 ທີ່ຫ້ອງປະຊຸມສະພາປະຊາຊົນແຂວງ ຄະນະເລຂາທິການສະພາແຫ່ງຊາດ ໄດ້ປະຊຸມຮ່ວມກັບຄະນະເລຂາທິການສະພາປະຊາຊົນແຂວງຜົ້ງສາລີ ໂດຍການເປັນປະທານຮ່ວມຂອງທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ແລະ ທ່ານ ສົມຈິດ ຫັບລະກອນ ຮອງປະທານສະພາປະຊາຊົນແຂວງ ມີຄະນະທິມງານຈາກຄະນະເລຂາທິການສະພາແຫ່ງຊາດ, ຄະນະເລຂາທິການສະພາປະຊາຊົນແຂວງ ແລະ ພະນັກງານລັດຖະກອນພາຍໃນຄະນະເລຂາທິການສະພາປະຊາຊົນແຂວງເຂົ້າຮ່ວມ.
ທີ່ປະຊຸມທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ລາຍງານຫຍໍ້ກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດວຽກງານຂອງຄະນະເລຂາທິການສະພາປະຊາຊົນແຂວງໃນໄລຍະຜ່ານມາ. ຊິ່ງທ່ານກໍໄດ້ຍົກໃຫ້ເຫັນເຖິງຜົນງານດ້ານດີ, ດ້ານອ່ອນຂໍ້ຄົງຄ້າງໃນການເປັນເສນາທິການໃຫ້ແກ່ສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ຄະນະສະມາຊິກສະພາປະຊາຊົນແຂວງ ໂດຍສະເພາະ ຕໍ່ກັບວຽກງານເນື້ອໃນ, ວຽກງານຈັດຕັ້ງພະນັກງານ, ວຽກງານກວດກາ, ວຽກງານຄຸ້ມຄອງຫ້ອງການ, ວຽກງານບໍລິຫານພິທິການ, ວຽກງານການເງິນ ແລະ ວຽກງານສື່ມວນຊົນ. ຈາກນັ້ນ, ທິມງານຄະນະເລຂາທິການສະພາແຫ່ງຊາດ ແລະ ຄະນະເລຂາທິການສະພາປະຊາຊົນແຂວງກໍແລກປ່ຽນບົດຮຽນ ຕໍ່ວຽກງານຂອງຄະນະເລຂາທິການສະພາປະຊາຊົນແຂວງ.
ໃນໂອກາດດຽວກັນນີ້ ໄດ້ມີພິມອບ-ຮັບເຄື່ອງສື່ສານທີ່ທັນສະໄໝ ສະມາດບອດ (VIEWSONIC IFP6570) ທີ່ໄດ້ຮັບການຊ່ວຍເຫລືອຈາກແຜນງງານເຊກາ ເຊິ່ງລວມມີສະຫະພາບເອີຣົບ/EU, ອົງການຮ່ວມມືພັດທະນາແຫ່ວປະເທດສະວິສເຊີແລນ (SDC), ລັດຖະບານເຢຍລະມັນ Germany ແລະ ອຸປະກອນເສີມຈໍານວນໜຶ່ງ ລວມມູນຄ່າ ປະມານ 150 ລ້ານກີບ. ເພື່ອຮັບໃຊ້ໃຫ້ແກ່ການຈັດກອງປະຊຸມທາງໄກ, ຝຶກອົບຮົມ ແລະ ສຳມະນາ ຂອງສະພາປະຊາຊົນແຂວງ. ຊຶ່ງກ່າວມອບໂດຍ ທ່ານ ສິງຄໍາ ວົງພະຈັນ ແລະ ກ່າວຮັບໂດຍ ທ່ານ ສົມຈິດ ຫັບລະກອນ. ທັງນີ້ກໍເພື່ອຍົກສູງການຫັນເປັນທັນສະໄໝໃນການນໍາໃຊ້ອຸປະກອນສື່ສານໄອທີ ເຂົ້າໃນການປະຕິບັດໜ້າທີ່ວຽກງານຂອງສະພາປະຊາຊົນແຂວງ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ